نئی دہلی

 وزیر خارجہ ایس جے شنکر نے منگل کو اٹلی کے قومی دن کے موقع پر اٹلی کو مبارکباد پیش کرتے ہوئے اس اعتماد کا اظہار کیا کہ دونوں ممالک کے درمیان دوطرفہ تعلقات مستقبل میں مزید مضبوط ہوں گے۔ایکس پر ایک پوسٹ میں جے شنکر نے اٹلی کے نائب وزیر اعظم اور وزیر خارجہ انتونیو تاجانی، اٹلی کی حکومت اور وہاں کے عوام کے لیے نیک خواہشات کا اظہار کیا۔

انہوں نے اپنی پوسٹ میں کہا کہ نائب وزیر اعظم و وزیر خارجہ انتونیو تاجانی، اٹلی کی حکومت اور عوام کو قومی دن کی پُرخلوص مبارکباد۔ ہمیں یقین ہے کہ ہماری خصوصی اسٹریٹجک شراکت داری مزید مضبوط سے مضبوط تر ہوتی جائے گی۔

اس سے قبل 20 مئی کو وزارتِ خارجہ میں سکریٹری (مغرب) سبی جارج نے کہا تھا کہ وزیر اعظم نریندر مودی کے اٹلی کے دورے کے نتیجے میں ثقافتی، تعلیمی، دفاعی اور عوامی روابط کو فروغ دینے کے لیے کئی اہم اقدامات کیے گئے ہیں۔وزیر اعظم کے اٹلی کے دورے سے متعلق ایک خصوصی میڈیا بریفنگ سے خطاب کرتے ہوئے سبی جارج نے بتایا کہ نریندر مودی اور اٹلی کی وزیر اعظم جورجیا میلونی نے اعلان کیا ہے کہ سال 2027 کو ہندوستان اور اٹلی کے درمیان "سالِ ثقافت" کے طور پر منایا جائے گا۔

انہوں نے کہا کہ ثقافتی تعلقات کو مزید مضبوط بنانے اور دوطرفہ سیاحت کو فروغ دینے کے لیے دونوں رہنماؤں نے 2027 کو ہندوستان اور اٹلی کے درمیان سالِ ثقافت کے طور پر منانے کا اعلان کیا ہے۔

سبی جارج نے مزید بتایا کہ گجرات کے لوتھل میں قائم کیے جا رہے قومی بحری ورثہ کمپلیکس کی ترقی میں اٹلی کے تعاون کے لیے ایک مفاہمتی یادداشت (ایم او یو) پر دستخط کیے گئے ہیں۔ اس کے علاوہ دونوں ممالک یونیسکو کے عالمی ثقافتی ورثے کے مقامات کے درمیان ایک "ٹوئننگ پروگرام" پر بھی کام کر رہے ہیں۔انہوں نے کہا کہ اس دورے کے اہم نتائج میں ایک مشترکہ اعلامیہ برائے ارادہ (جے ڈی آئی) بھی شامل ہے، جس کا مقصد ہندوستان سے اٹلی جانے والی نرسوں کی نقل و حرکت کو آسان بنانا ہے۔

سبی جارج کے مطابق:ہندوستان سے اٹلی جانے والی نرسوں کی نقل و حرکت کو سہل بنانے سے متعلق جے ڈی آئی اس دورے کے اہم نتائج میں شامل ہے، جس سے ہندوستانی طبی شعبے کے ماہرین کے لیے اٹلی میں کام کرنے کے مواقع مزید آسان ہوں گے۔

انہوں نے مزید بتایا کہ اعلیٰ تعلیم اور تحقیق کے شعبے میں ایک ہند-اٹلی روڈ میپ کے ساتھ ساتھ سائنس اور ٹیکنالوجی کے میدان میں تعاون سے متعلق کئی معاہدوں پر بھی دستخط کیے گئے ہیں۔

وزیر اعظم نریندر مودی کے خوراک و زراعت کی تنظیم (ایف اے او) کے دورے کا ذکر کرتے ہوئے سبی جارج نے کہا کہ خوراک کے تحفظ، پائیدار زراعت اور دیہی ترقی کے لیے ان کی خدمات کے اعتراف میں ایف اے او کے ڈائریکٹر جنرل نے انہیں ایگریکولا ایوارڈ سے نوازا۔