پیرس: بلوچ وائس ایسوسی ایشن (بی وی اے) نے اقوام متحدہ کی انسانی حقوق کونسل کے 63 ویں اجلاس سے قبل 17 صفحات پر مشتمل ایک تفصیلی رپورٹ جمع کرائی ہے جس میں پاکستان کے صوبہ بلوچستان میں انسانی حقوق کی صورتحال پر تشویش ظاہر کرتے ہوئے عالمی برادری سے فوری مداخلت کا مطالبہ کیا گیا ہے۔"بلوچستان میں تنازع: بحران، انسانی حقوق، جبری گمشدگیوں اور اختلاف رائے کو دبانے سے متعلق تفصیلی رپورٹ" کے عنوان سے پیش کی گئی اس رپورٹ میں دعویٰ کیا گیا ہے کہ بلوچستان کا تنازع بنیادی طور پر ایک سیاسی مسئلہ ہے نہ کہ صرف سکیورٹی کا معاملہ۔

رپورٹ کے مطابق کئی دہائیوں سے جاری سیاسی محرومی، معاشی استحصال، اختلاف رائے کو دبانے اور انسانی حقوق کی مبینہ خلاف ورزیوں نے 1948 سے اب تک بار بار شورش کو جنم دیا ہے۔رپورٹ میں کہا گیا ہے کہ رقبے کے لحاظ سے پاکستان کا سب سے بڑا صوبہ بلوچستان، جہاں تقریباً 15 ملین افراد آباد ہیں، تیل، گیس، کوئلہ، تانبہ اور سونے جیسے قدرتی وسائل سے مالا مال ہے لیکن اس کے باوجود یہ ملک کے کم ترقی یافتہ علاقوں میں شمار ہوتا ہے۔ رپورٹ میں دعویٰ کیا گیا ہے کہ مقامی آبادی کو ان وسائل سے حاصل ہونے والے فوائد نہیں مل سکے۔

رپورٹ میں سابق ریاست قلات کے 1948 میں پاکستان میں انضمام کو تنازع کی بنیاد قرار دیتے ہوئے اسے "زبردستی الحاق" سے تعبیر کیا گیا ہے۔ اس میں شورش کے پانچ ادوار کا ذکر کرتے ہوئے کہا گیا ہے کہ 2004 میں شروع ہونے والا موجودہ مرحلہ سیاسی خودمختاری، وسائل پر اختیار اور جبری گمشدگیوں کے الزامات کے باعث مزید شدت اختیار کر گیا، جبکہ 2024 اور 2025 میں صورتحال مزید بگڑنے کا دعویٰ کیا گیا ہے۔رپورٹ میں بلوچ تنظیموں اور انسانی حقوق کے اداروں کے مطالبات کا بھی ذکر کیا گیا ہے جن میں جبری گمشدگیوں اور ماورائے عدالت ہلاکتوں کا خاتمہ، صوبائی خودمختاری، سیاسی نمائندگی، مقامی وسائل پر اختیار اور ثقافتی شناخت کے تحفظ جیسے مطالبات شامل ہیں۔

رپورٹ کا بڑا حصہ جبری گمشدگیوں سے متعلق ہے، جنہیں بلوچستان کا سب سے سنگین انسانی مسئلہ قرار دیا گیا ہے۔اس میں پاکستان کے کمیشن آف انکوائری آن انفورسڈ ڈس اپیئرنسز کے اعداد و شمار کا حوالہ دیتے ہوئے کہا گیا ہے کہ 2011 سے اب تک ملک بھر میں 10,000 سے زائد جبری گمشدگیوں کے مقدمات درج ہوئے جن میں 2,752کیس بلوچستان سے تعلق رکھتے ہیں۔

ساتھ ہی رپورٹ میں کہا گیا ہے کہ بلوچ انسانی حقوق کی تنظیموں کے مطابق اصل تعداد اس سے کہیں زیادہ ہے اور ان کا دعویٰ ہے کہ 2001 سے اب تک تقریباً 18,000 افراد لاپتا ہوئے ہیں۔بی وی اے کے مطابق اس نے 2025 کے پہلے چھ ماہ کے دوران 885 جبری گمشدگیوں اور 121 ہلاکتوں کو دستاویزی شکل دی جبکہ صرف جنوری 2025 میں بلوچستان کے 14 اضلاع سے 109 جبری گمشدگیوں کے واقعات ریکارڈ کیے گئے۔رپورٹ میں مبینہ "قتل کرو اور لاش پھینک دو" پالیسی کا بھی ذکر کیا گیا ہے جس کے تحت پہلے لاپتا ہونے والے افراد کی لاشیں بعد میں مختلف علاقوں سے ملنے کا دعویٰ کیا گیا ہے۔رپورٹ میں ہیومن رائٹس کمیشن آف پاکستان کی 2025 کی فیکٹ فائنڈنگ رپورٹ کا حوالہ دیتے ہوئے کہا گیا ہے کہ اس ادارے نے بلوچستان میں انسانی حقوق کی صورتحال کو "انتہائی تشویشناک" قرار دیا تھا۔ رپورٹ کے مطابق کمیشن نے جبری گمشدگیوں، شہری آزادیوں میں کمی، صوبائی خودمختاری کے کمزور ہونے اور احتساب کے فقدان پر بھی تشویش ظاہر کی تھی۔

بی وی اے نے اپنی رپورٹ میں متعدد ڈاکٹروں، طلبہ، صحافیوں اور سیاسی کارکنوں کے نام بھی شامل کیے ہیں جن کے بارے میں تنظیم کا دعویٰ ہے کہ وہ جبری گمشدگی کا شکار ہوئے۔ رپورٹ میں واضح کیا گیا ہے کہ یہ فہرست مکمل نہیں بلکہ نمائندہ نوعیت کی ہے۔رپورٹ میں بلوچ یکجہتی کمیٹی کو ایک پرامن شہری حقوق کی تحریک قرار دیتے ہوئے اس کی سرگرمیوں کا بھی ذکر کیا گیا ہے۔ اس میں مہرنگ بلوچ، صبغت اللہ شاہ، بیبرگ زہری اور سمی دین بلوچ سمیت کئی رہنماؤں کے خلاف کارروائیوں کا حوالہ دیا گیا ہے۔رپورٹ کے مطابق جون 2026 میں مہرنگ بلوچ اور صبغت اللہ شاہ کو عمر قید کی سزا سنائی گئی، جس پر بی وی اے کے مطابق ایمنسٹی انٹرنیشنل، اقوام متحدہ کے ماہرین اور غیر نمائندہ اقوام اور عوام کی تنظیم نے تنقید کی۔

رپورٹ میں صحافت کی آزادی پر بھی تشویش ظاہر کرتے ہوئے دعویٰ کیا گیا ہے کہ بلوچستان میں صحافیوں کو دھمکیوں، سنسرشپ، تشدد اور قانونی کارروائیوں کا سامنا ہے۔ اس میں فریڈم نیٹ ورک اور رپورٹرز ود آؤٹ بارڈرز کی رپورٹس کا حوالہ بھی دیا گیا ہے۔اسی طرح پرامن احتجاج کے حق پر پابندیوں کا الزام لگاتے ہوئے کہا گیا ہے کہ جبری گمشدگیوں اور چین پاکستان اقتصادی راہداری سے متعلق احتجاجی مظاہروں میں شریک افراد کے خلاف بھی طاقت کے استعمال اور قانونی کارروائیوں کی شکایات سامنے آئی ہیں۔

بی وی اے نے کہا کہ وہ اقوام متحدہ کی انسانی حقوق کونسل میں نمائشوں، ضمنی اجلاسوں اور تحریری یادداشتوں کے ذریعے مسلسل بلوچستان کا معاملہ اٹھاتی رہی ہے اور مہرنگ بلوچ کو عمر قید کی سزا کو سیاسی اختلاف رائے دبانے کی کوشش قرار دیتی ہے۔رپورٹ کے اختتام پر بلوچ وائس ایسوسی ایشن نے عالمی برادری سے مطالبہ کیا ہے کہ بلوچستان کے تنازع کو صرف سکیورٹی نہیں بلکہ سیاسی مسئلہ سمجھا جائے۔ تنظیم نے اقوام متحدہ سے بلوچستان میں حقائق جاننے کے لیے خصوصی مشن بھیجنے، جبری گمشدگیوں اور ماورائے عدالت ہلاکتوں کی تحقیقات کرانے، ذمہ داروں کا احتساب کرنے، پاکستان اور بلوچ نمائندوں کے درمیان بین الاقوامی نگرانی میں مذاکرات کرانے اور بلوچ عوام کے حق خود ارادیت کے لیے اقوام متحدہ کی نگرانی میں ریفرنڈم یا اسی نوعیت کے کسی طریقہ کار کی حمایت کرنے کی اپیل کی ہے۔

رپورٹ میں کہا گیا ہے کہ اس کی تیاری میں ہیومن رائٹس کمیشن آف پاکستان، ایمنسٹی انٹرنیشنل، اقوام متحدہ کے ہائی کمشنر برائے انسانی حقوق کے دفتر، ہیومن رائٹس واچ، ورکنگ گروپ آن انفورسڈ اور ان وولنٹری ڈس اپیئرنسز، رپورٹرز ود آؤٹ بارڈرز، پاکستان پریس فاؤنڈیشن، انٹرنیشنل کرائسز گروپ اور دیگر بین الاقوامی اداروں کی دستاویزات سے بھی استفادہ کیا گیا ہے۔