تہران : اسرائیلی میڈیا نے رپورٹ کیا ہے کہ ایران کے سپریم لیڈر آیت اللہ علی خامنہ ای کے بیٹے مجتبیٰ خامنہ ای کو ان کا جانشین منتخب کر لیا گیا ہے اور وہ سپریم لیڈر کا عہدہ سنبھالیں گے۔ اسرائیلی حکام نے Ynet News کو بتایا کہ مجلس خبرگان آئندہ چند گھنٹوں میں مجتبیٰ خامنہ ای کے نام کا باضابطہ اعلان کر سکتی ہے تاہم ایران کے سرکاری میڈیا کی جانب سے اس پیش رفت کی کوئی آزادانہ تصدیق سامنے نہیں آئی ہے۔

اس سے قبل The New York Times نے رپورٹ کیا تھا کہ 56 سالہ مجتبیٰ خامنہ ای سپریم لیڈر کے منصب کے لیے نمایاں امیدوار کے طور پر ابھرے ہیں۔ مجتبیٰ خامنہ ای آیت اللہ علی خامنہ ای کے دوسرے بڑے بیٹے ہیں۔ اخبار کے مطابق ایران کی مجلس خبرگان نے مبینہ طور پر پاسداران انقلاب کے شدید دباؤ میں انہیں ملک کا نیا سربراہ منتخب کیا۔

رپورٹس میں کہا گیا ہے کہ مجتبیٰ خامنہ ای اپنے والد کے دفتر کے انتظام میں اہم کردار ادا کرتے رہے اور ان کے پاس پاسداران انقلاب اور قدس فورس کی اعلیٰ قیادت تک رسائی اور قریبی روابط موجود تھے۔ اسرائیلی میڈیا نے انہیں اپنے والد سے زیادہ سخت گیر قرار دیتے ہوئے ایران میں مظاہرین کے خلاف سخت کریک ڈاؤن کے پیچھے اہم کردار کا حامل بتایا ہے۔

نومبر 2019 میں امریکی محکمہ خزانہ نے مجتبیٰ خامنہ ای پر پابندیاں عائد کی تھیں۔ انہیں اس بنیاد پر نامزد کیا گیا تھا کہ وہ باضابطہ طور پر کسی سرکاری عہدے پر منتخب یا مقرر نہ ہونے کے باوجود سپریم لیڈر کی نمائندگی کر رہے تھے۔ امریکی محکمہ خزانہ کا کہنا تھا کہ اس وقت کے سپریم لیڈر نے اپنی قیادت کی بعض ذمہ داریاں مجتبیٰ خامنہ ای کو سونپ رکھی تھیں اور وہ پاسداران انقلاب قدس فورس اور بسیج کے ساتھ مل کر علاقائی پالیسیوں اور داخلی اقدامات کو آگے بڑھا رہے تھے۔

یہ بھی اطلاعات سامنے آئی تھیں کہ مجتبیٰ خامنہ ای کو لندن میں پرتعیش جائیدادوں تک رسائی حاصل ہے اور برطانیہ سوئٹزرلینڈ اور لختن شٹائن میں ان کے اکاؤنٹس موجود ہیں۔

دوسری جانب امریکی سینٹرل کمانڈ کے سربراہ ایڈمرل بریڈ کوپر نے ایران کو خبردار کرتے ہوئے کہا ہے کہ ان کی شدید عسکری کارروائیوں میں کوئی کمی نہیں آئے گی اور ان کے مقاصد حاصل کیے جائیں گے۔ ان کا کہنا تھا کہ ان کے فوجی اہداف واضح ہیں اور افواج پوری پیشہ ورانہ مہارت کے ساتھ مشن پر عمل کر رہی ہیں۔

مشرق وسطیٰ میں کشیدگی چوتھے روز میں داخل ہو چکی ہے۔ امریکا اور اسرائیل کی جانب سے ایران پر حملوں میں سپریم لیڈر آیت اللہ علی خامنہ ای سمیت اہم شخصیات کی ہلاکت کے بعد تہران نے جوابی کارروائیاں کرتے ہوئے خطے میں امریکی فوجی اڈوں اور اسرائیلی اہداف کو نشانہ بنایا ہے۔