میلبرن:ہندوستان اور آسٹریلیا نے دوطرفہ تعلقات میں ایک تاریخی پیش رفت کرتے ہوئے جوہری توانائی کے شعبے میں ایک اہم معاہدے پر دستخط کیے ہیں۔ اس معاہدے کے تحت آسٹریلیا ہندوستان کے سول جوہری توانائی پروگرام کے لیے یورینیم فراہم کرے گا۔میلبرن میں آسٹریلیا کے وزیر اعظم انتھونی البانیز کے ساتھ مشترکہ پریس کانفرنس سے خطاب کرتے ہوئے وزیر اعظم نریندر مودی نے کہا کہ یہ معاہدہ ہندوستان کے صاف توانائی کے اہداف کے حصول میں اہم کردار ادا کرے گا۔

انہوں نے کہا کہ آسٹریلیا ہندوستان کو یورینیم فراہم کرے گا۔ جوہری توانائی کے شعبے میں ہونے والا یہ معاہدہ ہمارے صاف توانائی کے منصوبوں کو نئی رفتار دے گا۔

وزیر اعظم مودی نے کہا کہ ہندوستان اور آسٹریلیا مضبوط جمہوریتیں ہیں۔ دونوں کثیر ثقافتی معاشرے اور اہم بحری طاقتیں ہیں۔ عالمی اور علاقائی امور پر دونوں ممالک کی سوچ میں کافی ہم آہنگی ہے جس کے باعث جامع تزویراتی شراکت داری مسلسل مضبوط ہو رہی ہے۔انہوں نے کہا کہ دونوں ممالک کے درمیان منعقد ہونے والے تیسرے سالانہ سربراہ اجلاس نے باہمی تعلقات میں کئی نئی جہتوں کا اضافہ کیا ہے۔

آسٹریلیا کے وزیر اعظم انتھونی البانیز نے اس موقع پر کہا کہ دونوں ممالک نے 2015 کے آسٹریلیا۔ہندوستان جوہری تعاون معاہدے کے تحت پرامن مقاصد کے لیے ہندوستان کو یورینیم برآمد کرنے کے انتظام کو حتمی شکل دے دی ہے۔وزیر اعظم مودی نے اعلان کیا کہ دونوں ممالک جامع اقتصادی تعاون کے معاہدے پر بھی کام آگے بڑھائیں گے۔ ان کے مطابق یہ ایک متوازن۔وسیع اور دونوں ملکوں کے لیے یکساں طور پر مفید معاہدہ ہوگا۔

انہوں نے کہا کہ اقتصادی تعاون کو مزید مستحکم بنانے کے لیے دوطرفہ سرمایہ کاری کے معاہدے پر بھی پیش رفت کی جائے گی۔اہم معدنیات کے شعبے میں تعاون بڑھانے کے لیے دونوں ممالک ایک مشترکہ راہداری قائم کریں گے تاکہ مضبوط سپلائی چین تیار کی جا سکے اور صاف توانائی کی منتقلی کو فروغ ملے۔وزیر اعظم مودی نے دفاعی ٹیکنالوجی میں تعاون بڑھانے کے لیے ہندوستان۔آسٹریلیا دفاعی اختراعی راہداری کے قیام کا بھی اعلان کیا۔

دونوں ممالک نے ہند بحرالکاہل خطے میں دفاع اور سلامتی کے تعاون پر مشترکہ اعلامیہ جاری کیا۔ اس کے ساتھ سمندری سلامتی۔سائبر سلامتی۔اہم ٹیکنالوجی اور سپلائی چین کے شعبوں میں نئی شراکت داری کا بھی اعلان کیا گیا۔آسٹریلیا کے وزیر اعظم انتھونی البانیز نے کہا کہ ہندوستان آسٹریلیا کے اہم ترین تزویراتی شراکت داروں میں سے ایک ہے اور دونوں ممالک کے تعلقات پہلے سے کہیں زیادہ اہمیت اختیار کر چکے ہیں۔

انہوں نے کہا کہ آج دونوں ممالک نے دفاع۔سلامتی۔تعلیم۔سائنس و ٹیکنالوجی۔توانائی کے تحفظ اور اہم معدنیات سمیت مختلف شعبوں میں تاریخی معاہدوں کے ذریعے اپنے تعلقات کو مزید وسعت دی ہے۔دونوں رہنماؤں نے آسٹریلیا۔ہندوستان اور کینیڈا کے درمیان سہ فریقی ٹیکنالوجی شراکت داری کی بھی توثیق کی۔ اس کے علاوہ آسٹریلیا نے کوکوس جزائر میں ہندوستان کے گگن یان خلائی مشن کی معاونت کے لیے عارضی خلائی نگرانی مرکز قائم کرنے پر بھی اتفاق کیا۔یہ معاہدے ایسے وقت میں سامنے آئے ہیں جب دونوں ممالک صاف توانائی۔اہم معدنیات۔دفاع۔جدید ٹیکنالوجی اور ہند بحرالکاہل کے خطے میں سلامتی کے شعبوں میں تعاون کو مزید مضبوط بنانے کی کوشش کر رہے ہیں۔ دونوں رہنماؤں نے ایک محفوظ۔مستحکم اور خوشحال خطے کے لیے اپنے مشترکہ عزم کا بھی اعادہ کیا۔