نیویارک: ہندوستان نے سوڈان میں تعلیمی بنیادی ڈھانچے کو نشانہ بنانے والے فریقوں کے خلاف فوری عالمی کارروائی اور سخت احتساب کا مطالبہ کیا ہے۔ ہندوستان نے خبردار کیا کہ تین سال سے جاری تنازع کے باعث 1 کروڑ 70 لاکھ سے زائد بچے اسکولوں سے باہر ہو گئے ہیں۔

اقوام متحدہ میں ’’سوڈان میں تعلیم کا تحفظ: امن، بحالی اور استحکام میں سرمایہ کاری‘‘ کے موضوع پر ہونے والے آریا فارمولا اجلاس سے خطاب کرتے ہوئے ہندوستان کے اقوام متحدہ کے کونسلر ایلڈوس میتھیو پونوس نے تنازعات والے علاقوں میں بچوں کے تعلیم کے حق کے تحفظ کے لیے نئی دہلی کے عزم کا اعادہ کیا۔

اس اجلاس کا انعقاد صومالیہ، جمہوری جمہوریہ کانگو اور لائبیریا کے مستقل مشنز نے کیا تھا۔ بحران کی سنگینی کو اجاگر کرتے ہوئے پونوس نے اقوام متحدہ کے اعداد و شمار کا حوالہ دیا، جن کے مطابق سوڈان بھر میں اسکولوں پر حملوں میں 57 فیصد اضافہ ہوا ہے۔ انہوں نے زور دیا کہ ’’احتساب کے بغیر تحفظ مؤثر نہیں ہوتا‘‘ اور اسکولوں کو بلاخوف و خطر نشانہ بنانے والوں کو جواب دہ ٹھہرایا جانا چاہیے۔

انہوں نے کہا، ’’گزشتہ تین برسوں کے دوران سوڈان کو تباہ کرنے والے تنازع نے لاکھوں لوگوں کی زندگیوں کو برباد کر دیا ہے، جس کا سب سے زیادہ خمیازہ بچوں کو بھگتنا پڑا ہے۔ ہم یہاں موجود تمام لوگوں کی طرح شہریوں، بالخصوص بچوں اور تعلیمی بنیادی ڈھانچے پر حملوں کی مذمت کرتے ہیں۔‘‘ پونوس نے کہا کہ تعلیم کی بحالی کے لیے ایک جامع حکمت عملی ضروری ہے، جس میں بے گھری، بھوک اور صحت کے مسائل سے نمٹنا شامل ہو۔

انہوں نے تنازع سے متاثرہ بچوں کی بحالی کے لیے یونیسیف اور دیگر انسانی ہمدردی کی تنظیموں کی کوششوں کو بھی سراہا۔ انہوں نے کہا، ’’تعلیم ایک بنیادی حق ہونے کے ساتھ ساتھ سوڈان کے مستقبل میں سرمایہ کاری بھی ہے۔ پائیدار امن اور استحکام محفوظ طریقے سے تعلیم تک رسائی یقینی بنانے اور تعلیمی اداروں کی تعمیر نو کے لیے ناگزیر ہیں۔ اسی کے ساتھ تعلیم کی بحالی کے لیے جامع طریقۂ کار ضروری ہے۔ بھوک، بے گھری اور خراب صحت کی صورت میں بچے تعلیم حاصل نہیں کر سکتے۔ تنازع سے متاثرہ بچوں کی بحالی اور معاشرے میں دوبارہ انضمام کو یقینی بنانا بھی اتنا ہی اہم ہے۔ ہم اس سلسلے میں یونیسیف اور دیگر انسانی ہمدردی کے شراکت داروں کے اہم کام کو تسلیم کرتے ہیں۔‘

‘ پونوس نے سوڈان کے لیے ہندوستان کی جاری انسانی امداد کا بھی ذکر کیا۔ انہوں نے بتایا کہ رواں سال کے آغاز میں سوڈان میں مصنوعی اعضا فراہم کرنے کے لیے ایک کیمپ منعقد کیا گیا، جس سے 600 افراد مستفید ہوئے، جن میں کئی بچے بھی شامل تھے۔ انہوں نے کہا، ’’پورے تنازع کے دوران ہندوستان سوڈان کے عوام کے ساتھ کھڑا رہا ہے۔

رواں سال کے آغاز میں ہم نے سوڈان میں 600 مستفیدین کے لیے مصنوعی اعضا کا کیمپ منعقد کیا، جن میں کئی بچے بھی شامل تھے۔ ان بچوں کو دوبارہ دوڑتے اور اچھلتے دیکھنا انتہائی اطمینان بخش تھا۔ ہمیں امید ہے کہ جلد ہی وہ دوبارہ اپنے اسکولوں تک بھی چل کر جا سکیں گے۔‘‘ تعلیمی بنیادی ڈھانچے کو پہنچنے والے جسمانی نقصان کو کم کرنے کے لیے انہوں نے ٹیکنالوجی اور ڈیجیٹل پبلک انفراسٹرکچر (DPI) ماڈل سے فائدہ اٹھانے کی تجویز پیش کی۔ انہوں نے ہندوستان کے دکشا (DIKSHA — Digital Infrastructure for Knowledge Sharing) پلیٹ فارم کے تجربے کا حوالہ دیتے ہوئے کہا کہ اس کے ذریعے معیاری تعلیمی وسائل تک دور دراز علاقوں میں رسائی بڑھائی جا سکتی ہے اور سوڈان کے تعلیمی اداروں کی طویل مدتی بحالی کو مضبوط بنایا جا سکتا ہے۔

انہوں نے کہا، ’’مسلسل تعلیمی سرمایہ کاری کے ساتھ ایسے اقدامات سوڈان کے اداروں کی مضبوطی میں اضافہ کر سکتے ہیں اور اس کی طویل مدتی بحالی میں مدد دے سکتے ہیں۔ آخر میں، احتساب کے بغیر تحفظ مؤثر نہیں ہوتا۔ جو فریق بلاخوف اسکولوں کو نشانہ بناتے ہیں، انہیں جواب دہ ٹھہرایا جانا چاہیے۔‘‘

قابل ذکر ہے کہ مئی میں ہندوستان اور سوڈان کے درمیان وزارتِ خارجہ کی سطح پر مشاورت کا نواں دور ہوا تھا۔ اس دوران دونوں فریقوں نے دو طرفہ تعلقات کے مکمل دائرۂ کار کا جائزہ لیا اور انسدادِ دہشت گردی سمیت مختلف شعبوں میں تعاون مضبوط بنانے کے عزم کا اعادہ کیا۔ وزارت خارجہ کے ایک بیان کے مطابق یہ مذاکرات پیر کو پورٹ سوڈان میں ہوئے تھے۔ ان کی مشترکہ صدارت ہندوستان کی وزارت خارجہ کے جوائنٹ سکریٹری (مغربی ایشیا و شمالی افریقہ) ایم سریش کمار اور سوڈان کی وزارت خارجہ کے انڈر سکریٹری معاویہ عثمان خالد محمد نے کی تھی۔