نئی دہلی/ آواز دی وائس

قومی سلامتی کے مشیر (این ایس اے) اجیت ڈوبھال نے جمعہ کو نئی دہلی میں برازیل کے صدر کے خصوصی مشیر سیلسی لوئیس نونیس اموریم سے ملاقات کی۔ یہ ملاقات ہند-برازیل اسٹریٹجک ڈائیلاگ کے چھٹے ایڈیشن کے سلسلے میں ہوئی، جس میں دونوں ممالک کے اعلیٰ حکام نے مختلف شعبوں میں تعاون کو گہرا کرنے اور اپنی اسٹریٹجک شراکت داری میں پیش رفت کا جائزہ لیا۔

امبیسڈر اموریم، جو برازیلی حکومت کے اعلیٰ حکام اور مشیروں کے وفد کی قیادت کر رہے تھے، نے این ایس اےڈوبھال کے ساتھ اُن معاملات پر تبادلہ خیال کیا جو اس سال جولائی میں وزیر اعظم نریندر مودی کے برازیل کے دورۂ ریاست کے دوران تعاون کے پانچ ستونوں کے تحت طے کیے گئے تھے۔

وزارتِ خارجہ (ایم ای اے) کے مطابق، یہ ڈائیلاگ اسٹریٹجک شراکت داری میں جاری پیش رفت کا جائزہ لینے کا موقع تھا، جس میں دفاع و سلامتی، توانائی، ریئر ارتھ اور اہم معدنیات، صحت اور دواسازی جیسے متنوع شعبے شامل تھے۔ مذاکرات میں عالمی امور اور کثیر الجہتی پلیٹ فارمز جیسے بریکس، آئی بی ایس اے اور آئندہ موسمیاتی کانفرنس سی او پی-30 میں تعاون پر بھی بات چیت کی گئی، جس کی میزبانی برازیل نومبر میں کرے گا۔ دونوں فریقوں نے وزیر اعظم نریندر مودی اور صدر لُوئز ایناسیو لولا ڈا سلوا کے طے کردہ وژن کو عملی جامہ پہنانے کے لیے کام کو آگے بڑھانے پر اتفاق کیا۔

ہند-برازیل اسٹریٹجک ڈائیلاگ ایک اعلیٰ سطحی میکانزم کے طور پر دوطرفہ تعلقات کی رہنمائی کرتا ہے تاکہ دونوں حکومتوں کی ترجیحات کو باقاعدہ مشاورت کے ذریعے عملی شکل دی جا سکے۔

وزیر خارجہ ایس جے شنکر نے بھی قومی دارالحکومت میں برازیل کے نمائندے سے ملاقات کی۔ ملاقات کی تفصیلات سوشل میڈیا پلیٹ فارم ایکس پر شیئر کرتے ہوئے انہوں نے لکھا کہ برازیل کے صدر کے خصوصی مشیر امبیسڈر سیلسی اموریم سے آج نئی دہلی میں ملاقات کر کے خوشی ہوئی۔ موجودہ عالمی منظرنامے اور اسٹریٹجک تعاون کو مزید گہرا کرنے کے مواقع پر مفید تبادلہ خیال ہوا۔

آئندہ موسمیاتی سربراہی اجلاس کے حوالے سے سی او پی-30 کے نامزد صدر اور ہندوستان میں سابق برازیلی سفیر، آندرے آرنہا کوریا دو لاگو نے عالمی ماحولیاتی مذاکرات میں ہندوستان کے اہم کردار کو اجاگر کیا اور کہا کہ ملک ایک منفرد پوزیشن رکھتا ہے کیونکہ یہ ایک صنعتی طور پر ترقی یافتہ اور ساتھ ہی ایک ترقی پذیر معیشت بھی ہے۔

ہندوستان کی کانفرنس آف دی پارٹیز میں شمولیت پر بات کرتے ہوئے کوریا دو لاگو نے  بتایا کہ ہندوستان کانفرنس آف دی پارٹیز میں سب سے اہم کرداروں میں سے ایک ہے کیونکہ یہ ایک ایسا ملک ہے جو تکنیکی اور صنعتی طور پر سب سے آگے ہے۔" انہوں نے مزید کہا کہ ہندوستان اور برازیل کو یکساں چیلنجز کا سامنا ہے: دونوں کو ایسا ترقیاتی ماڈل اپنانا ہے جو اپنی آبادی کی توقعات پر پورا اترے اور ساتھ ہی ماحول دوست بھی ہو۔

انہوں نے کہا کہ ایک ترقی پذیر ملک کی حیثیت سے برازیل کو بھی اب تک لاکھوں افراد کو غربت سے نکالنا ہے۔ اس لحاظ سے برازیل اور ہندوستان میں بہت کچھ مشترک ہے۔ جب ہم ماحولیات کی بات کرتے ہیں تو ہمیں ترقی کے بارے میں سوچنا پڑتا ہے، اپنی آبادی کی توقعات اور اس بات پر کہ ہمیں ایسا ترقیاتی ماڈل دینا ہے جو ماحول دوست ہو لیکن ساتھ ہی روزگار بھی پیدا کرے اور لوگوں کی زندگی کو بہتر بنائے۔