جنیوا (سوئٹزرلینڈ): اقوام متحدہ کی انسانی حقوق کونسل (یو این ایچ آر سی) کے 62ویں اجلاس کے موقع پر جنیوا پریس کلب میں "جبری تبدیلیٔ مذہب اور اقلیتی خواتین" کے عنوان سے ایک تقریب منعقد ہوئی، جس میں پاکستان میں مذہبی اقلیتوں، خصوصاً خواتین کی صورتحال پر شدید تشویش کا اظہار کیا گیا۔ یہ تقریب گلوبل ہیومن رائٹس ڈیفنس اور کیپ پور لا لیبرتے دے کونسیانس کے اشتراک سے منعقد ہوئی، جس میں ارکانِ پارلیمان، انسانی حقوق کے کارکنوں اور سول سوسائٹی کے نمائندوں نے شرکت کی۔

مقررین نے دعویٰ کیا کہ پاکستان میں مذہبی آزادی کی مسلسل خلاف ورزیاں ہو رہی ہیں۔ شرکا نے عالمی برادری سے مطالبہ کیا کہ وہ پاکستان پر دباؤ بڑھائے تاکہ مذہبی اقلیتوں کا تحفظ یقینی بنایا جا سکے اور جبری مذہب تبدیلی اور جبری شادیوں کا سلسلہ روکا جائے۔ تقریب میں خاص طور پر ہندو، عیسائی اور بلوچ خواتین اور بچیوں کو درپیش مسائل پر گفتگو کی گئی۔ مقررین نے کہا کہ جبری مذہب تبدیلی اور جبری شادیاں مذہبی اور نسلی بنیادوں پر ظلم و ستم کے ذرائع بن چکی ہیں، جبکہ غربت، بے وطنی اور تنازعات بھی کمزور طبقات کے لیے خطرات میں اضافہ کرتے ہیں۔

یورپی پارلیمنٹ کے رکن برٹ یان روئسن نے کہا کہ پاکستان میں مذہبی آزادی شدید دباؤ کا شکار ہے۔ ان کا الزام تھا کہ توہینِ مذہب کے قوانین کا اکثر غلط استعمال کیا جاتا ہے، جبکہ اقلیتی لڑکیوں کو جبری شادی اور اسلام قبول کرنے پر مجبور کیے جانے کی اطلاعات بھی تشویشناک ہیں۔ انہوں نے کہا، "ہم نے توہینِ مذہب کے قوانین کے غلط استعمال پر بات کی، اور خاص طور پر اس مسئلے پر گفتگو کی کہ لڑکیوں کو زبردستی شادی کرنے اور اسلام قبول کرنے پر مجبور کیا جاتا ہے۔ یہ مذہبی آزادی اور ضمیر کی آزادی کے بنیادی تصور کو نقصان پہنچاتا ہے۔"

روئسن نے زور دیا کہ عالمی برادری کو پاکستان کے ساتھ تعاون بڑھاتے ہوئے اس بات کی حوصلہ افزائی کرنی چاہیے کہ وہ مذہبی اقلیتوں کے تحفظ کو مضبوط بنائے اور ان کے حقوق کا مکمل احترام یقینی بنائے۔ فاؤنڈیشن فار دی امپروومنٹ آف لائف، کلچر اینڈ سوسائٹی کے نمائندے ایوان آرجونا پیلاڈو نے کہا کہ دنیا کے کسی بھی حصے میں جبری مذہب تبدیلی کی کوئی گنجائش نہیں ہونی چاہیے۔ انہوں نے کہا کہ ہر فرد کو یہ حق حاصل ہونا چاہیے کہ وہ اپنی مرضی سے کسی مذہب کو اختیار کرے، تبدیل کرے یا اسے ترک کرے، اور اس پر کسی قسم کا دباؤ نہ ہو۔

پیلاڈو نے حکومتوں اور سرکاری اداروں پر زور دیا کہ وہ ہر شخص کے ضمیر اور مذہبی آزادی کے حق کا تحفظ کریں اور اس بات کو یقینی بنائیں کہ تمام شہری بلا خوف و خطر اور بغیر کسی امتیاز کے اپنے حقوق استعمال کر سکیں۔ اس تقریب میں یورپی پارلیمنٹ کے رکن ٹومسلاو سوکول اور بلوچ نیشنل موومنٹ کے چیئرمین ڈاکٹر نسیم بلوچ نے بھی شرکت کی۔