ساؤ پالو (برازیل): برازیل کے صدر لوئیز اناسیو لولا دا سلوا نے ثقافت کو اقتصادی ترقی، روزگار کے فروغ اور قومی شناخت کے استحکام کا اہم ذریعہ قرار دیتے ہوئے ملک کے پہلے وفاقی عوامی آڈیو ویژول اسٹریمنگ پلیٹ فارم Tela Brasil کا افتتاح کیا، جو مکمل طور پر برازیلی تخلیقات اور پروڈکشنز کے لیے مختص ہے۔

برازیلین میڈیا ادارے برازیل 247 کے مطابق ریو ڈی جنیرو میں منعقدہ افتتاحی تقریب سے خطاب کرتے ہوئے صدر لولا دا سلوا نے کہا کہ ثقافتی سرگرمیاں نہ صرف بڑے پیمانے پر معاشی مواقع پیدا کرتی ہیں بلکہ مختلف شعبوں سے وابستہ ہزاروں پیشہ ور افراد کے لیے روزگار کے دروازے بھی کھولتی ہیں۔

انہوں نے کہا کہ ثقافت میں سرمایہ کاری صرف اقتصادی ترقی کا ذریعہ نہیں بلکہ یہ شہریوں میں قومی وابستگی، فخر اور شناخت کے احساس کو بھی مضبوط بناتی ہے۔ صدر لولا نے اس بات پر زور دیا کہ ثقافتی شعبے کی معاشی اہمیت کو اکثر کم سمجھا جاتا ہے، حالانکہ اس کے اثرات بہت وسیع ہوتے ہیں۔ ان کے مطابق ہر فلم، ٹی وی پروگرام یا آڈیو ویژول منصوبہ سیکڑوں افراد کے لیے روزگار کے مواقع پیدا کرتا ہے۔

انہوں نے مزید کہا کہ ثقافت قومی شناخت کی تشکیل میں بنیادی کردار ادا کرتی ہے اور شہریوں کو اپنے ملک اور اس کی اقدار سے گہرا تعلق محسوس کراتی ہے۔ ٹیلا برازیل کو برازیل کی وزارتِ ثقافت اور فیڈرل یونیورسٹی آف الاگواس کے اشتراک سے تیار کیا گیا ہے اور یہ مکمل طور پر برازیلی ٹیکنالوجی پر مبنی پلیٹ فارم ہے۔

اس منصوبے کا مقصد فلموں، دستاویزی پروگراموں، ٹیلی ویژن پروڈکشنز اور دیگر مقامی تخلیقات کو ڈیجیٹل پلیٹ فارم کے ذریعے عوام تک وسیع پیمانے پر پہنچانا ہے۔ سرکاری حکام اس پلیٹ فارم کو اکثر "برازیلین نیٹ فلکس" قرار دیتے ہیں۔ توقع کی جا رہی ہے کہ اس سے آزاد فلم سازوں اور پروڈیوسرز کو زیادہ مواقع ملیں گے، کیونکہ ان کی بہت سی تخلیقات فلمی میلوں اور خصوصی نمائشوں میں تو پذیرائی حاصل کرتی ہیں لیکن عام ناظرین تک نہیں پہنچ پاتیں۔

حکام کے مطابق یہ پلیٹ فارم برازیل کی آڈیو ویژول صنعت کو مضبوط بنانے، مقامی مواد کی رسائی بڑھانے اور تخلیقی شعبے میں نئے مواقع پیدا کرنے میں اہم کردار ادا کرے گا۔ ٹیلا برازیل کے ذخیرۂ مواد میں 19 ایسی فلمیں اور پروڈکشنز بھی شامل ہیں جو اکیڈمی ایوارڈز (آسکر) کے لیے برازیل کی نمائندگی کر چکی ہیں۔

اس کے علاوہ بچوں اور نوجوانوں کے لیے پروگرام، میوزیکل تخلیقات، تاریخی دستاویزی فلمیں اور عالمی سطح پر سراہے گئے کئی عنوانات بھی پلیٹ فارم کا حصہ ہیں۔ یہ انتخاب برازیل کی ثقافتی تنوع کی عکاسی کرتا ہے، جس میں سیاہ فام اور مقامی باشندوں کے سنیما، خواتین ہدایت کاروں کی تخلیقات اور یادداشت، پائیداری، موسمیاتی انصاف اور برازیلی ثقافتی شناخت جیسے موضوعات پر مبنی کام شامل ہیں۔