دبئی: مغربی ایشیا میں جاری کشیدگی کے دوران عوامی زندگی کو آسان بنانے اور روزگار کے مواقع بڑھانے کے لیے ایک جامع اقتصادی پیکیج کا اعلان کیا ہے۔

رپورٹس کے مطابق دبئی کی ایگزیکٹو کونسل نے پانچ اہم اقدامات کی منظوری دی ہے جن کا مقصد مالی دباؤ کم کرنا، تجارتی عمل کو آسان بنانا، معیشت کی پیمائش کو بہتر کرنا اور سماجی ترقی کو مضبوط بنانا ہے۔

اہم اقدامات میں 1 ارب درہم کا اقتصادی مراعاتی پیکیج شامل ہے جو 1 اپریل 2026 سے 3 سے 6 ماہ کے عرصے میں نافذ کیا جائے گا۔ اس پیکیج کے تحت سرکاری فیسوں کی ادائیگی 3 ماہ کے لیے مؤخر کی جائے گی۔ ہوٹلوں کو سیلز فیس اور ٹورازم درہم کی ادائیگی مؤخر کرنے کی اجازت ہوگی جبکہ کسٹمز ڈیٹا کے لیے رعایتی مدت 30 دن سے بڑھا کر 90 دن کر دی گئی ہے۔

اس کے علاوہ رہائشی اجازت ناموں کے اجرا اور تجدید کے عمل کو بھی آسان بنایا گیا ہے تاکہ ہنرمند افراد اور پیشہ ور افراد کے لیے دبئی میں کام اور رہائش مزید سہل ہو سکے۔

دبئی نے اپنی جی ڈی پی کی پیمائش کے طریقہ کار کو بھی اپڈیٹ کیا ہے تاکہ معیشت کی حقیقی سرگرمیوں کی بہتر عکاسی ہو سکے۔ 2025 کی چوتھی سہ ماہی میں 6.4 فیصد معاشی ترقی ریکارڈ کی گئی جبکہ پورے سال کی جی ڈی پی 5.4 فیصد اضافے کے ساتھ 937 ارب درہم تک پہنچ گئی۔

تجارت کو فروغ دینے کے لیے ورچوئل ویئر ہاؤسز اقدام کی منظوری دی گئی ہے جس کے تحت عارضی درآمدات جیسے آرٹ ورک پر کسٹمز ڈیوٹی اور مالی ضمانت ختم کی جائے گی۔ نجی آرٹ ورک پر 3 سال کے لیے ڈیوٹی معطل رہے گی اور جدید ٹریکنگ سسٹم کے ذریعے نگرانی کی جائے گی۔

سماجی سطح پر دبئی امپاورمنٹ اسٹریٹیجی کے تحت معیار زندگی بہتر بنانے اور روزگار کے مواقع بڑھانے پر زور دیا گیا ہے۔ اس پروگرام کے ذریعے اب تک 1200 اماراتی شہریوں کی مدد کی گئی ہے، 7000 سے زائد ملازمتیں پیدا کی گئی ہیں اور 400 سے زیادہ ادارے اس میں شامل ہو چکے ہیں۔

مزید برآں ورکرز رہائش کے لیے صحت اور حفاظت کی حکمت عملی بھی متعارف کرائی گئی ہے جس کا مقصد 2033 تک تمام بنیادی سہولیات کی فراہمی اور حفاظتی معیار پر مکمل عمل درآمد کو یقینی بنانا ہے۔

یہ اقدامات دبئی 2040 اربن ماسٹر پلان اور بین الاقوامی لیبر تنظیم کے اصولوں کے مطابق ہیں اور ان کا مقصد کارکنوں کے رہنے اور کام کرنے کے حالات کو بہتر بنانا ہے۔