کابل:افغانستان کی وزارت دفاع نے جمعہ کو کہا کہ افغانستان نے خیبر پختونخوا کے کوہاٹ علاقے میں پاکستان فوج کے اہم فوجی مراکز اور تنصیبات پر جوابی ڈرون حملے کیے۔جوابی کارروائی کے دوران ڈیورنڈ لائن کے قریب واقع پاکستان کا کوہاٹ ملٹری فورٹ جو جنگی کمانڈ سینٹر کے طور پر استعمال ہوتا ہے اور فورٹ کمانڈر کے دفتر کو نمایاں نقصان پہنچا۔افغانستان کی وزارت دفاع نے ایک بیان میں کہا کہ فورٹ کی فوجی تنصیبات کمانڈ سینٹر گودام اور فوجیوں کے رہائشی کوارٹر تباہ ہوگئے جس کے نتیجے میں جانی اور مالی نقصان ہوا۔

یہ حملے اس وقت کیے گئے جب پاکستان کی فوج نے خوست صوبے کے علی شیر تریزئی ضلع کے مختلف علاقوں کو توپ خانے سے نشانہ بنایا۔ ٹولو نیوز کے مطابق اس گولہ باری میں ایک ہی خاندان کے 4 افراد ہلاک جبکہ 3 دیگر زخمی ہوگئے۔پاکستان فضائیہ نے افغانستان کے قندھار ایئرپورٹ کے قریب نجی فضائی کمپنی کام ایئر کے ایندھن کے گوداموں کو بھی نشانہ بنایا۔

طالبان کے ترجمان ذبیح اللہ مجاہد نے ایک بیان میں کہا کہ یہ کمپنی اندرون ملک فضائی کمپنیوں کے ساتھ ساتھ اقوام متحدہ کے طیاروں کو بھی ایندھن فراہم کرتی ہے۔ انہوں نے پاکستان پر اس سے قبل حاجی خان زادہ نامی ایک قومی تاجر کے ایندھن ذخیرے پر حملہ کرنے کا الزام بھی لگایا۔

فروری کے دوران ڈیورنڈ لائن کے ساتھ پاکستان اور افغانستان کے درمیان فضائی حملوں کے تبادلے میں اضافہ دیکھا گیا ہے۔ سرحدی جھڑپوں کے بڑھنے کے بعد پاکستان نے افغانستان کے دارالحکومت کابل سمیت دیگر شہروں پر بھی فضائی حملے کیے۔ڈیورنڈ لائن کے تنازع اور 2021 میں طالبان کی دوبارہ اقتدار میں واپسی کے بعد پاکستان اور افغانستان کے درمیان کشیدگی میں اضافہ ہوا ہے اور دونوں ممالک کے درمیان اکثر جھڑپوں کی اطلاعات سامنے آتی رہی ہیں۔

خصوصی طور پر پاکستان طالبان حکومت سے مطالبہ کرتا رہا ہے کہ وہ پاکستان طالبان یعنی تحریک طالبان پاکستان کو قابو میں رکھے جس کے بارے میں اسلام آباد کا کہنا ہے کہ اسے افغانستان میں پناہ حاصل ہے۔تحریک طالبان پاکستان 2007 میں پاکستان میں وجود میں آئی اور اگرچہ یہ افغانستان کی طالبان تحریک سے الگ ہے لیکن نظریاتی سماجی اور لسانی سطح پر دونوں کے درمیان گہرے تعلقات پائے جاتے ہیں۔حالیہ برسوں میں تحریک طالبان پاکستان اور بلوچستان لبریشن آرمی کی جانب سے پاکستان میں مسلح حملوں میں اضافہ ہوا ہے۔ افغانستان سے ملحق خیبر پختونخوا اور بلوچستان صوبے اس تشدد سے سب سے زیادہ متاثر ہوئے ہیں۔