ممبئی: جیو اسٹوڈیوز نے جمعہ کے روز اعلان کیا کہ رنویر سنگھ کی سپرہٹ فلم "دھرندھر" آج سے جاپان کے سینماؤں میں ریلیز کر دی گئی ہے۔ جیو اسٹوڈیوز نے سوشل میڈیا پلیٹ فارم ایکس پر فلم کا جاپانی زبان میں تیار کردہ پوسٹر جاری کرتے ہوئے لکھا، ’’جس دھاڑ نے ہندوستان کو ہلا دیا، وہ اب جاپان میں گونج رہی ہے۔ جاپان کے سینماؤں میں اب 'دھرندھر' کا تجربہ کیجیے۔‘

‘ فلم کی کہانی، ہدایت کاری اور پروڈکشن آدتیہ دھر نے کی ہے، جبکہ اسے جیوتی دیشپانڈے اور لوکیش دھر نے پروڈیوس کیا ہے۔ اب یہ فلم جاپانی ناظرین کے لیے بھی پیش کی جا رہی ہے۔ جیو اسٹوڈیوز اور بی 62 اسٹوڈیوز کے بینر تلے بننے والی یہ فلم 5 دسمبر 2025 کو ہندوستان میں ریلیز ہوئی تھی اور اس کے بعد ہندی سنیما کی سب سے بڑی کامیاب فلموں میں شمار ہونے لگی۔

فلم میں رنویر سنگھ کے علاوہ اکشے کھنہ، راکیش بیدی، آر مادھون، سنجے دت، ارجن رام پال اور سارا ارجن نے اہم کردار ادا کیے ہیں۔ اس فلم کا دوسرا حصہ "دھرندھر: دی ریوینج" مارچ 2026 میں ریلیز ہوا، جس نے اس فلمی سلسلے کی عالمی کامیابی کو مزید وسعت دی۔ شاندار باکس آفس کارکردگی کی بدولت دھرندھر سیریز نے دنیا بھر میں 3,000 کروڑ روپے سے زائد کا کاروبار کیا اور یہ سنگ میل حاصل کرنے والی پہلی ہندوستانی فلمی فرنچائز بن گئی۔

دسمبر 2025 سے ہندوستانی فلموں کی کامیابیوں کا ذکر ہو تو آدتیہ دھر کی دھرندھر فرنچائز کا نام نمایاں طور پر سامنے آتا ہے۔ اس کے دونوں حصوں نے باکس آفس پر غیر معمولی کامیابی حاصل کی۔ دونوں فلموں کی مجموعی عالمی کمائی 3,000 کروڑ روپے سے تجاوز کر چکی ہے، جو ہندوستانی فلمی تاریخ میں ایک منفرد ریکارڈ ہے۔ اس فرنچائز کو جیوتی دیشپانڈے، آدتیہ دھر اور لوکیش دھر نے جیو اسٹوڈیوز اور بی 62 اسٹوڈیوز کے بینر تلے پروڈیوس کیا ہے۔

فلمی تجزیہ کاروں کو 5 دسمبر 2025 کو "دھرندھر" کی ریلیز سے قبل اس کی کامیابی پر شبہات تھے، اگرچہ فلم کے بارے میں اچھا خاصا تجسس موجود تھا۔ تاہم ریلیز کے بعد ناظرین نے اسے بھرپور پذیرائی دی اور اس پر ہونے والی مسلسل بحث نے اسے عالمی باکس آفس پر ایک غیر معمولی کامیابی میں تبدیل کر دیا۔