دمشق

شام کے دارالحکومت دمشق کے وسطی علاقے میں واقع محلِ انصاف (پیلس آف جسٹس) کے قریب ایک کیفے میں ہونے والے بم دھماکے میں کم از کم پانچ افراد ہلاک اور 20 زخمی ہو گئے۔ خبر رساں ادارے الجزیرہ کے مطابق، حملے کی ذمہ داری فوری طور پر کسی بھی گروہ نے قبول نہیں کی ہے۔

دمشق کے گورنر ماہر مروان ادلبی نے بتایا کہ حملے کی تحقیقات جاری ہیں۔ انہوں نے تصدیق کی کہ کیفے میں ایک دیسی ساختہ بم (آئی ای ڈی) نصب کیا گیا تھا، جبکہ جائے وقوعہ سے فرار ہونے والے کم از کم ایک مشتبہ شخص کا تعاقب کرکے اسے گرفتار کر لیا گیا ہے۔

ادلبی نے مزید کہا کہ بعض "شرپسند عناصر" ملک کو غیر مستحکم کرنے کی کوشش کر رہے ہیں، جبکہ حکومت اقتصادی اور سکیورٹی صورتحال کو بہتر بنانے اور ملک کی تعمیر نو کے لیے کام کر رہی ہے۔ تاہم، انہوں نے اس واقعے کو دہشت گرد حملہ قرار نہیں دیا اور نہ ہی اس کا تعلق کسی کالعدم تنظیم، جیسے اسلامک اسٹیٹ آف عراق اینڈ دی لیونٹ (داعش)، سے جوڑا۔

یہ دھماکہ تاریخی حمیدیہ مارکیٹ جانے والی سڑک پر واقع ایک کیفے میں ہوا، جو شہر کے مصروف ترین علاقوں میں شمار ہوتی ہے۔ دھماکے کے مقام سے تقریباً 100 میٹر کے فاصلے پر واقع عدالت کی عمارت کو کوئی نقصان نہیں پہنچا۔ دھماکے کے بعد سکیورٹی اور امدادی اہلکاروں کو ہجوم کے درمیان کارروائیاں کرتے ہوئے دیکھا گیا۔

ماہر مروان ادلبی نے کہا کہ آنے والے چند گھنٹوں میں تمام حقائق سامنے آ جائیں گے اور جن لوگوں نے شامی عوام کا خون بہایا ہے، انہیں اس کی قیمت چکانی پڑے گی۔ تاہم، شام اس وقت تک محفوظ رہے گا جب تک ہم متحد رہیں گے، اور یہ واقعہ شامی ریاست کو متزلزل نہیں کر سکتا۔ شام کی سلامتی کے لیے متعدد اقدامات کیے جا رہے ہیں، سکیورٹی فورسز کی تعداد میں روز بروز اضافہ ہو رہا ہے، اور وزارتِ داخلہ کی کارکردگی میں نمایاں بہتری آئی ہے۔

انہوں نے الجزیرہ سے گفتگو کرتے ہوئے مزید کہا، "شامی ریاست کو مکمل استحکام حاصل کرنے میں ابھی کچھ وقت لگے گا۔ گزشتہ چند مہینوں کے دوران وزارتِ داخلہ نے قابلِ ذکر کام کیا ہے۔ اگرچہ ہم نے تباہ حالی کے ماحول سے آغاز کیا، لیکن حالات میں نمایاں بہتری آئی ہے۔ دن بہ دن وہ عناصر قانون کی گرفت میں آتے جائیں گے جنہوں نے شام کے امن و امان کو متاثر کیا ہے۔ جتنا زیادہ شام مستحکم ہوگا، اتنے ہی زیادہ ایسے عناصر سامنے آئیں گے جو اسے نقصان پہنچانے کی کوشش کریں گے

الجزیرہ کے مطابق، سابق صدر بشار الاسد کی 2024 کے اواخر میں اقتدار سے معزولی کے بعد دمشق میں متعدد حملے ہو چکے ہیں۔ موجودہ شامی صدر احمد الشرع اور ان کی باغی افواج کی جانب سے بشار الاسد کی حکومت کا خاتمہ شام میں 14 سال سے جاری خانہ جنگی کے اختتام کا سبب بنا تھا۔