واشنگٹن، ڈی سی :امریکی صدر ڈونلڈ ٹرمپ نے مطالبہ کیا ہے کہ افغانستان بگرام ایئربیس کا کنٹرول واشنگٹن کو واپس کرے، اور طالبان حکومت کو خبردار کیا کہ اگر انہوں نے اس مطالبے پر عمل نہ کیا تو ’’بری چیزیں ہونے والی ہیں۔ٹرمپ نے ٹروتھ سوشل پر ایک پوسٹ میں کہا:"اگر افغانستان بگرام ایئربیس ان لوگوں کو واپس نہیں دیتا جنہوں نے اسے بنایا، یعنی ریاستہائے متحدہ امریکا، تو بری چیزیں ہونے والی ہیں!۔بگرام ایئربیس فی الحال طالبان حکومت کے کنٹرول میں ہے، جب سے 2021 میں امریکی افواج افغانستان سے نکل گئی تھیں۔ٹرمپ بار بار اس بات کی نشاندہی کر چکے ہیں کہ وہ اس ایئربیس کا کنٹرول اپنے پاس رکھتے، کیونکہ یہ افغانستان اور چین کی سرحد کے قریب ایک اسٹریٹجک اہمیت کا حامل اڈہ ہے۔

چند دن قبل لندن کے دورے کے دوران ٹرمپ نے کہا تھا کہ امریکا اس ایئربیس کا کنٹرول دوبارہ حاصل کرنے کی کوشش کر رہا ہے۔ انہوں نے برطانوی وزیراعظم کیئر سٹارمر کے ساتھ ایک مشترکہ پریس کانفرنس میں کہا:"ہم افغانستان چھوڑنے والے تھے، لیکن ہم طاقت اور وقار کے ساتھ نکلنے والے تھے، اور ہم بگرام، جو دنیا کے سب سے بڑے فضائی اڈوں میں سے ایک ہے، اپنے پاس رکھنے والے تھے۔ ہم نے اسے انہیں کچھ بھی لیے بغیر دے دیا۔ ویسے ہم اسے واپس لینے کی کوشش کر رہے ہیں۔ٹولو نیوزکے مطابق امریکی کانگریس کے کئی ارکان نے ٹرمپ کے موقف کی حمایت کی ہے اور بگرام ایئربیس دوبارہ حاصل کرنے کی کوشش کو اسٹریٹجک اور درست قرار دیا ہے۔

دوسری جانب چین نے ٹرمپ کے بیانات کو مسترد کر دیا۔ چینی وزارتِ خارجہ کے ترجمان لن جیان نے کہا:"چین افغانستان کی آزادی، خودمختاری اور علاقائی سالمیت کا احترام کرتا ہے۔ افغانستان کا مستقبل اس کے عوام کے ہاتھ میں ہونا چاہیے۔ ہم تمام فریقین سے اپیل کرتے ہیں کہ وہ علاقائی امن اور استحکام میں تعمیری کردار ادا کریں۔" انہوں نے مزید کہا کہ خطے میں محاذ آرائی کو ہوا دینا عوامی حمایت سے محروم ہے۔اسلامی امارت نے تاحال سرکاری طور پر کوئی ردعمل نہیں دیا۔ تاہم اس سے قبل افغانستان کے وزیرِ خارجہ امیر خان متقی نے کہا تھا:"افغان سرزمین کا ایک انچ بھی غیر ملکی فوجی موجودگی کے لیے قابلِ قبول نہیں۔ یہ پیغام صدر ٹرمپ اور دیگر ممالک تک پہنچنا چاہیے۔ تعلقات صرف سیاسی اور اقتصادی ہوں گے۔

وزارتِ خارجہ کے دوسرے سیاسی شعبے کے سربراہ ذاکر جلالی نے بھی اسی موقف کا اعادہ کیا:"افغان عوام نے تاریخ میں کبھی بھی فوجی موجودگی کو قبول نہیں کیا۔ اس بات کو دوحہ معاہدے میں مکمل طور پر مسترد کر دیا گیا تھا، لیکن دیگر اقسام کی شمولیت کے دروازے کھلے ہیں۔یہ بیانات ایسے وقت میں سامنے آئے ہیں جب روس نے حالیہ مہینوں میں بار بار خبردار کیا ہے کہ مغربی طاقتیں، بالخصوص مریکا، افغانستان میں دوبارہ فوجی موجودگی قائم کرنے کی کوشش کر رہی ہیں۔؎