نئی دہلی: ہندوستان کے وزیر خارجہ ایس جے شنکر کو ایران کے وزیر خارجہ سید عباس عراقچی کی جانب سے ٹیلیفون کال موصول ہوئی جس میں دونوں رہنماؤں نے دوطرفہ تعلقات اور مغربی ایشیا کی موجودہ کشیدہ صورتحال پر تبادلہ خیال کیا۔

جے شنکر نے سوشل میڈیا پر اپنے بیان میں کہا کہ انہوں نے ایرانی وزیر خارجہ سے موجودہ حالات پر گفتگو کی۔ بھارتی دارالحکومت میں ایرانی سفارت خانے کے مطابق اس رابطے میں علاقائی اور بین الاقوامی پیش رفت پر بھی بات چیت ہوئی۔

یہ اہم سفارتی رابطہ ایسے وقت میں سامنے آیا ہے جب امریکہ اور ایران کے درمیان کشیدگی مسلسل بڑھ رہی ہے اور مغربی ایشیا میں صورتحال تیزی سے تبدیل ہو رہی ہے۔

اس سے قبل جے شنکر نے متحدہ عرب امارات کے وزیر خارجہ عبداللہ بن زاید النہیان اور قطر کے وزیر اعظم و وزیر خارجہ تمیم بن حمد آل ثانی سے بھی علیحدہ علیحدہ بات چیت کی جس میں خطے کی بدلتی صورتحال کا جائزہ لیا گیا۔

بھارت اس پورے معاملے پر گہری نظر رکھے ہوئے ہے اور خطے کے اہم ممالک کے ساتھ مسلسل رابطے میں ہے۔ نئی دہلی کی جانب سے ہمیشہ بات چیت کے ذریعے کشیدگی کم کرنے اور مسائل کو پرامن طریقے سے حل کرنے پر زور دیا گیا ہے۔

واضح رہے کہ مغربی ایشیا میں جاری کشیدگی کے باعث خطے کی سلامتی اور عالمی معیشت دونوں پر اثرات مرتب ہو رہے ہیں جبکہ سفارتی کوششیں تاحال جاری ہیں۔