ڈھاکہ: بنگلہ دیش کے رنگپور شہر میں ایک ریٹائرڈ ہندو اسکول ٹیچر ان کی اہلیہ بیٹی اور 12 سالہ بیٹے سمیت ایک ہی خاندان کے 4 افراد اپنے بند گھر میں مشتبہ حالات میں مردہ پائے گئے۔ مقامی ذرائع ابلاغ کے مطابق واقعے کے بعد پولیس نے جامع تحقیقات شروع کردی ہیں۔ہفتے کی رات تقریباً 11 بج کر 30 منٹ پر شہر کے داس پارہ مچھواپارہ علاقے میں واقع ایک مکان سے چاروں افراد کی لاشیں برآمد کی گئیں۔ رنگپور میٹروپولیٹن کوتوالی تھانے کے انچارج افسر ناظم القادر نے بتایا کہ پولیس نے گھر کا تالا توڑ کر اندر داخل ہونے کے بعد لاشیں برآمد کیں۔

مرنے والوں کی شناخت رنگپور ضلعی اسکول کے ریٹائرڈ استاد 65 سالہ گنپتی چکربرتی ان کی 50 سالہ اہلیہ پریتی لتا چکربرتی ان کی 23 سالہ بیٹی آگمی چکربرتی پرارتھی اور 12 سالہ بیٹے پریام چکربرتی کے طور پر ہوئی ہے۔مقامی لوگوں کے مطابق گنپتی گزشتہ سال 31 دسمبر کو رنگپور ضلعی اسکول سے ریٹائر ہوئے تھے۔ ان کی بیٹی آگمی نے اسی سال انگریزی میں ماسٹرز کی ڈگری مکمل کی تھی جبکہ ان کا بیٹا پریام پانچویں جماعت کا طالب علم تھا۔

خاندان سے رابطہ منقطع ہونے کے بعد رشتہ داروں میں تشویش پیدا ہوئی۔ پریتی لتا کی چھوٹی بہن پوجا چکربرتی نے بتایا کہ انہوں نے آخری مرتبہ جمعرات کی دوپہر اپنی بہن سے بات کی تھی۔ جمعرات کی رات سے خاندان کے چاروں افراد کے موبائل فون بند بتائے گئے۔پوجا نے بتایا کہ ہفتے کی رات موبائل فون بند ملنے کے بعد وہ داس پارہ پہنچیں۔ گھر کا مرکزی دروازہ بند تھا اور اندر کی تمام روشنیاں بھی بند تھیں۔ بعد میں پولیس وہاں پہنچی اور تالا توڑ کر گھر میں داخل ہوئی جہاں چاروں افراد کی لاشیں ملیں۔

انہوں نے واقعے پر صدمے کا اظہار کرتے ہوئے کہا کہ خاندان یہ سمجھنے سے قاصر ہے کہ ان چاروں کو کس نے اور کیوں نشانہ بنایا۔ ان کے مطابق ان کے بہنوئی ایک انتہائی اچھے انسان تھے اور ان کی کسی سے دشمنی نہیں تھی۔ خاندان نے داس پارہ میں نیا مکان تعمیر کیا تھا اور وہیں رہائش پذیر تھا۔گنپتی کی بھتیجی سوما چکربرتی نے بھی بتایا کہ ان کی اپنے چچا سے آخری مرتبہ جمعرات کی دوپہر بات ہوئی تھی۔ ہفتے کی رات ہلاکتوں کی خبر ملنے کے بعد وہ فوری طور پر مکان پہنچیں جہاں انہوں نے اپنے چچا چچی بہن اور بھائی کی لاشیں دیکھیں۔ ان کے مطابق گنپتی کی کسی سے دشمنی نہیں تھی اور اسکول سے ریٹائرمنٹ کے بعد وہ ہومیوپیتھک معالج کے طور پر کام کر رہے تھے۔

پولیس اور فرانزک ماہرین نے واقعے کی تحقیقات شروع کردی ہیں۔ کوتوالی تھانے کے انچارج ناظم القادر کے مطابق پولیس کے علاوہ جرائم کی تفتیش کرنے والے محکمے اور خفیہ تفتیشی شاخ نے بھی تحقیقات شروع کردی ہیں۔رنگپور میٹروپولیٹن جرائم تفتیشی محکمے کے انچارج سُبیر چودھری نے بتایا کہ گھر کے اندر مختلف مقامات سے لاشیں برآمد ہوئی ہیں۔ ان کے مطابق ماں اور بیٹی کی لاشیں سیڑھیوں سے جبکہ گنپتی کی لاش چھت سے برآمد ہوئی۔ ان کے بیٹے کی لاش ایک بستر کے نیچے ملی۔پولیس اور فرانزک ماہرین جائے وقوعہ سے شواہد جمع کر رہے ہیں۔ ہلاکتوں کا درست وقت اور واقعے کے پس پردہ محرکات سمیت پورا معاملہ ابھی تفتیش کے مرحلے میں ہے۔