دھرم شالا:مغربی ایشیا میں بڑھتی ہوئی کشیدگی کے درمیان تبت کے روحانی پیشوا دلائی لامہ نے منگل کے دن پوپ لیو چودہ کی امن کی اپیل کی حمایت کی۔

دلائی لامہ نے ایکس پر اپنے بیان میں کہا کہ تمام مذاہب رواداری اور امن کی تعلیم دیتے ہیں اور تشدد کی مذمت کرتے ہیں۔

انہوں نے کہا کہ میں پوپ لیو کی پام سنڈے کی عبادت کے دوران کی گئی امن کی مضبوط اپیل کی دل سے تائید کرتا ہوں۔ ان کی جانب سے ہتھیار ڈالنے اور تشدد چھوڑنے کی بات نے مجھے گہرائی سے متاثر کیا کیونکہ یہ تمام بڑے مذاہب کی بنیادی تعلیمات کی عکاسی کرتی ہے۔

انہوں نے مزید کہا کہ چاہے ہم عیسائیت بدھ مت اسلام ہندو مت یا یہودیت کو دیکھیں یا دنیا کے کسی بھی بڑے مذہب کو دیکھیں پیغام ایک ہی ہے۔ محبت ہمدردی رواداری اور خود نظم و ضبط۔ تشدد کی ان تعلیمات میں کوئی جگہ نہیں ہے۔ تاریخ نے بار بار ثابت کیا ہے کہ تشدد صرف مزید تشدد کو جنم دیتا ہے اور یہ کبھی بھی پائیدار امن کی بنیاد نہیں بن سکتا۔

دلائی لامہ نے کہا کہ تنازعات کا حل بات چیت کے ذریعے ہی ممکن ہے۔

انہوں نے کہا کہ پائیدار حل کے لیے ضروری ہے کہ دنیا میں جاری تمام تنازعات بشمول مشرق وسطیٰ یا روس اور یوکرین کے درمیان کشیدگی کو مکالمہ سفارت کاری اور باہمی احترام کے ذریعے حل کیا جائے۔ ہمیں یہ سمجھنا ہوگا کہ ہم سب ایک دوسرے کے بھائی اور بہن ہیں۔ میں دعا کرتا ہوں کہ جلد ہی تشدد اور تنازعات ختم ہوں۔

پام سنڈے کی تقریب کے دوران جو ہولی ویک کے آغاز کی علامت ہے پوپ لیو چودہ نے کہا کہ خدا ان لوگوں کی دعائیں قبول نہیں کرتا جو جنگ کرتے ہیں بلکہ انہیں رد کر دیتا ہے۔

پوپ کے اس بیان پر ردعمل دیتے ہوئے وائٹ ہاؤس کی ترجمان کیرولین لیوٹ نے کہا کہ ہمارا ملک تقریباً 250 سال پہلے یہودی عیسائی اقدار پر قائم ہوا تھا۔ ہم نے مشکل ترین اوقات میں صدور اور فوجی قیادت کو دعا کرتے دیکھا ہے۔ انہوں نے کہا کہ فوجی رہنماؤں یا صدر کی جانب سے عوام سے اپنے فوجیوں کے لیے دعا کرنے کی اپیل میں کوئی برائی نہیں ہے بلکہ یہ ایک قابل احترام عمل ہے۔