اسلام آباد۔ پاکستان۔ سعودی عرب اور ترکی نے جمعہ کو مغربی ایشیا میں بڑھتے ہوئے تنازع کے پس منظر میں ایک اہم دفاعی معاہدے پر دستخط کیے۔ ’’مکہ مشترکہ دفاعی معاہدے‘‘ کے نام سے طے پانے والے اس معاہدے کا مقصد خطے میں بڑھتے ہوئے سکیورٹی خطرات کے درمیان تینوں ممالک کے درمیان فوجی تعاون کو مضبوط بنانا ہے۔سربراہ اجلاس کے بیان میں کہا گیا کہ اس معاہدے کا مقصد کسی بھی جارحیت کے خلاف اجتماعی دفاعی صلاحیت کو مضبوط بنانا ہے۔ معاہدے میں کہا گیا ہے کہ تینوں میں سے کسی ایک ملک پر ہونے والا کوئی بھی مسلح حملہ تینوں ممالک پر حملہ تصور کیا جائے گا۔ اس کے علاوہ تینوں ممالک کے درمیان دفاعی تعاون کے تمام شعبوں کو مزید فروغ دینے کی بھی شق شامل ہے۔

یہ معاہدہ سعودی عرب میں سعودی ولی عہد محمد بن سلمان۔ ترکی کے صدر رجب طیب اردوغان اور پاکستان کے وزیر اعظم شہباز شریف کے درمیان ہونے والی ملاقات کے دوران طے پایا۔یہ سکیورٹی معاہدہ ایسے وقت میں ہوا ہے جب ایران کے ساتھ جاری تنازع کے دوران سعودی عرب کو متعدد حملوں کا سامنا کرنا پڑا ہے اور وہ اپنے سکیورٹی شراکت داروں کا دائرہ وسیع کرنے کی کوشش کر رہا ہے۔ ایران اور اس کے علاقائی اتحادیوں بشمول حوثیوں اور عراقی ملیشیا گروپوں کی جانب سے کیے جانے والے ڈرون اور میزائل حملوں میں سعودی عرب کے اہم بنیادی ڈھانچے اور پٹرولیم تنصیبات کو نشانہ بنایا گیا ہے۔

اس کے علاوہ یہ معاہدہ غزہ اور خطے میں جاری وسیع تر کشیدگی کے معاملے پر ترکی اور اسرائیل کے درمیان بڑھتے ہوئے اختلافات کے دوران سامنے آیا ہے۔ اس میں ایران اور لبنان سے متعلق تنازعات بھی شامل ہیں۔یہ پیش رفت اس وقت ہوئی ہے جب دفاعی اور تزویراتی حلقوں میں ایک وسیع تر علاقائی اتحاد کے قیام کے حوالے سے قیاس آرائیاں جاری ہیں جسے اکثر ’’اسلامی نیٹو‘‘ کہا جاتا ہے۔ رائٹرز نے اس معاملے سے براہ راست واقف 2 علاقائی ذرائع کے حوالے سے پہلے رپورٹ کیا تھا کہ مسلم اکثریتی 3 اہم ممالک دفاعی تعاون کو مزید باضابطہ شکل دینے کی تیاری کر رہے ہیں۔

یہ سہ فریقی معاہدہ گزشتہ سال قائم کیے گئے ایک بنیادی دو طرفہ سکیورٹی فریم ورک کو مزید وسعت دیتا ہے۔ اس وقت پاکستان اور سعودی عرب نے وزیر اعظم شہباز شریف کے سعودی عرب کے سرکاری دورے کے دوران ولی عہد محمد بن سلمان سے ملاقات میں ’’اسٹریٹجک باہمی دفاعی معاہدے‘‘ پر دستخط کیے تھے۔ اس معاہدے میں بھی یہ عہد کیا گیا تھا کہ کسی ایک ملک کے خلاف جارحیت کو دونوں ممالک پر حملہ تصور کیا جائے گا۔

اس پیش رفت کے بعد پاکستان کے وزیر دفاع خواجہ آصف نے مئی میں پاکستانی میڈیا ادارے ہم نیوز کو دیے گئے ایک انٹرویو میں کہا تھا کہ اسلام آباد اور ریاض کے درمیان تعاون کے دائرے میں ترکی اور قطر جیسے ممالک بھی شامل ہوسکتے ہیں۔ خواجہ آصف نے کہا تھا کہ ایک ایسے علاقائی نظام کے قیام کے لیے بات چیت آگے بڑھ رہی ہے جو کسی مخصوص غیر ملکی طاقت کو نشانہ بنائے بغیر امن کو فروغ دے۔خواجہ آصف نے کہا تھا کہ اگر سعودی عرب اور پاکستان کے درمیان پہلے سے موجود معاہدے میں قطر اور ترکی بھی شامل ہوجاتے ہیں تو یہ خوش آئند ہوگا کہ خطے کے ممالک کے درمیان ایسا اقتصادی اور دفاعی انتظام قائم ہو جس سے خطے سے باہر کے ممالک پر انحصار کم کیا جاسکے۔

انہوں نے مزید کہا تھا کہ یہ معاہدہ کسی کے خلاف نہیں ہے۔ تاہم خطے میں امن کے تحفظ کے لیے یہ بہت اہم ہے۔خطے میں بدلتے ہوئے سکیورٹی حالات پر عالمی طاقتیں خاص طور پر ہندوستان گہری نظر رکھے ہوئے ہیں۔ گزشتہ سال اسلام آباد اور ریاض کے درمیان ابتدائی دو طرفہ معاہدے کے بعد نئی دہلی نے کہا تھا کہ وہ اس کے تزویراتی اثرات کا جائزہ لے رہا ہے۔وزارت خارجہ کے ترجمان رندھیر جیسوال نے سرکاری ردعمل میں کہا تھا کہ نئی دہلی نے سعودی عرب اور پاکستان کے درمیان طویل عرصے سے موجود انتظام کو باضابطہ شکل دیے جانے کا نوٹس لیا ہے۔ تاہم ہندوستانی حکومت اس پیش رفت کے اثرات کا مسلسل جائزہ لے رہی ہے۔وزارت خارجہ کے ترجمان نے کہا تھا کہ ہم اپنی قومی سلامتی اور علاقائی و عالمی استحکام پر اس پیش رفت کے اثرات کا جائزہ لیں گے۔ حکومت ہندوستان کے قومی مفادات کے تحفظ اور تمام شعبوں میں جامع قومی سلامتی کو یقینی بنانے کے لیے پرعزم ہے۔