بیجنگ: چین نے نسلی اتحاد کو مضبوط بنانے کے مقصد سے ایک نیا قانون نافذ کیا ہے تاہم اس قانون کے بعد اویغور برادری کے مستقبل اور ان کے حقوق کے حوالے سے نئی تشویش پیدا ہوگئی ہے۔ وائس آف اویغورز کی ایک رپورٹ کے مطابق یہ قانون چین کی 56 نسلی برادریوں کے درمیان مساوات کو فروغ دینے اور امتیازی سلوک کم کرنے کے مقصد سے متعارف کرایا گیا ہے۔

نسلی اتحاد اور ترقی کے فروغ سے متعلق قانون یکم جولائی سے نافذ العمل ہوا۔ اسے مارچ میں چین کی اعلیٰ قانون ساز اسمبلی نے منظوری دی تھی۔ چینی حکومت کا کہنا ہے کہ اس قانون کا مقصد مساوات کو فروغ دینا ہے اور نسلی امتیاز کو کم کرنا ہے۔ اس کے ساتھ ہی ملک کی مختلف نسلی برادریوں میں ترقی اور باہمی تعاون کو فروغ دینا بھی قانون کے اہم مقاصد میں شامل ہے۔

چینی حکام نے اس قانون کو ایک مضبوط اور متحد ملک کی تعمیر کی جانب اہم قدم قرار دیا ہے۔ تاہم وائس آف اویغورز کے مطابق اس قانون نے یہ سوال بھی اٹھا دیا ہے کہ قومی اتحاد کو فروغ دینے کی کوششیں کہیں اقلیتی برادریوں پر اپنی ثقافتی مذہبی اور قومی شناخت کے بعض پہلو ترک کرنے کے لیے اضافی دباؤ تو نہیں ڈالیں گی۔

یہ قانون ایسے وقت میں سامنے آیا ہے جب سنکیانگ میں چین کی پالیسیوں پر کئی برس سے عالمی سطح پر تنقید ہوتی رہی ہے۔ سنکیانگ میں اویغور برادری سب سے بڑی نسلی اقلیت ہے۔

وائس آف اویغورز کی رپورٹ کے مطابق انسانی حقوق کی تنظیموں نے چینی حکام پر اویغوروں کی مذہبی سرگرمیوں ثقافتی اظہار اور سیاسی اظہار پر بڑے پیمانے پر پابندیاں عائد کرنے کے الزامات عائد کیے ہیں۔ رپورٹ میں بڑے پیمانے پر نگرانی من مانی حراست اور جبری مشقت سے متعلق خدشات کا بھی ذکر کیا گیا ہے۔

رپورٹ کے مطابق 2022 میں اقوام متحدہ کے انسانی حقوق کے دفتر نے کہا تھا کہ سنکیانگ میں انسانی حقوق کی سنگین خلاف ورزیاں ہوئی ہیں اور ان میں سے بعض جرائم انسانیت کے خلاف جرائم کے زمرے میں آسکتے ہیں۔

چین نے ان الزامات کو سختی سے مسترد کیا ہے۔ رپورٹ میں بیجنگ کے موقف کا حوالہ دیتے ہوئے کہا گیا ہے کہ چینی حکومت سنکیانگ میں اپنی پالیسیوں کو دہشت گردی علیحدگی پسندی اور مذہبی انتہا پسندی کے خلاف کارروائی قرار دیتی ہے۔ چینی حکام نے معاشی ترقی بہتر بنیادی ڈھانچے اور عوامی خدمات میں بہتری کو بھی اپنی پالیسیوں کے مثبت اثرات کے ثبوت کے طور پر پیش کیا ہے۔

نئے قانون میں اویغوروں کو کسی مخصوص ہدف کے طور پر نامزد نہیں کیا گیا ہے۔ وائس آف اویغورز کے مطابق اس کے بجائے یہ قانون نسلی اتحاد کے فروغ کے لیے ایک وسیع قانونی ڈھانچہ قائم کرتا ہے جسے بیجنگ قومی اتحاد کے طور پر بیان کرتا ہے۔

قانون مختلف نسلی برادریوں کے درمیان مزید انضمام کی حوصلہ افزائی کرتا ہے اور چینی قوم سے مشترکہ وابستگی کے احساس کو فروغ دینے پر زور دیتا ہے۔

وائس آف اویغورز کے مطابق ناقدین کو خدشہ ہے کہ حکومت کی جانب سے نسلی اتحاد کی وسیع تشریح اقلیتی برادریوں پر مشترکہ قومی شناخت اپنانے کے لیے مزید دباؤ بڑھا سکتی ہے اور اس کے نتیجے میں ان کی اپنی ثقافتی روایات متاثر ہوسکتی ہیں۔تشویش کا ایک اہم پہلو زبان بھی ہے۔ قانون معیاری چینی زبان کے استعمال کو فروغ دیتا ہے تاہم اس میں اقلیتی زبانوں کے احترام اور تحفظ کی بات بھی کی گئی ہے۔ رپورٹ کے مطابق بیجنگ کا موقف ہے کہ ایک مشترکہ زبان رابطے اور قومی اتحاد کو مضبوط بنانے میں مدد دے سکتی ہے جبکہ مختلف نسلی برادریاں اپنی ثقافتی روایات کو برقرار رکھ سکتی ہیں۔

تاہم ناقدین نے تعلیم اور عوامی زندگی میں اقلیتی زبانوں پر بڑھتے ہوئے دباؤ کی جانب اشارہ کیا ہے۔ اویغوروں کے لیے زبان ان کی تاریخ ادب اور شناخت سے گہرا تعلق رکھتی ہے۔وائس آف اویغورز کا کہنا ہے کہ ناقدین کو خدشہ ہے کہ اگر اسکولوں اور سرکاری اداروں میں اویغور زبان کے استعمال کی گنجائش کم ہوتی گئی تو روزمرہ زندگی میں بھی اس کا کردار بتدریج محدود ہوسکتا ہے۔

مذہب بھی تشویش کا ایک بڑا پہلو ہے۔ زیادہ تر اویغور مسلمان ہیں اور رپورٹ کے مطابق سنکیانگ میں مذہبی سرگرمیوں پر حکومت کی جانب سے سخت کنٹرول برقرار ہے۔ وائس آف اویغورز کے حوالے سے انسانی حقوق کی تنظیموں نے مذہبی تعلیم عبادت اور مذہبی اظہار کی دیگر صورتوں پر پابندیوں کی نشاندہی کی ہے۔رپورٹ میں کہا گیا ہے کہ ناقدین کو خدشہ ہے کہ اگر حکام نسلی اتحاد کے لیے خطرہ سمجھی جانے والی سرگرمیوں کی وسیع تشریح کرتے ہیں تو نیا قانون ان دباؤ میں مزید اضافے کا باعث بن سکتا ہے۔

وائس آف اویغورز کے مطابق ناقدین کو یہ بھی خدشہ ہے کہ پُرامن ثقافتی یا مذہبی سرگرمیوں پر بھی زیادہ نگرانی ہوسکتی ہے اگر حکام انہیں قومی اتحاد کے حکومتی تصور سے متصادم سمجھیں۔

رپورٹ کے مطابق ان خدشات کا دائرہ چین کی سرحدوں سے باہر تک بھی پھیل سکتا ہے۔ اویغور کارکن اور دیگر ممالک میں مقیم اویغور برادری کے افراد کئی برس سے سنکیانگ کی صورت حال کے بارے میں کھل کر اظہار خیال کرتے رہے ہیں۔ وائس آف اویغورز کا کہنا ہے کہ انسانی حقوق کے گروپوں کو خدشہ ہے کہ نیا قانونی نظام بیرون ملک مقیم ان افراد پر بھی دباؤ بڑھا سکتا ہے جو چین کی نسلی پالیسیوں پر تنقید کرتے ہیں۔

رپورٹ کے مطابق اس صورتحال نے اس قانون کو محض چین کی داخلی پالیسی کا معاملہ نہیں رہنے دیا بلکہ اسے عالمی سطح پر انسانی حقوق کی بحث کا بھی حصہ بنا دیا ہے۔دوسری جانب بیجنگ کا موقف ہے کہ نیا قانون مساوات استحکام اور ترقی سے متعلق ہے۔ وائس آف اویغورز کے مطابق چینی حکام کا کہنا ہے کہ نسلی اقلیتوں کو مساوی حقوق حاصل ہیں اور ان کی زبانوں روایات اور ثقافتی طریقوں کا تحفظ کیا جاتا ہے۔ چینی حکومت کا یہ بھی کہنا ہے کہ ملک کے طویل مدتی استحکام اور خوشحالی کے لیے قومی اتحاد کو مضبوط بنانا ضروری ہے۔

اس معاملے میں بنیادی اختلاف صرف اس بات پر نہیں ہے کہ چین کو نسلی اتحاد کو فروغ دینا چاہیے یا نہیں بلکہ اصل سوال یہ ہے کہ اس اتحاد کا مفہوم کیا ہونا چاہیے۔وائس آف اویغورز کی رپورٹ میں مشترکہ قومی شناخت اور ثقافتی تنوع کے درمیان فرق کو نمایاں کیا گیا ہے۔ ایک ایسا تصور جس میں مشترکہ قومی شناخت کے ساتھ ثقافتی تنوع بھی برقرار رہے اور دوسری جانب ایسا طریقہ جس کے نتیجے میں اقلیتوں کو بتدریج اکثریتی ثقافت میں ضم ہونے پر مجبور ہونا پڑے۔

ناقدین کو خدشہ ہے کہ چین کا موجودہ طریقہ کار انضمام کو بڑھاوا دے سکتا ہے اور اقلیتی برادریوں سے بتدریج غالب ثقافت کو اپنانے کی توقع کی جاسکتی ہے۔رپورٹ کے مطابق اب اصل امتحان اس بات کا ہوگا کہ نئے قانون کو کس طرح نافذ کیا جاتا ہے۔

وائس آف اویغورز کا کہنا ہے کہ قانون کی زبان سے ہی یہ طے نہیں ہوسکتا کہ اویغوروں پر اس کے کیا اثرات مرتب ہوں گے۔ بہت کچھ اس بات پر منحصر ہوگا کہ مقامی حکام اس کی دفعات کی تشریح اور ان پر عمل درآمد کس طرح کرتے ہیں اور آیا لوگوں کو سزا کے خوف کے بغیر اپنی ثقافتی مذہبی اور لسانی شناخت کا اظہار کرنے کا موقع ملتا ہے یا نہیں۔

اویغور برادری کے لیے یہ معاملہ محض ایک نئے قانون کے نفاذ تک محدود نہیں ہے۔ اس کا تعلق اس بنیادی سوال سے ہے کہ آیا اویغور اپنی زبان محفوظ رکھ سکتے ہیں۔ اپنے مذہب پر عمل کرسکتے ہیں۔ اپنی روایات برقرار رکھ سکتے ہیں اور اپنی ثقافتی شناخت آئندہ نسلوں تک منتقل کرسکتے ہیں۔

بیجنگ کا کہنا ہے کہ نیا قانون چین کی مختلف نسلی برادریوں کو ایک دوسرے کے مزید قریب لائے گا۔ تاہم وائس آف اویغورز کے مطابق عالمی برادری اس بات پر گہری نظر رکھے گی کہ آیا یہ قانون ثقافتی تنوع کے تحفظ کا ذریعہ بنتا ہے یا اس کی قیمت پر نسلی اتحاد کو فروغ دیا جاتا ہے۔