نئی دہلی: ہندوستانی چاول میں بین الاقوامی خریداروں کی دلچسپی تیزی سے بڑھ رہی ہے۔ تین روزہ صنعتی تقریب سے قبل جاری کیے گئے خریداروں کے اعداد و شمار کے مطابق بھارت انٹرنیشنل رائس کانفرنس (BIRC) 2026 کے لیے 138 ممالک کے 3,317 خریدار رجسٹریشن کرا چکے ہیں۔ یہ رجسٹریشن 30 اگست تک کی گئی ہیں، جبکہ BIRC 2026 کا انعقاد 23 سے 25 اکتوبر تک نئی دہلی کے بھارت منڈپم میں ہوگا۔ اس سال کانفرنس کے لیے رجسٹریشن کی وسیع جغرافیائی نمائندگی ایک نمایاں خصوصیت بن کر سامنے آئی ہے۔ پڑوسی ممالک کے علاوہ افریقہ، خلیجی خطے اور جنوب مشرقی ایشیا سے بھی بڑی تعداد میں خریدار شرکت کر رہے ہیں۔

ملک کے لحاظ سے بنگلہ دیش 336 خریداروں کے ساتھ سب سے آگے ہے۔ اس کے بعد بینن کے 179 اور نائیجیریا کے 177 خریدار رجسٹر ہوئے ہیں۔ متحدہ عرب امارات سے 145، جبکہ نیپال اور فلپائن سے 137، 137 خریداروں نے رجسٹریشن کرائی ہے۔ ایتھوپیا سے 127، سعودی عرب سے 125، جبکہ انڈونیشیا اور جنوبی افریقہ سے 109، 109 خریدار رجسٹر ہوئے ہیں۔ سینیگال، عراق، صومالیہ، گنی، یمن، کوٹ دی آئیوری، نائجر، آسٹریلیا، مالی، ملائیشیا، گھانا، انگولا اور کینیا سمیت کئی دیگر ترقی یافتہ اور ابھرتی ہوئی منڈیوں سے بھی رجسٹریشن موصول ہوئی ہے۔

انڈین رائس ایکسپورٹرز فیڈریشن (IREF) کے نائب صدر دیو گرگ نے کہا کہ اس ردعمل سے ظاہر ہوتا ہے کہ دنیا بھر کی منڈیاں ہندوستان کی جانب دیکھ رہی ہیں۔ تاہم اب توجہ خریداروں کی شرکت کو حقیقی کاروباری مواقع میں تبدیل کرنے پر ہے۔ گرگ نے کہا، ’’BIRC 2026 کے لیے ردعمل واضح طور پر ظاہر کرتا ہے کہ دنیا بھر کی منڈیوں میں ہندوستان کے لیے کتنے وسیع مواقع موجود ہیں۔ 138 ممالک کے 3,317 خریدار پہلے ہی رجسٹر ہو چکے ہیں۔ ہماری توجہ اس بین الاقوامی شرکت کو ہندوستانی چاول برآمد کنندگان کے لیے نئی تجارتی راہوں، نئے خریداروں اور طویل مدتی کاروباری تعلقات میں تبدیل کرنے پر ہے۔‘‘

انہوں نے کہا کہ BIRC 2026 کو ایک ایسے کاروباری پلیٹ فارم کے طور پر تیار کیا جا رہا ہے، جہاں بین الاقوامی خریداروں اور ہندوستانی برآمد کنندگان کے درمیان براہ راست اور ہدف پر مبنی رابطے کو آسان بنایا جائے گا۔ گرگ نے کہا، ’’ہماری ایپ کے ذریعے B2B میچ میکنگ کی سہولت خریداروں، برآمد کنندگان، رائس مل مالکان اور سروس فراہم کرنے والوں کو چاول کی اقسام، مقدار، مصنوعات کی خصوصیات اور مارکیٹ کی ضروریات کے مطابق مخصوص ملاقاتیں طے کرنے میں مدد دے گی۔ مقصد عام میل جول سے آگے بڑھ کر حقیقی تجارتی کاروباری روابط قائم کرنا ہے۔‘‘ افریقہ خاص طور پر ایک اہم مواقع والے خطے کے طور پر ابھرا ہے۔

بینن، نائیجیریا اور ایتھوپیا کے علاوہ جنوبی افریقہ، سینیگال، کوٹ دی آئیوری، نائجر، گھانا، انگولا اور کینیا سے بھی نمایاں تعداد میں خریدار رجسٹر ہوئے ہیں۔ خلیجی خطہ بھی ایک اہم مارکیٹ اور تجارتی مرکز ہے، جہاں متحدہ عرب امارات اور سعودی عرب سب سے آگے ہیں۔ فلپائن، انڈونیشیا اور ملائیشیا سے ہونے والی رجسٹریشن جنوب مشرقی ایشیا کے خریداروں کے ساتھ مزید کاروباری روابط کے امکانات کی نشاندہی کرتی ہے۔ منتظمین کے مطابق خریداروں کی اس جغرافیائی تنوع سے ہندوستانی برآمد کنندگان کو اپنے صارفین کا دائرہ وسیع کرنے، نئی منڈیوں کی نشاندہی کرنے اور کسی ایک مارکیٹ پر ضرورت سے زیادہ انحصار کم کرنے میں مدد مل سکتی ہے۔ BIRC 2026 گزشتہ کانفرنس میں شروع کیے گئے

مارکیٹ ڈائیورسفیکیشن پروگرام کو آگے بڑھا رہی ہے، جس کا مقصد تقریباً 1.8 لاکھ کروڑ روپے کی ممکنہ چاول درآمدی منڈیوں تک رسائی حاصل کرنا تھا۔ تازہ رجسٹریشن اس موقع کو براہ راست اور ملک کے لحاظ سے مخصوص کاروباری روابط کے ذریعے آگے بڑھانے کے لیے وسیع پلیٹ فارم فراہم کرتی ہیں۔ کانفرنس میں 2027 کے لیے عالمی چاول مارکیٹ کے امکانات کا بھی جائزہ لیا جائے گا۔ نو کاروباری سیشنز میں فصلوں کے سروے اور قیمتوں کی پیش گوئی، نئی منڈیوں کے مواقع، دستاویزات، انشورنس اور قرض، شپنگ، معیار اور سرٹیفیکیشن، پالیسی اور تجارتی مراعات، پائیداری، چاول کی ملنگ اور ویلیو ایڈڈ مصنوعات سمیت مختلف موضوعات پر غور ہوگا۔ BIRC 2026 میں ’رائس سیکٹر وژن 2047‘ کا

آغاز، ’ٹاپ فائیو انوویشنز ریویل‘ اور ’انوویشن شوکیس‘ کے علاوہ ’ایمبیسڈرز میٹ‘ بھی منعقد ہوگا۔ نو ’ایکسپیرینس زونز‘ میں چاول کے پورے شعبے کے مختلف پہلوؤں کو پیش کیا جائے گا، جن میں کسان برادریاں، حیاتیاتی تنوع، عالمی کھانے، تجارتی راستے، ویلیو ایڈڈ مصنوعات اور مستقبل میں بیجوں کی جدت شامل ہیں۔ کانفرنس میں بین الاقوامی خریداروں، ہندوستانی برآمد کنندگان، رائس مل مالکان، پالیسی سازوں، ٹیکنالوجی فراہم کرنے والوں اور چاول کی پوری ویلیو چین سے وابستہ دیگر افراد کے شریک ہونے کی توقع ہے۔ 25 اکتوبر کو اس تقریب کا اختتام عوامی شرکت والے ’رائس فیسٹیول‘ کے ساتھ ہوگا۔

اس میں آئی ٹی سی ہوٹلز کی جانب سے کھانے پکانے کی سرگرمیاں، ’ٹاپ فائیو گلوبل رائس ورائٹیز‘، ’’بریانی ری اِن وینٹڈ‘‘ ماسٹر شیف مقابلہ، انفلوئنسر کُک آف، چاول سے متعلق کوئز، ثقافتی پروگرام اور چاول کا کاروبار شروع کرنے کے موضوع پر ایک سیشن شامل ہوگا۔ 138 ممالک سے خریداروں کی تعداد 3,300 سے تجاوز کر جانے کے ساتھ BIRC 2026 کا مقصد اس غیر معمولی جغرافیائی شرکت کو ہندوستانی چاول کی صنعت کے لیے نئی منڈیوں، تجارتی راستوں اور طویل مدتی برآمدی تعلقات میں تبدیل کرنا ہے۔