منیلا: فلپائن میں 7.8 شدت کے طاقتور زلزلے کے نتیجے میں ہلاک ہونے والوں کی تعداد بڑھ کر 15 ہو گئی ہے۔ سرکاری خبر رساں ادارے وام کے مطابق یہ معلومات فلپائن کے دفتر برائے شہری دفاع کے حکام نے فراہم کی ہیں۔ مقامی دفترِ شہری دفاع کے ڈائریکٹر روڈریگو سوسمینا نے بتایا کہ 15 میں سے 12 ہلاکتیں سوکسارگن خطے میں رپورٹ ہوئی ہیں، جس میں جنوبی کوٹاباتو، سلطان قدرت، سارانگانی اور جنرل سانتوس سٹی سمیت چار صوبے اور ایک شہر شامل ہیں۔ انہوں نے کہا کہ اس خطے میں کم از کم 129 افراد زخمی بھی ہوئے ہیں۔

فلپائنی نیوز ایجنسی (پی این اے) کے مطابق سماجی بہبود اور ترقی کے محکمے (ڈی ایس ڈبلیو ڈی) کے سیکریٹری ریکس گیچالیان نے مقامی انتظامیہ کے ساتھ فوری رابطہ اور امدادی سرگرمیوں کا حکم دیا ہے۔ انہوں نے بتایا کہ متاثرہ خاندانوں اور افراد کی مدد کے لیے منڈاناؤ میں ایک لاکھ دس ہزار سے زائد خاندانی غذائی پیکٹ (فیملی فوڈ پیکس) دستیاب ہیں، جنہیں ضرورت پڑنے پر فوری طور پر تقسیم کیا جا سکتا ہے۔

ڈی ایس ڈبلیو ڈی کے ڈیزاسٹر رسپانس مینجمنٹ گروپ کے مطابق 2 جون تک ملک بھر میں 47 لاکھ سے زائد غذائی پیکٹ مختلف مقامات پر پہلے سے ذخیرہ کیے جا چکے ہیں، تاکہ قدرتی آفات اور ہنگامی حالات میں فوری امداد فراہم کی جا سکے۔ گیچالیان نے کہا کہ محکمہ کی فوری ردعمل ٹیمیں (کیو آر ٹیز) بھی مکمل طور پر تیار ہیں اور مقامی حکومتوں کے ساتھ مسلسل رابطے میں ہیں تاکہ ضرورت پڑنے پر اضافی وسائل فراہم کیے جا سکیں۔

انہوں نے کہا، ’’ڈی ایس ڈبلیو ڈی پورے منڈاناؤ میں متاثرہ خاندانوں کی ضروریات پوری کرنے کے لیے مکمل طور پر تیار ہے۔ ہم نے تمام فیلڈ دفاتر کو ہدایت دی ہے کہ وہ مقامی حکومتوں کے ساتھ قریبی رابطہ رکھیں اور انخلا مراکز میں سماجی کارکن تعینات کریں۔‘‘ انہوں نے متعلقہ دفاتر کو موبائل کمانڈ سینٹرز، موبائل کچن اور دیگر ضروری آلات و وسائل تعینات کرنے کا بھی حکم دیا۔

ادھر فلپائن کی قومی پولیس (پی این پی) نے اپنی پریس کانفرنس میں زلزلے سے متعلق تازہ ترین صورتحال سے آگاہ کرتے ہوئے کہا کہ ہنگامی حالات سے نمٹنے کے لیے مختلف اداروں کے ساتھ رابطہ اور تیاری کا عمل جاری ہے۔ فلپائن کے صدر فرڈینینڈ مارکوس نے پیر کی صبح کہا کہ دفتر برائے شہری دفاع اور قومی آفات خطرہ کمی و انتظامی کونسل سمیت تمام متعلقہ ہنگامی اداروں کو فعال کر دیا گیا ہے۔ ملکی حکام نے سارانگانی، داواؤ آکسیڈنٹل، تاوی تاوی اور سولو سمیت نو صوبوں کے ساحلی علاقوں میں رہنے والے افراد کو فوری طور پر بلند مقامات یا ساحل سے دور محفوظ علاقوں میں منتقل ہونے کی ہدایت دی ہے۔

اسی طرح انڈونیشیا میں شمالی سولاویسی، شمالی گورونتالو صوبے اور سانگھی جزائر کے بعض علاقوں میں بھی انخلا کے احکامات جاری کیے گئے ہیں اور لوگوں کو اونچی جگہوں پر منتقل ہونے کا مشورہ دیا گیا ہے۔ الجزیرہ کے مطابق جاپان، فلپائن اور انڈونیشیا کے حکام نے بھی خطرناک سمندری لہروں کے خدشے کے پیش نظر انتباہ جاری کرتے ہوئے ساحلی علاقوں کے باشندوں کو محفوظ مقامات پر جانے کی ہدایت کی ہے۔