ڈھاکہ : بنگلہ دیش میں محمد یونس کی قیادت میں عبوری حکومت نے جمعہ کے روز ایک ہندو شخص کو توہین کے الزام میں تشدد کے بعد قتل کیے جانے کی شدید مذمت کی۔ یہ واقعہ ایک طالب علم رہنما کی موت کے بعد ہونے والے تازہ پرتشدد مظاہروں کے دوران پیش آیا۔ عبوری حکومت نے واضح کیا کہ نئے بنگلہ دیش میں اس طرح کے تشدد کی کوئی جگہ نہیں اور اس عزم کا اظہار کیا کہ اس جرم میں ملوث کسی فرد کو نہیں بخشا جائے گا۔

عبوری حکومت نے شہریوں سے اپیل کی کہ وہ ہر قسم کے تشدد کے خلاف چوکس رہیں۔ حکومت کے مطابق یہ کارروائیاں چند الگ تھلگ دہشت گرد گروہوں کی جانب سے کی جا رہی ہیں۔ بیان میں کہا گیا کہ تشدد خوف آتش زنی اور تباہی کی تمام شکلوں کی غیر مشروط طور پر مذمت کی جاتی ہے۔

حکومتی بیان میں کہا گیا کہ ہم تشدد خوف آگ لگانے اور توڑ پھوڑ کی تمام سرگرمیوں کی سخت اور غیر مبہم الفاظ میں مذمت کرتے ہیں۔ بیان میں مزید کہا گیا کہ بنگلہ دیش اس وقت ایک نازک مرحلے پر تاریخی جمہوری تبدیلی سے گزر رہا ہے اور انتشار پھیلانے کی کسی بھی کوشش کو امن کی راہ میں رکاوٹ نہیں بننے دیا جائے گا۔

چیف ایڈوائزر محمد یونس نے کہا کہ ملک کے ثقافتی مشیر مصطفیٰ سرور فاروقی نے واقعے کی جگہ کا دورہ کیا ہے اور بتایا ہے کہ چھایانوت بھون پر حملے اور لوٹ مار میں ملوث افراد کی شناخت سی سی ٹی وی فوٹیج کے ذریعے کی جا رہی ہے۔ انہوں نے میڈیا سے گفتگو میں یقین دہانی کرائی کہ ذمہ داروں کو قانون کے کٹہرے میں لایا جائے گا۔

محمد یونس نے ایک طویل پیغام میں کہا کہ فاروقی نے دھان منڈی میں متاثرہ عمارت کا معائنہ کیا صورتحال کا جائزہ لیا اور یقین دہانی کرائی کہ حکومتی مالی مدد سے فوری مرمت کی جائے گی تاکہ سرگرمیاں دوبارہ شروع ہو سکیں۔ انہوں نے بتایا کہ پولیس اور بارڈر گارڈ بنگلہ دیش کی موجودگی کے ساتھ سخت سکیورٹی تعینات کر دی گئی ہے۔

انہوں نے اس واقعے کو قومی سوگ کے دوران جمہوریت کو پٹڑی سے اتارنے کی سازش قرار دیتے ہوئے کہا کہ سی سی ٹی وی کیمروں کی فوٹیج کا جائزہ لے کر سب کو قانون کے دائرے میں لانے کا عمل جاری ہے۔

یہ لنچنگ ڈھاکہ میں اس وقت ہونے والی بدامنی کے دوران ہوئی جب طالب علم رہنما شریف عثمان ہادی کی موت کے بعد تشدد پھیل گیا تھا۔ ہادی نے سابق حکومت کے خاتمے میں اہم کردار ادا کیا تھا اور وہ شیخ حسینہ مخالف اور بھارت مخالف مؤقف کے لیے جانے جاتے تھے۔بیان میں کہا گیا کہ ہادی کی قربانی کا احترام ضبط ذمہ داری اور نفرت و تشدد کی مستقل نفی سے ہی ممکن ہے۔

یونس انتظامیہ نے ڈیلی اسٹار پرتھوم الو اور نیو ایج کے صحافیوں سے بھی یکجہتی کا اظہار کیا جن کے دفاتر اور عملے پر حالیہ بدامنی کے دوران حملے کیے گئے۔بیان میں کہا گیا کہ ڈیلی اسٹار پرتھوم الو اور نیو ایج کے صحافیوں سے ہم کہنا چاہتے ہیں کہ ہم آپ کے ساتھ ہیں۔ ہم آپ کو درپیش خوف اور تشدد پر دل سے معذرت خواہ ہیں۔ قوم نے دہشت گردی کے باوجود آپ کی جرات اور برداشت کو دیکھا ہے۔ صحافیوں پر حملہ سچ پر حملہ ہے۔ ہم مکمل انصاف کی یقین دہانی کراتے ہیں۔

بنگلہ دیش کے طے شدہ عام انتخابات سے محض دو ماہ قبل ملک ایک بار پھر بحران کا شکار ہو گیا جب شدت پسند طلبہ تنظیم انقلاب منچا کے ترجمان اور جولائی دو ہزار چوبیس کی بغاوت کے اہم کردار شریف عثمان ہادی جمعرات کو زخموں کی تاب نہ لاتے ہوئے چل بسے۔ انہیں بارہ دسمبر کو نامعلوم حملہ آوروں کی فائرنگ میں گولیاں لگی تھیں۔ان کی موت کے فوراً بعد غصے کی لہر دوڑ گئی اور ہزاروں حامی انصاف اور ذمہ داروں کی گرفتاری کے مطالبے کے ساتھ سڑکوں پر نکل آئے۔

احتجاج جلد ہی افراتفری میں بدل گیا جس میں آتش زنی اور ان اداروں پر حملے شامل تھے جنہیں سابق انتظامیہ یا غیر ملکی مفادات سے وابستہ سمجھا جاتا تھا۔ ڈھاکہ میں ہجوم نے ملک کے سرکردہ اخبارات پرتھوم الو اور دی ڈیلی اسٹار کے دفاتر کو آگ لگا دی جس کے باعث درجنوں صحافی عمارتوں کے اندر پھنس گئے۔مظاہرین نے بنگلہ دیش کے بانی شیخ مجیب الرحمن کی رہائش گاہ اور کئی ثقافتی مراکز کو بھی نشانہ بنایا۔ بدامنی نے واضح طور پر بھارت مخالف رخ اختیار کر لیا جہاں مظاہرین نے الزام لگایا کہ ہادی کے قاتل بھارت فرار ہو گئے ہیں اور ڈھاکہ میں بھارتی ہائی کمیشن بند کرنے کا مطالبہ کیا گیا۔

جنازے کا وقت تبدیل ہوا

 چیف ایڈوائزر محمد یونس کی قیادت میں عبوری حکومت نے عثمان ہادی کی نماز جنازہ کے شیڈول میں تبدیلی کا اعلان کیا اور اس موقع سے قبل سکیورٹی ہدایات جاری کیں۔ حکومت بنگلہ دیش کے چیف ایڈوائزر کی جانب سے ایکس پر شیئر کی گئی پوسٹ میں کہا گیا کہ شہید عثمان ہادی کی نماز جنازہ کا وقت تبدیل کر دیا گیا ہے اور یہ نماز 19 دسمبر 2025 کو دوپہر 2 بجے ڈھاکہ میں جاتیہ سنگسد بھون کے ساؤتھ پلازہ میں ادا کی جائے گی۔ اس سے قبل اعلان کیا گیا تھا کہ نماز جنازہ ڈھائی بجے ہوگی۔شرکا سے اپیل کی گئی کہ وہ بیگ یا بھاری سامان ساتھ نہ لائیں جبکہ حکام نے واضح کیا کہ پارلیمنٹ ہاؤس اور اس کے اطراف میں ڈرون اڑانا مکمل طور پر ممنوع ہے۔

امریکہ نے کی جاری ایڈوائزری

 دریں اثنا ڈھاکہ میں امریکی سفارت خانے نے شریف عثمان ہادی کی میت کی آمد اور جنازے سے متعلق میڈیا رپورٹس کا حوالہ دیتے ہوئے امریکی شہریوں کے لیے سکیورٹی ایڈوائزری جاری کی۔ ایکس پر جاری بیان میں کہا گیا کہ میڈیا رپورٹس کے مطابق نوجوان رہنما شریف عثمان ہادی کی میت آج جمعہ انیس دسمبر کو شام چھ بج کر پانچ منٹ پر ڈھاکہ پہنچے گی۔ بیان میں مزید کہا گیا کہ ان کی نماز جنازہ ہفتہ بیس دسمبر کو ظہر کے بعد تقریباً چودہ سو گھنٹے کے قریب منک میا ایونیو قومی پارلیمنٹ کی عمارت کے سامنے ادا کیے جانے کی توقع ہے۔

ایڈوائزری میں خبردار کیا گیا کہ علاقے میں اور پورے ڈھاکہ میں انتہائی شدید ٹریفک متوقع ہے۔ امریکی شہریوں کو ہدایت دی گئی کہ وہ ہوشیار رہیں کیونکہ پرامن اجتماعات بھی تصادم میں بدل سکتے ہیں اور تشدد میں اضافہ ہو سکتا ہے۔ اسی لیے مظاہروں اور بڑے اجتماعات سے دور رہنے کا مشورہ دیا گیا۔