کینبرا

آسٹریلیا کی وزیر خارجہ پینی وونگ نے اعلان کیا ہے کہ وہ کواڈ ممالک کے وزرائے خارجہ کے اجلاس میں شرکت کے لیے ہندوستان کا دورہ کریں گی۔ اس دوران وہ ہندوستان اور آسٹریلیا کے درمیان ہونے والے وزرائے خارجہ کے فریم ورک مذاکرات میں بھی حصہ لیں گی۔

آسٹریلوی وزیر خارجہ نے کہا کہ موجودہ عالمی غیر یقینی صورتحال کے دور میں کواڈ ایک نہایت اہم شراکت داری کے طور پر ابھرا ہے۔ ان کے مطابق آسٹریلیا، ہندوستان، جاپان اور امریکہ مل کر ہند۔بحرالکاہل خطے کو پُرامن، مستحکم اور خوشحال بنانے کی سمت میں کام کر رہے ہیں۔

انہوں نے کہا کہ کواڈ ممالک کے درمیان سمندری سلامتی، اہم معدنیات کی فراہمی، بنیادی ڈھانچے کی ترقی اور قدرتی آفات کے دوران امدادی سرگرمیوں جیسے شعبوں میں عملی تعاون مسلسل بڑھ رہا ہے۔ہندوستان کے دورے کے دوران پینی وونگ، ہندوستان کے وزیر خارجہ ایس جے شنکر کے ساتھ 17ویں آسٹریلیا۔ہندوستان وزرائے خارجہ فریم ورک مذاکرات میں شرکت کریں گی۔ انہوں نے کہا کہ ہندوستان اور آسٹریلیا کی شراکت داری پہلے سے کہیں زیادہ اہم ہو چکی ہے۔

آسٹریلیا کی وزارت خارجہ کی جانب سے جاری بیان میں کہا گیا ہے کہ دونوں ممالک تجارت و سرمایہ کاری، دفاع، سمندری سلامتی، موسمیاتی تبدیلی، توانائی کی منتقلی، تزویراتی ٹیکنالوجی، تعلیم اور ہنر مندی کے فروغ جیسے شعبوں میں مسلسل تعاون بڑھا رہے ہیں۔

بیان میں یہ بھی کہا گیا کہ دونوں ممالک کے درمیان سماجی اور ثقافتی تعلقات اس شراکت داری کی مضبوط بنیاد ہیں۔ آسٹریلیا کی انتھونی البانیز حکومت مستقبل میں بھی ہندوستان کے ساتھ اپنے تعلقات کو مزید مضبوط بنانے کے لیے پُرعزم ہے۔وزارت خارجہ کے مطابق کواڈ وزرائے خارجہ کا اجلاس 26 مئی 2026 کو نئی دہلی میں منعقد ہوگا۔ اس میں آسٹریلیا کی وزیر خارجہ پینی وونگ کے علاوہ جاپان کے وزیر خارجہ توشی میتسو موتیگی اور امریکہ کے وزیر خارجہ مارکو روبیو بھی شریک ہوں گے۔

یہ اجلاس ہندوستان کے وزیر خارجہ ایس جے شنکر کی دعوت پر منعقد کیا جا رہا ہے۔ کواڈ ممالک کے وزرائے خارجہ ہند۔بحرالکاہل خطے میں تعاون کو مزید وسعت دینے اور مشترکہ تزویراتی امور پر تبادلہ خیال کریں گے۔

اجلاس کے دوران گزشتہ سال واشنگٹن میں ہونے والی بات چیت کی پیش رفت کا جائزہ بھی لیا جائے گا۔ اس کے ساتھ ساتھ کواڈ کی مختلف منصوبہ بندیوں اور اقدامات پر بھی غور و خوض کیا جائے گا۔ذرائع کے مطابق اس اجلاس میں ہند۔بحرالکاہل خطے کی سلامتی، سمندری سرگرمیوں، سپلائی چین، تکنیکی تعاون اور علاقائی استحکام جیسے موضوعات پر خصوصی توجہ دی جائے گی۔

تجزیہ کاروں کا ماننا ہے کہ چین کے بڑھتے ہوئے اثر و رسوخ اور مغربی بحرالکاہل کے خطے میں بڑھتے ہوئے جغرافیائی و سیاسی چیلنجز کے درمیان کواڈ ممالک کا یہ اجلاس غیر معمولی اہمیت کا حامل ہے۔ ہندوستان، امریکہ، جاپان اور آسٹریلیا طویل عرصے سے ایک آزاد اور کھلے ہند۔بحرالکاہل خطے کی حمایت کرتے رہے ہیں۔سفارتی ماہرین کے مطابق نئی دہلی میں ہونے والا یہ اجلاس مستقبل میں کواڈ تعاون کو نئی سمت دے سکتا ہے اور علاقائی سلامتی کے ڈھانچے کو مزید مضبوط بنانے میں اہم کردار ادا کر سکتا ہے۔