واشنگٹن،: امریکی صدر ڈونلڈ ٹرمپ نے پیر کو ایران کو سخت انتباہ دیتے ہوئے کہا کہ امریکہ یا تو تہران کے ساتھ ایک معاہدہ کرے گا یا پھر "کام مکمل" کر دے گا۔ انہوں نے دعویٰ کیا کہ اگر واشنگٹن چاہے تو چند ہی گھنٹوں میں ایران کے اہم بنیادی ڈھانچے کو تباہ کرنے کی صلاحیت رکھتا ہے۔

ایران سے متعلق گفتگو کرتے ہوئے ٹرمپ نے کہا، "ہم ہر صورت میں کامیاب ہوں گے۔ یا تو ہم معاہدہ کریں گے، یا پھر کام مکمل کر دیں گے۔"

تاہم انہوں نے واضح کیا کہ وہ فوجی کارروائی کے بجائے سفارتی حل کو ترجیح دیتے ہیں۔

انہوں نے کہا، "میں معاہدہ کرنا پسند کروں گا کیونکہ میں 9 کروڑ 10 لاکھ لوگوں کو متاثر نہیں کرنا چاہتا۔ لیکن اگر ضرورت پڑی تو ہم ایک گھنٹے کے اندر ان کے پل تباہ کر سکتے ہیں، ان کی توانائی کی فراہمی بند کر سکتے ہیں اور ان کے بڑے جدید پاور پلانٹس کو ختم کر سکتے ہیں۔"

ٹرمپ نے مزید دعویٰ کیا کہ امریکہ ایران کے بجلی گھروں اور بجلی پیدا کرنے والے تمام بڑے مراکز کو چند گھنٹوں میں تباہ کرنے کی صلاحیت رکھتا ہے۔

انہوں نے کہا، "ہم ایک دوپہر کے مختصر حصے میں ان کے تمام پاور پلانٹس ختم کر سکتے ہیں، اور وہ اس حقیقت سے بخوبی واقف ہیں۔"

یہ بیان ایسے وقت میں سامنے آیا ہے جب چند روز قبل ٹرمپ نے کہا تھا کہ اگر امریکہ چاہے تو ایران کی موجودہ اعلیٰ قیادت کو "ایک ہی حملے" میں ختم کر سکتا ہے۔ ان کا اشارہ ان ایرانی رہنماؤں کی جانب تھا جو سابق ایرانی سپریم لیڈر آیت اللہ علی خامنہ ای کی سرکاری آخری رسومات کے دوران ایک جگہ جمع ہوئے تھے۔

امریکی ویب سائٹ Axios کو دیے گئے ایک انٹرویو میں ٹرمپ نے کہا تھا، "وہ سب ایک جگہ موجود تھے۔ ایک ہی حملے میں ہم سب کو ختم کر سکتے تھے، لیکن ہم نے ایسا نہیں کیا کیونکہ پھر ہمارے پاس مذاکرات کے لیے کوئی باقی نہ رہتا۔" ان کے مطابق امریکہ اپنی عسکری صلاحیت کے باوجود ایران کے ساتھ سفارتی رابطے برقرار رکھنا چاہتا ہے۔

دوسری جانب ایران نے ٹرمپ کے حالیہ بیانات کی سخت مذمت کی ہے۔ آرمینیا میں ایرانی سفارت خانے نے سوشل میڈیا پلیٹ فارم ایکس پر جاری بیان میں کہا کہ امریکہ اور ٹرمپ آیت اللہ خامنہ ای کی وفات پر ایرانی عوام کے جذبات کو کبھی نہیں سمجھ سکتے کیونکہ "امریکہ کے پاس نہ تہذیب ہے، نہ تاریخ اور نہ ہی عزت۔"

بیان میں مزید کہا گیا، "افراد کو قتل کیا جا سکتا ہے، لیکن نظریات کو نہیں۔ آپ نے آیت اللہ خامنہ ای کو قتل کیا، مگر حقیقت میں آپ نے عطر کی ایک شیشی توڑی ہے جس کی خوشبو ہر طرف پھیل گئی ہے۔"

ادھر ایرانی سرکاری میڈیا کے مطابق آیت اللہ خامنہ ای کا جسدِ خاکی ہیلی کاپٹر کے ذریعے قم منتقل کر دیا گیا ہے، جہاں منگل کو آخری رسومات کا اگلا مرحلہ ادا کیا جائے گا۔ اس کے بعد تدفین اور تعزیتی تقریبات کے لیے عراق کے مقدس شہروں نجف اور کربلا میں بھی پروگرام منعقد کیے جائیں گے۔