کابل / آواز دی وائس

ہندوستان کے نیشنل سینٹر فار سیزمولوجی (این سی ایس) کے مطابق، ہفتے کے روز افغانستان میں 4.4 شدت کا زلزلہ آیا۔ این سی ایس کے مطابق، یہ زلزلہ 180 کلومیٹر کی گہرائی میں ریکارڈ کیا گیا۔

سوشل میڈیا پلیٹ فارم ایکس  پر جاری بیان میں کہا گیا کہ زلزلہ: شدت 4.4، تاریخ: 08/11/2025، وقت: 03:14:26، عرض بلد: 30.70 شمال، طول بلد: 65.66 مشرق، گہرائی: 180 کلومیٹر، مقام: افغانستان۔ اس سے ایک دن قبل، جمعے کے روز بھی افغانستان میں 4.4 شدت کا زلزلہ آیا تھا، جو محض 10 کلومیٹر کی کم گہرائی پر تھا، جس کے باعث آفٹر شاکس (بعد کے جھٹکوں) کا خطرہ بڑھ گیا تھا۔

این سی ایس نے ایک اور پوسٹ میں بتایا کہ زلزلہ: شدت 4.4، تاریخ: 06/11/2025، وقت: 03:40:41 ، عرض بلد: 34.55 شمال، طول بلد: 70.62 مشرق، گہرائی: 10 کلومیٹر، مقام: افغانستان۔

ماہرین کے مطابق، کم گہرائی والے زلزلے عام طور پر زیادہ خطرناک ہوتے ہیں، کیونکہ ان کی جھٹکے دار لہریں زمین کی سطح تک تیزی سے پہنچتی ہیں، جس سے جھٹکوں کی شدت زیادہ ہوتی ہے، عمارتوں کو نقصان پہنچنے کا خطرہ بڑھ جاتا ہے، اور جانی نقصان کے امکانات بھی زیادہ ہو جاتے ہیں۔ اس سے پہلے، 4 نومبر کو افغانستان کے شمالی حصے میں 6.3 شدت کا ایک طاقتور زلزلہ آیا تھا، جس میں کم از کم 27 افراد ہلاک اور 956 زخمی ہوئے تھے۔ یہ اطلاع طالبان کی وزارتِ صحت کے ترجمان شرفات زمان امر نے دی۔ اس زلزلے سے ملک کی ایک تاریخی اور خوبصورت مسجد کو بھی نقصان پہنچا۔

یہ زلزلہ پیر کی علی الصبح مزارِ شریف کے قریب آیا، جو افغانستان کے شمالی حصے کے سب سے زیادہ آباد شہروں میں سے ایک ہے۔ امریکی ارضیاتی سروے (یو ایس جی ایس) کے مطابق، زلزلے کی گہرائی تقریباً 28 کلومیٹر (17.4 میل) تھی۔ ریڈ کراس کے مطابق، افغانستان کا شمار ان ممالک میں ہوتا ہے جہاں طاقتور زلزلے اکثر آتے ہیں، کیونکہ ہندوکش پہاڑی سلسلہ ارضیاتی طور پر انتہائی فعال علاقہ ہے جہاں ہر سال زلزلے آتے ہیں۔

افغانستان کئی فالٹ لائنز (درزوں) پر واقع ہے ۔  یہ وہ درز ہیں جو ہندوستانی اور یوریشیائی ٹیکٹونک پلیٹس کے بیچ موجود ہیں۔ ایک بڑی فالٹ لائن صوبہ ہرات سے بھی گزرتی ہے۔ ان پلیٹس کے ٹکراؤ کی وجہ سے افغانستان ایک زلزلہ خیز خطہ بن گیا ہے، جہاں مسلسل زمینی حرکت اور زلزلے آتے رہتے ہیں۔

اقوامِ متحدہ کے دفتر برائے ہم آہنگیِ انسانی امور  کے مطابق، افغانستان قدرتی آفات جیسے موسمی سیلاب، بھوسکھلن (لینڈ سلائیڈز) اور زلزلوں کے خطرات کے لحاظ سے انتہائی کمزور ملک ہے۔ یو این او سی ایچ اے نے کہا کہ افغانستان میں بار بار آنے والے زلزلے ان کمزور برادریوں کو مزید نقصان پہنچاتے ہیں جو پہلے ہی دہائیوں سے جاری تنازعات اور پسماندگی کا سامنا کر رہی ہیں۔ ان حالات نے انہیں بیک وقت کئی بحرانوں سے نمٹنے کی صلاحیت سے تقریباً محروم کر دیا ہے۔