تائی پے [تائیوان]: تائیوان کے اعلیٰ سکیورٹی حکام نے خبردار کیا ہے کہ چینی نیویگیشن ایپ "اے میپ" (AMap) قومی سلامتی کے لیے سنگین خطرہ بن سکتی ہے۔ ایک داخلی تحقیقات میں انکشاف ہوا کہ یہ ایپ صارفین کی حساس معلومات مسلسل جمع کرکے چین میں موجود سرورز کو بھیج رہی ہے۔

دی تائی پے ٹائمز کے مطابق، نیشنل سکیورٹی بیورو کے ڈائریکٹر جنرل تسائی منگ ین نے پارلیمان کی خارجہ امور اور قومی دفاع کمیٹی کو بتایا کہ تحقیقات میں چینی ساختہ اس ایپ سے متعلق 15 میں سے 9 سائبر سکیورٹی خطرات کی نشاندہی کی گئی۔ تحقیقات سے معلوم ہوا کہ اے میپ مبینہ طور پر صارف کے ایپ بند کرنے کے بعد بھی ذاتی معلومات اکٹھی کرتی رہتی ہے۔

جمع کی جانے والی معلومات میں رابطوں کی فہرست، کال ہسٹری، لائیو آڈیو ریکارڈنگ، ویڈیو فیڈز اور لوکیشن سے متعلق ڈیٹا شامل ہے، جسے چین میں موجود سرورز کو منتقل کیا جاتا ہے۔ تسائی منگ ین نے قانون سازوں کو بتایا کہ اگرچہ کئی بین الاقوامی ایپس صارفین کا ڈیٹا جمع کرتی ہیں، لیکن اے میپ کی پالیسیاں زیادہ تشویشناک ہیں کیونکہ ایپ اپنے صارف معاہدے میں واضح طور پر لکھتی ہے کہ معلومات تیسرے فریق کے ساتھ شیئر کی جا سکتی ہیں۔

انہوں نے مزید کہا کہ چین کے قومی سلامتی کے قوانین کے تحت چینی کمپنیوں پر لازم ہے کہ وہ حکومتی اداروں کے مطالبے پر صارفین اور کمپنیوں کا ڈیٹا فراہم کریں۔ ان کے مطابق یہ ایپ تائیوان کے لیے "نسبتاً زیادہ" سائبر اور قومی سلامتی کے خطرات رکھتی ہے۔ بیورو کی رپورٹ وزارتِ ڈیجیٹل امور کو بھیج دی گئی ہے، جو اس معاملے کا الگ سے جائزہ لے رہی ہے اور توقع ہے کہ اگلے ماہ تک اس کی تحقیقات مکمل ہو جائیں گی۔

تسائی نے واضح کیا کہ اس معاملے میں کسی عوامی اعلان یا ریگولیٹری کارروائی کا اختیار وزارتِ ڈیجیٹل امور کے پاس ہوگا۔ تائیوان پہلے ہی سائبر سکیورٹی مینجمنٹ ایکٹ کے تحت اے میپ کو ایک سکیورٹی خطرہ قرار دے چکا ہے، جس کے بعد سرکاری اداروں میں اس ایپ کے استعمال پر پابندی عائد کر دی گئی ہے۔ اسی تناظر میں، تائیوان کی مین لینڈ افیئرز کونسل (MAC) نے کہا ہے کہ جب تک تائیوانی شہریوں کی "ذاتی آزادی اور سفری سلامتی" کی ضمانت نہیں دی جاتی، تب تک چین کے لیے گروپ ٹورز کی تشہیر پر عائد پابندی نہیں ہٹائی جائے گی۔ یہ بیان چین میں حالیہ مہلک بس حادثے کے بعد سامنے آنے والی تنقید کے بعد دیا گیا۔