ڈھاکہ:بنگلہ دیش کے دارالحکومت ڈھاکہ میں نیشنل پریس کلب کے باہر لوگوں نے انسانی زنجیر بنا کر ہندو اقلیت کے خلاف مبینہ مظالم کے خلاف احتجاج کیا۔ مظاہرین نے بنگلہ دیش میں ہندو برادری پر بڑھتے ہوئے تشدد پر سخت تشویش ظاہر کی۔مظاہرین نے کہا کہ نئی منتخب حکومت کی جانب سے اقلیتوں کے خلاف تشدد روکنے کے لیے مؤثر اقدامات نہیں کیے جا رہے ہیں جس کی وجہ سے عوام میں مایوسی بڑھ رہی ہے۔

بنگلہ دیش جاتیہ ہندو مہاجوتے کے جنرل سکریٹری مرتیونجے کمار رائے نے کہا کہ ہم یہاں ہندو اقلیت کے خلاف ہونے والے مظالم کے خلاف آواز اٹھانے کے لیے جمع ہوئے ہیں۔ انہوں نے کہا کہ قتل لوٹ مار اور زیادتی کے واقعات مسلسل سامنے آ رہے ہیں۔ ان کا کہنا تھا کہ بی این پی حکومت کو اقتدار میں آئے تقریباً 1 ماہ ہو چکا ہے لیکن ہندوؤں کے خلاف مظالم اب بھی جاری ہیں۔

2024 میں شیخ حسینہ کی حکومت کے خاتمے کے بعد ہندوؤں اور دیگر اقلیتوں کے خلاف تشدد کے واقعات میں اضافہ دیکھا گیا ہے۔ انسانی حقوق کی تنظیم بنگلہ دیش جاتیہ ہندو مہاجوتے کے مطابق گزشتہ ہفتے دو ہندو افراد الگ الگ واقعات میں قتل کیے گئے جبکہ ایک مندر میں دیسی بم پھٹنے سے ایک پجاری سمیت 4 افراد زخمی ہو گئے۔

تنظیم کے مطابق 6 مارچ کو بوگرا اور 7 مارچ کو کاکس بازار میں دو افراد کو قتل کیا گیا جبکہ 8 مارچ کو کمِلا شہر میں پوجا کے دوران ایک ہندو مندر پر دیسی بم پھینکے گئے جس سے علاقے میں شدید خوف و ہراس پھیل گیا۔بیان میں کہا گیا کہ 7 مارچ کو شام تقریباً 6 بج کر 30 منٹ پر کمِلا شہر کے ساؤتھ ٹھاکرپارہ علاقے میں شنی دیو کی پوجا کے دوران شدت پسند عناصر نے مندر میں دیسی بم دھماکہ کیا جس سے مندر کے پجاری اور 4 دیگر افراد شدید زخمی ہو گئے۔

بنگلہ دیش کے اخبار دی ڈیلی اسٹار کی رپورٹ کے مطابق کالی گچھ تلا کالی مندر میں ہونے والے حملے کی تصدیق کی گئی ہے۔ کوتوالی ماڈل پولیس اسٹیشن کے انچارج توحیدال انور نے بتایا کہ پجاری کیشوب چکرورتی سمیت 2 افراد کو اسپتال میں علاج دیا گیا۔

مندر کمیٹی کے صدر ساجول کمار چندا کے مطابق دھماکہ اس وقت ہوا جب مذہبی تقریب جاری تھی۔ سی سی ٹی وی فوٹیج میں ایک نقاب پوش شخص کو دھماکے سے کچھ دیر پہلے مندر میں داخل ہوتے اور ایک بیگ چھوڑ کر جاتے دیکھا گیا۔زخمی پجاری کیشوب چکرورتی نے بتایا کہ دھماکے کے بعد ان کے سامنے ایک سفید چیز گری اور بعد میں لوگوں نے بتایا کہ یہ بم تھا۔ عینی شاہدین کے مطابق دھماکے کے بعد علاقے میں خوف و ہراس پھیل گیا اور حملہ آوروں نے بعد میں قریب ہی ایک بدھ مندر اور ایک نجی دفتر کے نزدیک مزید دو دیسی بم بھی پھینکے۔

گزشتہ ماہ ہونے والے عام انتخابات میں بنگلہ دیش نیشنل پارٹی اور اس کے اتحادیوں نے پارلیمنٹ میں دو تہائی اکثریت حاصل کی جس کے بعد طارق رحمان ملک کے وزیر اعظم بن گئے۔