کاراکاس

وینزویلا میں بدھ کے روز (مقامی وقت کے مطابق) آنے والے دو طاقتور زلزلوں کے نتیجے میں کم از کم 32 افراد ہلاک اور 700 سے زائد زخمی ہو گئے ہیں۔ قائم مقام صدر ڈیلسی روڈریگیز نے خبردار کیا ہے کہ امدادی کارروائیاں جاری رہنے کے باعث ہلاکتوں کی تعداد میں مزید اضافہ ہو سکتا ہے۔

ایکس پر ایک پوسٹ میں ڈیلسی روڈریگیز نے کہا کہ حکام کا "مرکزی اور بنیادی مقصد انسانی جانوں کو بچانا" ہے، اور انہوں نے امدادی سرگرمیوں کے دوران عوام سے پرسکون رہنے کی اپیل کی۔قومی رسک مینجمنٹ سسٹم  اور سول پروٹیکشن سسٹم کے ہنگامی اجلاس کے بعد گفتگو کرتے ہوئے انہوں نے کہا کہ حکام کی پوری توجہ جانیں بچانے اور منہدم عمارتوں اور گھروں کے ملبے تلے دبے افراد کو تلاش کرنے پر مرکوز ہے۔

انہوں نے کہا کہ ہمارا ایک مرکزی اور بنیادی مقصد جانیں بچانا ہے۔ قومی ایمرجنسی سسٹم اور سول پروٹیکشن کے حکام کے طور پر ہماری ذمہ داری ان افراد کو نکالنا ہے جو منہدم عمارتوں یا گھروں کے نیچے پھنسے ہوئے ہیں۔

قائم مقام صدر کے مطابق ساحلی ریاست لا گوائرا اس قدرتی آفت سے سب سے زیادہ متاثر ہوئی ہے، جہاں درجنوں عمارتیں منہدم ہو گئی ہیں اور یہ علاقہ عملاً آفت زدہ علاقے میں تبدیل ہو چکا ہے۔

انہوں نے کہا کہ مجھے اطلاع دینی ہے کہ اس غیر معمولی زلزلے سے سب سے زیادہ متاثر ہونے والی ریاست لا گوائرا ہے۔ یہاں درجنوں عمارتیں گر چکی ہیں اور ہم اس وقت انتہائی مشکل امدادی کارروائیوں میں مصروف ہیں تاکہ جتنی جانیں ممکن ہوں بچائی جا سکیں۔ڈیلسی روڈریگیز نے تباہی کو "حقیقی سانحہ" قرار دیتے ہوئے جاں بحق افراد کے اہل خانہ سے اظہارِ تعزیت کیا۔

انہوں نے کہا کہ ہم کہہ سکتے ہیں کہ لا گوائرا ریاست ایک حقیقی المیہ بن چکی ہے اور اب ایک آفت زدہ علاقہ ہے۔ ہم اپنے پیاروں کو کھونے والے خاندانوں کے ساتھ مکمل یکجہتی کا اظہار کرتے ہیں اور ان مشکل گھڑیوں میں اپنی ہمدردی اور تعاون کا یقین دلاتے ہیں۔قائم مقام صدر نے بتایا کہ وینزویلا کو بین الاقوامی امداد بھی موصول ہو رہی ہے اور آئندہ چند گھنٹوں اور دنوں میں مختلف ممالک سے امدادی ٹیمیں پہنچیں گی۔ انہوں نے امریکی صدر ڈونلڈ ٹرمپ اور ان کی انتظامیہ کا شکریہ ادا کیا، جنہوں نے وینزویلا کے حکام سے مسلسل رابطہ رکھا اور تعاون کی پیشکش کی۔

انہوں نے کہا کہ میں صدر ڈونلڈ ٹرمپ اور ان کی حکومت کا شکریہ ادا کرتی ہوں، جو مسلسل وینزویلا کی حکومت اور ہمارے تمام حکام کے ساتھ رابطے میں ہیں اور حمایت و یکجہتی کا اظہار کر رہے ہیں۔ ابتدائی چند گھنٹوں میں امدادی کارکن یہاں پہنچنا شروع ہو جائیں گے۔انہوں نے مزید بتایا کہ ڈومینیکن ریپبلک، ایل سلواڈور، میکسیکو اور قطر سے بھی امدادی ٹیمیں روانہ کی جا رہی ہیں، جبکہ چین نے انسانی امداد کی پیشکش کی ہے۔ برازیل کے صدر لوئیز اناسیو لولا دا سلوا اور کئی کیریبین ممالک نے بھی تعاون کا یقین دلایا ہے۔

تازہ اعداد و شمار جاری کرتے ہوئے ڈیلسی روڈریگیز نے کہا کہ اس وقت ہمارے پاس 32 ہلاکتوں کی اطلاعات ہیں، جن میں لا گوائرا ریاست کے ممکنہ اضافی اعداد و شمار شامل نہیں ہیں، جبکہ 700 سے زائد زخمیوں کو سرکاری اور نجی اسپتالوں کے ایمرجنسی شعبوں میں علاج فراہم کیا جا رہا ہے۔حکومت نے ملک بھر میں تعلیمی ادارے اور غیر ضروری سرگرمیاں معطل کر دی ہیں، جبکہ جن افراد کے گھر مکمل یا جزوی طور پر تباہ ہو گئے ہیں، ان کے لیے ہوٹلوں اور پناہ گاہوں کے دروازے کھول دیے گئے ہیں۔

انہوں نے عوام سے اپیل کرتے ہوئے کہا کہ میں آپ سے درخواست کرتی ہوں کہ قومی اتحاد کا مظاہرہ کریں، پرسکون رہیں اور یقین رکھیں کہ ہم سب مل کر اس سانحے پر قابو پا لیں گے۔ آج یہ المیہ بہت سے وینزویلا کے خاندانوں کے لیے سوگ کا باعث بنا ہے، لیکن وینزویلا کو دنیا بھر کے عوام کی محبت اور حمایت بھی حاصل ہو رہی ہے۔