ہانگ کانگ: چین کی معیشت کی رفتار اپریل تا جون سہ ماہی کے دوران سالانہ بنیاد پر کم ہو کر 4.3 فیصد رہ گئی، جو گزشتہ تین برس سے زائد عرصے کی کم ترین شرح ہے۔ حکومت نے بدھ کے روز جاری اعداد و شمار میں یہ معلومات دی ہیں۔ سرکاری اعداد و شمار ماہرین کی پیش گوئیوں سے کم رہے اور جنوری تا مارچ سہ ماہی میں ریکارڈ کیے گئے 5 فیصد کی مضبوط شرحِ نمو سے بھی خاصے نیچے رہے۔ یہ صورتِ حال اس وقت سامنے آئی ہے جب مصنوعی ذہانت (اے آئی) کے شعبے میں تیزی اور چینی برقی گاڑیوں (الیکٹرک وہیکلز) کی عالمی طلب کے باعث برآمدات میں نمایاں اضافہ دیکھا گیا۔

چین نے ایران جنگ کے وسیع معاشی اثرات سے بڑی حد تک خود کو محفوظ رکھا، اگرچہ توانائی کی بڑھتی ہوئی قیمتوں نے عالمی افراطِ زر میں اضافہ کیا۔ کسٹمز کے اعداد و شمار کے مطابق سال کی پہلی ششماہی میں برآمدات گزشتہ سال کے مقابلے میں 17.6 فیصد بڑھیں، جبکہ صرف جون میں ان میں 27 فیصد اضافہ ریکارڈ کیا گیا۔ تاہم ملک میں گھریلو اخراجات اور سرمایہ کاری کی رفتار سست رہی، جس کے باعث برآمدی صنعت سے معیشت کو مطلوبہ سہارا نہیں مل سکا۔ چین کی معیشت کووڈ-19 وبا کے دوران لاک ڈاؤن کے بعد سے اب تک مکمل طور پر بحال نہیں ہو سکی ہے۔

آئی این جی بینک کے گریٹر چائنا کے چیف اکنامسٹ لن سانگ نے کہا کہ 2022 کی آخری سہ ماہی، جو لاک ڈاؤن سے شدید متاثر ہوئی تھی، کے بعد یہ کسی بھی سہ ماہی کی سب سے سست معاشی ترقی ہے۔ بعض ماہرین معاشیات کا کہنا ہے کہ چین کی معیشت میں عدم توازن بڑھ رہا ہے، کیونکہ حکومت اور نجی سرمایہ کار مصنوعی ذہانت، کمپیوٹر چپس اور روبوٹکس جیسی جدید ٹیکنالوجیز میں بڑے پیمانے پر سرمایہ لگا رہے ہیں، جبکہ کم قدر والی مینوفیکچرنگ اور روزگار پیدا کرنے والے خدماتی شعبے نسبتاً نظر انداز ہو رہے ہیں۔

حکومتی سرپرستی کی بدولت برقی گاڑیوں، کمپیوٹر چپس اور دیگر الیکٹرانک مصنوعات کی برآمدات میں نمایاں اضافہ ہوا ہے، کیونکہ چینی قیادت نے جدید ٹیکنالوجی کی ترقی کو اولین ترجیح قرار دیا ہے۔ گزشتہ سال چین نے عالمی تجارت میں ریکارڈ 1.2 کھرب امریکی ڈالر کا تجارتی سرپلس حاصل کیا، جس پر کئی ممالک نے تجارتی عدم توازن اور حکومتی سبسڈی کے حوالے سے اعتراضات کیے۔ ان کا کہنا ہے کہ سرکاری امداد کے باعث ضرورت سے زیادہ تیار شدہ اشیا بیرونِ ملک برآمد کی جا رہی ہیں۔

دیگر کئی ممالک کی طرح چین میں بھی مصنوعی ذہانت اور روبوٹکس کے فروغ نے یہ خدشات پیدا کیے ہیں کہ آیا مستقبل میں کاروباری ادارے معیشت کی پائیدار ترقی کے لیے کافی روزگار فراہم کر سکیں گے یا نہیں۔ چینی خاندانوں نے جائیداد کے شعبے میں طویل بحران، ملازمتوں اور اجرتوں سے متعلق غیر یقینی صورتحال کے باعث بڑی خریداریوں میں کمی کر دی ہے، جس سے اندرونی طلب کمزور پڑ گئی ہے۔ کارنیل یونیورسٹی کے معاشیات اور تجارتی پالیسی کے پروفیسر ایشور پرساد نے کہا کہ چونکہ چین اب بھی مجموعی معاشی ترقی کے لیے برآمدات پر انحصار کر رہا ہے، اس لیے اس کا معاشی ماڈل مزید غیر متوازن ہوتا جا رہا ہے۔

ان کے مطابق صارفین کا اعتماد کمزور ہونے کے باعث گھریلو طلب میں نمایاں اضافہ کرنا آسان نہیں ہوگا۔ چین کے قومی ادارۂ شماریات کے نائب سربراہ ماؤ شینگ یونگ نے صحافیوں سے کہا کہ عالمی حالات میں بڑھتی ہوئی غیر یقینی صورتحال کے پیش نظر ملک میں مضبوط رسد اور کمزور طلب کے درمیان عدم توازن اب بھی شدید ہے۔ انہوں نے کہا کہ چین اعلیٰ معیار کی معاشی ترقی کے لیے ہائی ٹیک مینوفیکچرنگ پر توجہ مرکوز رکھے گا، مضبوط گھریلو منڈی کی تعمیر کرے گا اور روزگار کے استحکام کے لیے ضروری معاونت فراہم کرے گا۔ بی این پی پریباس سیکیورٹیز (چین) میں ملٹی ایسیٹ انویسٹمنٹس کی سربراہ وی لی کے مطابق چین کی معیشت اس وقت ایک اہم عبوری مرحلے سے گزر رہی ہے۔