نیویارک

اقوام متحدہ میں ایران کے مستقل نمائندے، امیر سعید ایراوانی نے چھ عرب ممالک کی جانب سے اقوام متحدہ اور سلامتی کونسل کو بھیجے گئے ایک مشترکہ خط کا باضابطہ جواب دے دیا ہے۔ ایرانی سفیر نے دستخط کرنے والے ممالک پر سخت تنقید کرتے ہوئے الزام لگایا کہ وہ تہران کے خلاف فوجی کارروائیوں میں شامل رہے ہیں۔

ایراوانی نے کہا کہ ان ممالک نے ایران کے خلاف جارحیت میں حصہ لیا کیونکہ انہوں نے اپنی سرزمین پر موجود فوجی اڈے امریکہ-اسرائیلی دشمن کے حوالے کر دیے، جہاں سے ایران پر فضائی حملے کیے گئے۔

تہران کی فوجی کارروائیوں کا دفاع کرتے ہوئے ایرانی سفارتکار نے زور دیا کہ اسلامی جمہوریہ ایران کے اقدامات عالمی قانونی اصولوں کے مطابق تھے۔ ایراوانی کے مطابق، ایران نے جارحیت کے جواب میں  اپنے جائز حقِ دفاع کا استعمال کیا ہے، جیسا کہ اقوام متحدہ کے چارٹر میں درج ہے۔

انہوں نے مزید خبردار کیا کہ کوئی بھی ملک جو ایرانی سرزمین کے خلاف حملوں میں مدد فراہم کرے گا، اسے بین الاقوامی قوانین کے تحت نتائج بھگتنا ہوں گے۔ ان کا کہنا تھا کہ جو ممالک ایران کے خلاف کارروائیوں میں شریک رہے ہیں یا "ایران پر حملے کے لیے اپنے اڈوں، فضائی حدود، علاقائی پانی یا زمین کے استعمال کی اجازت دی ہے، وہ ذمہ دار ہیں اور انہیں جوابدہ ٹھہرایا جانا چاہیے۔

مستقل نمائندے نے موجودہ کشیدگی کی ابتدا سے ایران کو دور رکھنے کی کوشش کرتے ہوئے اس بات پر زور دیا کہ ایران کی فوجی حکمتِ عملی محض ردِعمل پر مبنی ہے۔ انہوں نے کہا کہ ایران اس تنازع اور جنگ کا آغاز کرنے والا نہیں تھا۔اقوام متحدہ میں یہ سفارتی کشیدگی ایسے وقت سامنے آئی ہے جب ڈونالڈ ٹرمپ انتظامیہ یہ دعویٰ کر رہی ہے کہ امریکہ ایران کے ساتھ "جنگ میں نہیں ہے، حالانکہ اس کشیدگی کے باعث عالمی تیل کی قیمتیں تاریخی سطح تک پہنچ رہی ہیں۔

واشنگٹن کے بیانات ایسے وقت میں آئے ہیں جب امریکہ کے "وار پاورز ایکٹ" کے تحت ایک اہم قانونی مدت قریب آ رہی ہے، جس کے مطابق مسلسل فوجی کارروائیوں کے لیے کانگریس کی منظوری ضروری ہوتی ہے۔

وائٹ ہاؤس کے حکام کا کہنا ہے کہ تہران کے ساتھ موجودہ جنگ بندی اس 60 دن کی قانونی مدت کو مؤثر طور پر "روک دیتی ہے"۔ اس مؤقف کی حمایت کرتے ہوئے امریکی ایوان نمائندگان کے اسپیکر مائیک جانسن نے کہا کہ مجھے نہیں لگتا کہ اس وقت کوئی فعال یا شدید بمباری یا فائرنگ جاری ہے۔ فی الحال ہم امن قائم کرنے کی کوشش کر رہے ہیں۔جانسن نے مزید کہا کہ حساس مذاکرات کے دوران وہ "انتظامیہ کے راستے میں رکاوٹ ڈالنے سے گریز کریں گے۔

اسی طرح امریکہ کے وزیر دفاع پیٹ ہیگسیتھ نے قانون سازوں کو بتایا کہ لڑائی میں وقفہ آنے سے 60 دن کی مدت "رک جاتی ہے"جب ڈیموکریٹک سینیٹر ٹم کین نے یکم مئی کی آخری تاریخ کے بارے میں سوال کیا تو ہیگسیتھ نے جواب دیا کہ بالآخر میں اس معاملے میں وائٹ ہاؤس اور اس کے وکلاء کی رائے پر عمل کروں گا۔ تاہم اس وقت ہم جنگ بندی کی حالت میں ہیں، اور ہماری سمجھ کے مطابق اس دوران 60 دن کی مدت رک جاتی ہے۔یہ تنازع دراصل 28 فروری کو امریکہ اور اسرائیل کے مشترکہ حملوں کے بعد شروع ہوا تھا، جس میں ایران کے اس وقت کے سپریم لیڈر علی خامنہ ای اور دیگر اعلیٰ حکام ہلاک ہو گئے تھے۔

صدر ٹرمپ نے 2 مارچ کو کانگریس کو اس فوجی مہم کے بارے میں باضابطہ طور پر آگاہ کیا تھا اور یکم مئی کو "وار پاورز ایکٹ" کے لیے ایک اہم تاریخ قرار دیا گیا تھا۔تاہم، ڈیموکریٹک ارکان نے اس قانونی تشریح کو چیلنج کیا ہے۔ سینیٹر ٹم کین کا کہنا ہے، "مجھے نہیں لگتا کہ قانون اس کی حمایت کرتا ہے۔ان چیلنجز اور ایگزیکٹو اختیارات کو محدود کرنے کی سینیٹ کی کوششوں کے ناکام ہونے کے باوجود، ایوان پر ریپبلکن کنٹرول اور صدر کے ویٹو کے خدشے نے جنگ کے خاتمے کی کوششوں میں رکاوٹ پیدا کی ہے۔

سینیٹر ایڈم شف نے تیرہ فوجیوں کی ہلاکت کا حوالہ دیتے ہوئے کہا کہ 60 دن کی مدت قریب آنے کے ساتھ ہی "ہم پہلے ہی بہت بھاری قیمت چکا چکے ہیں۔"