چینگ دو۔ چین نے مذہبی وابستگی کی جانچ کا دائرہ سرکاری اداروں اور تعلیمی مراکز تک بڑھا دیا ہے۔ دی ایپوک ٹائمز کی ایک رپورٹ کے مطابق چین کے شہر چینگ دو کے ایک سرکاری اسپتال نے اپنے ملازمین کو ان کے مذہبی عقائد کے بارے میں معلومات فراہم کرنے کا حکم دیا ہے جبکہ تعلیمی حکام طلبہ کے مذہبی پس منظر اور ان کے والدین سے متعلق معلومات بھی جمع کر رہے ہیں۔
دی ایپوک ٹائمز کے مطابق افشا ہونے والی اندرونی دستاویزات اور اس طریقہ کار سے واقف افراد نے بتایا کہ ایک سرکاری اسپتال کے مستقل ملازمین ٹھیکے پر کام کرنے والے کارکنوں اور عارضی ملازمین کو اپنے مذہبی عقائد سے متعلق معلومات فراہم کرنا ضروری قرار دیا گیا تھا۔
اسپتال نے ایک اندرونی اطلاع جاری کی جس میں کہا گیا کہ وہ ملازمین کے مذہبی عقائد کے بارے میں جامع جائزہ لے رہا ہے تاکہ نظریاتی نسلی اور مذہبی امور کی باقاعدہ جانچ سے متعلق تقاضوں پر عمل درآمد کیا جاسکے۔
اطلاع میں اسپتال کو ہدایت دی گئی کہ اس عمل میں کسی فرد کو بھی شامل ہونے سے نہ چھوڑا جائے۔
دی ایپوک ٹائمز کے مطابق تمام ملازمین کو مطلوبہ معلومات فراہم کرنا ضروری تھا اور انہیں متعلقہ معلومات چھپانے یا حذف کرنے سے منع کیا گیا تھا۔ ایسے ملازمین جن کا کسی مذہب سے تعلق نہیں تھا انہیں بھی اندراج کرانے اور ’’کوئی مذہبی عقیدہ نہیں‘‘ کا انتخاب کرنے کی ہدایت دی گئی۔
اطلاع میں مزید کہا گیا کہ چینی کمیونسٹ پارٹی کے ارکان کو کسی مذہب پر عمل کرنے کی اجازت نہیں ہے۔ مذہبی وابستگی رکھنے والے ملازمین کو یہ معاملہ اپنی پارٹی شاخ کے علم میں لانے کی ہدایت کی گئی۔
رپورٹ میں کہا گیا ہے کہ اسی طرح کا طریقہ کار تعلیمی نظام میں بھی اختیار کیا جا رہا ہے۔
سیچوان کی ایک جامعہ کے انتظامی ملازم نے جس کی شناخت چن کے نام سے کی گئی ہے دی ایپوک ٹائمز کو بتایا کہ تعلیمی ادارے طلبہ کے خاندان کے افراد کے مذہبی عقائد کی بھی جانچ کر رہے ہیں اور یہ معلومات اعلیٰ حکام کو رپورٹ کرنے کے لیے جمع کی جا رہی ہیں۔
چینگ دو کے تعلیمی حکام کے ایک ملازم نے بھی دی ایپوک ٹائمز کو بتایا کہ تعلیمی نظام میں ہر سال نئے طلبہ کے اسکول میں داخلے سے قبل ان کے خاندانوں کی پس منظر کی جانچ کی جاتی ہے جس میں مذہبی وابستگی سے متعلق معلومات بھی شامل ہوتی ہیں۔
دی ایپوک ٹائمز کے مطابق یہ اقدامات چینی کمیونسٹ پارٹی کے اس وسیع تر طریقہ کار کی عکاسی کرتے ہیں جس کے تحت مذہب کو سیاسی اور نظریاتی نظم و نسق کا معاملہ سمجھا جاتا ہے۔
رپورٹ میں کہا گیا کہ چینی کمیونسٹ پارٹی مذہبی امور پر پارٹی کی مضبوط قیادت کی ضرورت پر بارہا زور دیتی رہی ہے جبکہ ’’مذہب کی چینی خصوصیات کے مطابق تشکیل‘‘ کی پالیسی کو بھی فروغ دیا جا رہا ہے۔ اس پالیسی کے تحت مذہبی گروہوں سے توقع کی جاتی ہے کہ وہ پارٹی کی سیاسی اور ثقافتی ترجیحات کے مطابق خود کو ڈھالیں۔
دی ایپوک ٹائمز کے مطابق 2025 میں چینی رہنما شی جن پنگ نے ایک بار پھر تمام سطحوں پر پارٹی حکام سے مذہبی امور پر اپنی قیادت مضبوط کرنے اور مذہبی کام کو پارٹی کی مجموعی قیادت کے نظام میں شامل کرنے پر زور دیا تھا۔
