کابل [افغانستان]: اسلامی امارت افغانستان کی مسلح افواج نے ہفتے اور اتوار کی درمیانی شب پاکستانی فوج کی جانب سے افغان خودمختاری کی بار بار خلاف ورزی اور افغان سرزمین پر حالیہ فضائی حملوں کے جواب میں ڈیورنڈ لائن کے ساتھ واقع پاکستانی فوجی ٹھکانوں پر جوابی کارروائیاں کیں۔ یہ بات افغان وزارت دفاع نے اپنے ایک بیان میں کہی۔

وزارت نے سوشل میڈیا پلیٹ فارم X (سابقہ ٹوئٹر) پر ایک بیان میں کہا: "آج رات ہماری مسلح افواج نے پاکستانی فوج کی جانب سے افغانستان کی خودمختاری کی بار بار خلاف ورزی اور افغان سرزمین پر فضائی حملوں کے ردعمل میں ڈیورنڈ لائن پر واقع پاکستانی فورسز کے مراکز پر کامیاب جوابی کارروائی کی۔ یہ آپریشن آدھی رات کے قریب مکمل ہوا۔"

وزارت دفاع نے خبردار کیا کہ اگر پاکستان نے دوبارہ افغان خودمختاری کی خلاف ورزی کی، تو افغان افواج ملک کی سرحدوں کے دفاع کے لیے پوری طرح تیار ہیں اور سخت جواب دیں گی۔ اس سے قبل افغان وزارت دفاع نے کابل اور پکتیکا صوبوں میں پاکستان کے فضائی حملوں کی مذمت کرتے ہوئے انہیں دونوں ممالک کی تاریخ میں "بے مثال اور پرتشدد عمل" قرار دیا تھا۔

وزارت نے متنبہ کیا تھا کہ کسی بھی مزید کشیدگی کے پاکستانی فوج پر سنگین نتائج مرتب ہوں گے۔ ایک علیحدہ بیان میں وزارت نے کہا: "پاکستان نے ایک بار پھر افغانستان کی فضائی حدود کی خلاف ورزی کرتے ہوئے پکتیکا کے ضلع برمل کے علاقے مارغی میں ایک شہری مارکیٹ پر بمباری کی اور ساتھ ہی کابل کی فضائی حدود میں بھی دراندازی کی۔"

وزارت نے ان حملوں کو "ناقابل قبول، پرتشدد اور قابلِ مذمت" قرار دیا اور کہا کہ افغان خودمختاری کا دفاع کرنا افغانستان کا جائز حق ہے۔ اسلامی امارت کے ترجمان ذبیح اللہ مجاہد نے تصدیق کی کہ جمعرات کی رات کابل میں دھماکوں کی آوازیں سنی گئیں، اور کہا کہ اس بارے میں تحقیقات جاری ہیں، تاہم ابھی تک کسی جانی نقصان کی اطلاع نہیں ملی۔

انہوں نے یہ بھی اعلان کیا کہ اتوار کی صبح حکومت کے میڈیا سینٹر میں ایک پریس کانفرنس منعقد کی جائے گی جس میں تازہ ترین صورتحال پر روشنی ڈالی جائے گی۔ طالبان حکام نے بتایا کہ جھڑپوں کا آغاز اس وقت ہوا جب کابل نے اسلام آباد پر افغان دارالحکومت پر فضائی حملے کرنے کا الزام لگایا۔

افغان فوج نے ایک بیان میں کہا کہ: "پاکستانی فضائی حملوں کے ردعمل میں مشرقی سرحدوں پر طالبان کی سرحدی فورسز پاکستانی چوکیوں کے خلاف شدید لڑائی میں مصروف ہیں۔" افغانستان میں امن کے لیے سابق امریکی خصوصی ایلچی زلمے خلیل زاد نے خبردار کیا کہ پاکستان کی جانب سے کابل پر فضائی حملے ایک وسیع تر تنازعے کو جنم دے سکتے ہیں۔

انہوں نے اس کارروائی کو ایک ناکامی قرار دیا اور زور دیا کہ کشیدگی کو کم کرنے کے لیے سفارتی کوششیں کی جائیں۔ انہوں نے کہا: "پاکستان کا افغانستان کے دارالحکومت پر حملہ بظاہر ناکام رہا ہے۔ لگتا ہے جس شخص کو نشانہ بنایا گیا، وہ کابل میں موجود ہی نہیں تھا۔ سوال یہ ہے کہ اب اسلام آباد کیا کرے گا؟ مزید حملے؟ پاکستانی طیارے کابل کی فضا میں آواز کی حد پار کر رہے ہیں۔

افغان بھی جوابی کارروائی کے لیے تیار ہو رہے ہیں۔ کچھ افغان رہنما فوری ردعمل کے لیے دباؤ ڈال رہے ہیں۔ ایسے میں تنازعے اور عدم استحکام کا خطرہ بڑھ رہا ہے۔" قطر نے پاکستان اور افغانستان کی سرحد پر بڑھتی ہوئی کشیدگی اور اس کے ممکنہ علاقائی اثرات پر تشویش کا اظہار کیا ہے۔

قطری وزارت خارجہ نے ایک بیان میں  فریقین پر زور دیا کہ وہ مذاکرات، سفارت کاری اور ضبط و تحمل کو ترجیح دیں تاکہ حالات مزید نہ بگڑیں۔ بیان میں کہا گیا: "قطر خطے میں امن و استحکام کے لیے ہر بین الاقوامی اور علاقائی کوشش کی حمایت کرتا ہے، اور پاکستانی و افغانی عوام کی سلامتی و خوشحالی کے لیے پُرعزم ہے۔"