جنیوا: اقوام متحدہ کے انسانی حقوق کے ماہرین نے بلوچستان سے تعلق رکھنے والے عمران علی کی جبری گمشدگی تشدد اور ماورائے عدالت ہلاکت پر پاکستان کے ریکارڈ پر شدید تشویش کا اظہار کیا ہے۔ ماہرین نے پاکستان سے مطالبہ کیا ہے کہ ان کی حراست اور موت کے معاملے کی فوری آزادانہ اور غیر جانب دارانہ تحقیقات کرائی جائیں۔اقوام متحدہ کے دفتر برائے انسانی حقوق کی جانب سے جاری ایک بیان کے مطابق عمران علی کو 27 اگست 2025 کو پاکستان کے محکمہ انسداد دہشت گردی کے تقریباً 20 اہلکاروں نے ان کے گھر سے مبینہ طور پر اغوا کیا تھا۔ انہیں ایک نامعلوم مقام پر لے جایا گیا جبکہ ان کے اہل خانہ کو ان کے بارے میں سرکاری طور پر کوئی معلومات فراہم نہیں کی گئیں۔

اقوام متحدہ کے ماہرین نے بتایا کہ عمران علی کے ساتھ پہلے حراست میں لیے گئے بعض افراد نے رہائی کے بعد تصدیق کی کہ انہیں حراست میں رکھا گیا تھا اور مبینہ طور پر کئی دن تک تشدد کا نشانہ بنایا گیا۔یہ معاملہ 6 اگست 2026 کو پاکستان کے کمیشن آف انکوائری آن انفورسڈ ڈسپیئرنسز کے سامنے ہونے والی سماعت کے دوران دوبارہ سامنے آیا۔ ایک پولیس افسر نے مبینہ طور پر کمیشن کو بتایا کہ عمران علی مئی 2026 میں ایک مبینہ پولیس مقابلے کے دوران مارے گئے تھے۔

رپورٹ کے مطابق حکام کو ان کی لاش کی شناخت میں تقریباً ایک ماہ لگ گیا اور ان کا دعویٰ تھا کہ لاش کو محفوظ رکھنا ممکن نہیں تھا۔ بعد ازاں جون میں لاش کو دفن کردیا گیا۔اس پیش رفت کی اطلاع ملنے کے بعد عمران علی کے اہل خانہ سول اسپتال کوئٹہ پہنچے جہاں انہوں نے مبینہ طور پر اسپتال کے ریکارڈ میں موجود تصاویر کی مدد سے ان کی شناخت کی۔

اقوام متحدہ کے ماہرین نے عمران علی کے ساتھ اسپتال لائی جانے والی 6 دیگر لاشوں سے متعلق طریقہ کار پر بھی تشویش کا اظہار کیا۔ ان کے مطابق اسپتال کے عملے یا پولیس نے ان لاشوں کو دفن کیے جانے سے قبل نہ مناسب طور پر دستاویز کیا اور نہ ہی ان کے بارے میں کوئی اطلاع درج کی گئی۔ ان لاشوں کی شناخت بھی نہیں کی گئی اور نہ ہی ان کے رشتہ داروں کو اطلاع دی گئی۔ماہرین نے کہا کہ بلوچستان میں جبری گمشدگیوں کے مسلسل واقعات کے تناظر میں اس بات پر بھی شدید تشویش پائی جاتی ہے کہ دیگر لاشیں بھی جبری طور پر لاپتہ کیے گئے افراد کی ہوسکتی ہیں۔

اقوام متحدہ کے ماہرین نے عمران علی کی باقیات کا آزادانہ فرانزک معائنہ کرانے ان کی مکمل شناخت یقینی بنانے اور انہیں باعزت طریقے سے اہل خانہ کے حوالے کرنے کا مطالبہ کیا۔ انہوں نے کہا کہ تحقیقات کے ذریعے ان کی موت کی وجہ اور حالات کا تعین کیا جانا چاہیے اور اس کے ذمہ دار افراد کی نشاندہی کرکے انہیں قانون کے مطابق جواب دہ بنایا جانا چاہیے۔