کابل:طالبان نے افغانستان کے دو اہم شہروں کابل اور مزار شریف میں مانع حمل ادویات کی فروخت پر پابندی عائد کر دی ہے۔ انہوں نے خواتین کی جانب سے استعمال کی جانے والی مانع حمل ادویات کو مغربی ممالک کی مسلم آبادی کو کنٹرول کرنے کی سازش قرار دیا ہے۔
دی گارڈین کی رپورٹ کے مطابق، طالبان جنگجو گھر گھر جا کر دائیوں کو دھمکیاں دے رہے ہیں اور فارمیسیوں کو تمام مانع حمل ادویات اور آلات کو ہٹانے کا حکم دے رہے ہیں۔ کابل میں ایک ڈسپنسری کے مالک نے بتایا کہ وہ دو بار بندوق لے کر میری دکان پر آئے اور پیدائش پر قابو پانے کی گولیاں نہ بیچنے کی دھمکی دی۔ طالبان جنگجو ہر ڈسپنسری کو باقاعدگی سے چیک کر رہے ہیں۔
ایک سینئر مڈوائف نے نام ظاہر نہ کرنے کی شرط پر بتایا کہ طالبان نے انہیں کئی بار دھمکیاں دی ہیں۔ ایک طالبان کمانڈر نے ان سے کہا کہ آبادی کو کنٹرول کرنے کے خیال اور طریقوں کی وضاحت کے لیے باہر جانے کی ضرورت نہیں ہے۔ یہ ایک غیر ضروری کام ہے۔ طالبان راج میں خواتین کی زندگی مشکل بنا دی گئی ہے۔ خواتین پر بہت سی پابندیاں لگائی گئی ہیں۔
طالبات کو یونیورسٹی کے داخلے کے امتحانات میں شرکت سے بھی روک دیا گیا ہے۔ طالبان نے ایک حکم نامہ بھی جاری کیا جس کے تحت اب لڑکیاں امتحان کے لیے درخواست بھی نہیں دے سکتیں۔ طالبان نے خواتین کے کام کی جگہ پر جانے پر بھی پابندی عائد کر رکھی ہے جس کی وجہ سے وہاں خواتین کارکنوں کی تعداد میں بہت زیادہ کمی واقع ہوئی ہے۔
