نئی دہلی

عالمی ادارۂ صحت (ڈبلیو ایچ او) کے مطابق جمعہ 8 مئی تک ہنٹا وائرس کے مجموعی طور پر آٹھ معاملے سامنے آئے ہیں، جن میں تین اموات شامل ہیں، جبکہ اموات کی شرح 38 فیصد ریکارڈ کی گئی ہے۔بیان کے مطابق چھ معاملات کی لیبارٹری میں تصدیق ہنٹا وائرس انفیکشن کے طور پر ہوئی ہے، اور تمام متاثرین میں اینڈیز وائرس (اے این ڈی وی) کی نشاندہی کی گئی ہے۔

2 مئی کو ایک کروز جہاز میں شدید سانس کی بیماری میں مبتلا مسافروں کے ایک گروپ کی اطلاع عالمی ادارۂ صحت کو دی گئی تھی۔ اس وقت جہاز کے آپریٹر کے مطابق جہاز میں 147 مسافر اور عملے کے افراد موجود تھے، جبکہ 34 افراد پہلے ہی جہاز سے اتر چکے تھے۔

4 مئی کو جاری ہونے والی سابقہ ڈیزیز آؤٹ بریک نیوز کے بعد تین مشتبہ معاملات کی تصدیق ہوئی، جبکہ ایک نیا تصدیق شدہ معاملہ بھی سامنے آیا۔بین الاقوامی صحت ضوابط 2005 کے تحت نیشنل آئی ایچ آر فوکل پوائنٹس کو اس صورتحال سے آگاہ کر دیا گیا ہے اور وہ بین الاقوامی سطح پر رابطہ کھوجنے کے عمل میں تعاون کر رہے ہیں۔عالمی ادارۂ صحت نے اس واقعے سے عالمی آبادی کو لاحق خطرے کو کم قرار دیا ہے اور کہا ہے کہ وہ وبائی صورتحال پر مسلسل نظر رکھے گا اور خطرے کے جائزے کو اپ ڈیٹ کرتا رہے گا۔ تاہم جہاز میں موجود مسافروں اور عملے کے لیے خطرہ درمیانی درجے کا تصور کیا جا رہا ہے۔

ڈاکٹر نیرج نشچل، جو آل انڈیا انسٹی ٹیوٹ آف میڈیکل سائنسز (ایمس) کے شعبۂ طب سے وابستہ ہیں، نے کہا کہ ہندوستان میں ہنٹا وائرس کے پھیلنے کے امکانات کم ہیں کیونکہ اب تک یہاں کوئی معاملہ رپورٹ نہیں ہوا۔انہوں نے کہا کہ اس وائرس سے کووڈ جیسی عالمی وبا پیدا ہونے کا امکان بھی کم ہے کیونکہ انسان سے انسان میں اس وائرس کی منتقلی بہت نایاب ہے۔

ڈاکٹر نیرج نشچل نے کہا کہ ہندوستان میں وائرس کے پھیلنے کے امکانات کم ہیں، اب تک کوئی معاملہ سامنے نہیں آیا۔ احتیاط اور صفائی برقرار رکھ کر محفوظ رہا جا سکتا ہے۔ وائرس عام طور پر متاثرہ چوہوں کے فضلے یا اخراج سے پھیلتا ہے، جبکہ انسان سے انسان میں منتقلی بہت کم ہوتی ہے۔ اس وائرس کی کوئی ویکسین موجود نہیں، صرف علامات کے مطابق علاج ہی ممکن ہے۔ مختلف طریقۂ منتقلی کی وجہ سے کووڈ جیسی وبا کا امکان نہیں ہے۔

انہوں نے مزید کہا کہ اس وائرس کی علامات عام وائرل بیماریوں جیسی ہیں، جن میں بخار، جسم درد، سر درد وغیرہ شامل ہیں، تاہم متاثرہ علاقوں سے آنے والے افراد کو فوری طبی امداد حاصل کرنی چاہیے۔

ڈاکٹر نشچل کے مطابق ہنٹا وائرس کی شرحِ اموات 40 سے 50 فیصد کے درمیان ہے۔کچھ دیگر ماہرین نے بھی ہندوستان کے عوامی صحت کے نظام پر اعتماد ظاہر کرتے ہوئے کہا کہ کووڈ کے بعد اس طرح کے واقعات سے نمٹنے کے لیے بہتر تیاری موجود ہے۔ڈاکٹر این کے گنگولی، جو سر گنگا رام اسپتال میں بایوٹیکنالوجی اور تحقیقاتی شعبے کے سربراہ ہیں، نے کہا کہ وائرس کے پھیلاؤ کو روکنے کے لیے ماسک اور ذاتی حفاظتی آلات (پی پی ای) کی ضرورت پڑ سکتی ہے۔

انہوں نے کہا کہ کووڈ کے بعد ہم کافی حد تک تیار ہیں۔ پہلے یہ غلط فہمی تھی کہ ہنٹا وائرس صرف ایک شخص سے دوسرے شخص تک یا آلودہ اشیا کے ذریعے پھیلتا ہے، لیکن موجودہ معلومات کے مطابق یہ سانس کے ذریعے پھیلنے والا انفیکشن بھی ہے اور ہوا میں موجود ذرات کے ذریعے منتقل ہو سکتا ہے۔ اسی لیے این-90 ماسک اور دیگر حفاظتی سامان استعمال کرنا ضروری ہوگا۔

ایک سرکاری اہلکار کے مطابق مرکزی وزارتِ صحت صورتحال پر مسلسل نظر رکھے ہوئے ہے اور عالمی ادارۂ صحت سمیت بین الاقوامی شراکت داروں کے ساتھ قریبی رابطے میں ہے۔

عوامی صحت کے تحفظ اور شہریوں کی سلامتی کے لیے ضروری احتیاطی اقدامات بھی فعال طور پر کیے جا رہے ہیں۔