واشنگٹن ڈی سی: ایک نئی تحقیق سے پتا چلا ہے کہ اندرونی طور پر دبایا گیا ذہنی دباؤخصوصاً مایوسی کے احساسات بزرگ چینی نژاد امریکیوں میں یادداشت کی کمزوری کو تیزی سے بڑھا سکتا ہے، جبکہ حیرت انگیز طور پر سماجی یا کمیونٹی سپورٹ جیسے عوامل کا اتنا اثر سامنے نہیں آیا۔ یہ تحقیق رٹجرز ہیلتھ کے محققین نے کی، جو جرنل آف پریوینشن آف الزائمرز ڈیزیز میں شائع ہوئی۔

اس کا مقصد 60 سال سے زائد عمر کے چینی نژاد افراد میں ذہنی کمزوری (cognitive decline) کے خطرات اور ممکنہ حفاظتی عوامل کا جائزہ لینا تھا۔ محققین کے مطابق، ثقافتی دباؤ اور معاشرتی تصورات (جیسے “ماڈل مائنورٹی” کا تصور) جذباتی مسائل کو چھپا سکتے ہیں، جس کی وجہ سے یہ مسائل نہ تو پہچانے جاتے ہیں اور نہ ہی ان کا علاج ہو پاتا ہے۔

تحقیق کی سربراہ مِشیل چن نے کہا کہ ایشیائی نژاد امریکی بزرگوں کی تعداد تیزی سے بڑھ رہی ہے، اس لیے اس کم زیرِ تحقیق گروہ میں یادداشت کی کمزوری کے عوامل کو سمجھنا نہایت ضروری ہے۔ محققین نے بتایا کہ بہت سے بزرگ مہاجرین کو زبان کی رکاوٹوں اور ثقافتی فرق جیسے مسائل کا سامنا ہوتا ہے، جو مسلسل ذہنی دباؤ کا سبب بنتے ہیں۔

“ماڈل مائنورٹی” کا تصور، جس میں ایشیائی نژاد افراد کو ہمیشہ کامیاب اور صحت مند سمجھا جاتا ہے، اضافی دباؤ ڈال سکتا ہے اور ان کے جذباتی مسائل کو نظر انداز کر سکتا ہے۔ مِشیل چن کے مطابق، “ذہنی دباؤ اور مایوسی جیسے عوامل اکثر نظر انداز ہو جاتے ہیں، حالانکہ یہ دماغی صحت پر گہرا اثر ڈالتے ہیں۔ چونکہ ان احساسات کو بہتر کیا جا سکتا ہے، اس لیے ہم چاہتے ہیں کہ اس تحقیق کی بنیاد پر ثقافتی لحاظ سے مناسب طریقوں سے ذہنی دباؤ کم کرنے کی حکمت عملی تیار کی جائے۔” اس تحقیق میں Population Study of Chinese Elderly (PINE) کے ڈیٹا کا تجزیہ کیا گیا، جو چینی نژاد امریکی بزرگوں پر سب سے بڑی کمیونٹی تحقیق ہے۔

اس میں 2011 سے 2017 کے دوران شکاگو میں رہنے والے 1500 سے زائد افراد کے انٹرویوز شامل تھے۔ محققین نے تین اہم عوامل کا جائزہ لیا: اندرونی ذہنی دباؤ (internalised stress) ، کمیونٹی یا پڑوس کا تعاون اور بیرونی طور پر دباؤ کم کرنے کے طریقے۔ نتائج سے پتا چلا کہ صرف اندرونی ذہنی دباؤ جس میں مایوسی اور مسائل کو اپنے اندر دبانا شامل ہے—یادداشت میں مسلسل کمی سے مضبوطی سے جڑا ہوا تھا۔

چونکہ اندرونی ذہنی دباؤ کو کم کیا جا سکتا ہے، اس لیے یہ تحقیق اس بات کی نشاندہی کرتی ہے کہ اگر بروقت اور ثقافتی لحاظ سے مناسب مدد فراہم کی جائے تو بزرگ افراد کی دماغی صحت کو بہتر بنایا جا سکتا ہے۔ محققین نے زور دیا کہ ایسی حکمت عملیاں تیار کی جائیں جو مہاجرین کے منفرد تجربات اور ثقافتی پس منظر کو مدنظر رکھیں، تاکہ نہ صرف ذہنی دباؤ کم ہو بلکہ یادداشت کی کمزوری کے خطرات بھی گھٹائے جا سکیں۔