تہران:ایران کی اسلامی انقلابی گارڈ کور نے امریکہ اور اسرائیل کو ممکنہ زمینی کارروائی کے حوالے سے سخت انتباہ جاری کیا ہے۔بیان میں کہا گیا کہ “اپنے بچوں کو جہنم میں نہ بھیجو۔ نیتن یاہو اور ٹرمپ کے فریب میں نہ آؤ۔ حملہ آور فوجی ایرانی قوم کے کروڑوں افراد کے سمندر میں ڈوب جائیں گے اور غائب ہو جائیں گے۔”

آئی آر جی سی نے براہ راست امریکی عوام کو مخاطب کرتے ہوئے کہا کہ انہیں ڈونلڈ ٹرمپ اور بنیامین نیتن یاہو جیسے جنگ پسند رہنماؤں کی جانب سے گمراہ کیا جا رہا ہے۔ بیان میں کہا گیا کہ جنگ کی حقیقت امریکہ کے پٹرول پمپوں پر نظر آئے گی، ایران کی سڑکوں پر دکھائی دے گی اور تل ابیب و حیفا کی فضاؤں میں محسوس کی جا سکتی ہے۔

میڈیا رپورٹس کے مطابق پینٹاگون مشرق وسطیٰ میں 82ویں ایئر بورن ڈویژن کے مزید فوجی بھیجنے کی تیاری کر رہا ہے۔ ایک رپورٹ کے مطابق اس میں کمانڈ یونٹ اور زمینی افواج شامل ہو سکتی ہیں، جبکہ خارگ جزیرہ پر ممکنہ زمینی کارروائی پر بھی غور کیا جا رہا ہے۔

آئی آر جی سی کے مطابق “آپریشن ٹرو پرامس 4” کی 81ویں لہر میں ایماد، قیام، خرمشہر 4 اور قدر میزائلوں نے اسرائیل کے 70 سے زائد مقامات کو نشانہ بنایا۔ دعویٰ کیا گیا کہ حیفا، ڈیمونا، الخضریہ اور تل ابیب کے شمال و جنوب میں اہداف کامیابی سے تباہ کیے گئے۔

بیان کے آخر میں خبردار کیا گیا کہ “یاد رکھو، ہم تل ابیب اور حیفا کو زمین بوس کر دیں گے، یہی سبق ہمارے شہید رہنما نے ہمیں دیا ہے۔”

آئی آر جی سی کا کہنا ہے کہ جنگ کے آغاز سے اب تک 700 سے زیادہ میزائل اور 3600 ڈرون امریکی اور اسرائیلی اہداف پر داغے جا چکے ہیں، جبکہ ایران کے فضائی دفاعی نظام نے 200 سے زائد دشمن طیاروں اور میزائلوں کو تباہ کیا ہے۔

دریں اثنا، ایران کے وزیر خارجہ عباس عراقچی نے ایک بار پھر واضح کیا کہ ایران “امریکی۔اسرائیلی جارحیت” کے جواب میں مزاحمت کی پالیسی جاری رکھے گا اور کسی بھی مذاکرات یا جنگ بندی کو قابل اعتماد ضمانتوں کے بغیر قبول نہیں کرے گا۔

انہوں نے ایرانی سرکاری میڈیا پریس ٹی وی کو دیے گئے انٹرویو میں کہا کہ “اس وقت ہماری پالیسی مزاحمت کو جاری رکھنا ہے اور کوئی مذاکرات نہیں ہو رہے ہیں۔”

انہوں نے مزید کہا کہ “کوئی مذاکرات جاری نہیں ہیں” اور یہ بھی واضح کیا کہ اگرچہ خطے کے کئی وزرائے خارجہ نے تہران سے رابطہ کیا ہے، لیکن ایران کا مؤقف بدستور اصولی اور مضبوط ہے۔

عراقچی نے تنازع کے خاتمے کے لیے پیش کی جانے والی “بین الاقوامی ضمانتوں” کو بھی ناقابل اعتماد قرار دیتے ہوئے کہا کہ یہ مکمل طور پر بھروسہ مند نہیں ہوتیں۔