کابل : پاکستان سے ڈی پورٹ کیے گئے افغان شہریوں نے اس ملک میں پولیس کے ناروا رویے پر تشویش کا اظہار کیا ہے اور واپسی کے بعد درپیش مشکلات کے بارے میں بتایا ہے۔ ان میں سے اکثر نے اسلامی امارت اور امدادی اداروں سے پناہ گاہیں اور تعاون فراہم کرنے کی اپیل کی ہے۔پاکستان سے ڈی پورٹ ہونے والے شیرین دل نے کہا: "ہمیں آئے ہوئے بارہ دن ہو گئے ہیں۔ ہم مہاجر ہیں، لاہور سے آئے ہیں۔ وہاں بہت مسائل تھے۔ اب ہم قندوز جا رہے ہیں، لیکن میرے پاس کچھ بھی نہیں ہے۔ایک اور واپس آنے والے احمد نے کہا: "ہم پاکستان سے آئے ہیں۔ میرے پاس نہ زمین ہے، نہ کچھ اور۔ اسلامی امارت کو ہمارا ساتھ دینا چاہیے۔شمِلہ، جو پاکستان سے ڈی پورٹ ہوئیں، نے کہا: "وہاں پولیس نے بہت مسائل پیدا کیے اور حالات انتہائی مشکل تھے۔

ادھر پاکستانی میڈیا نے وفاقی حکومت کے حوالے سے بتایا کہ اسلام آباد نے خیبر پختونخوا میں افغان مہاجرین کے پانچ کیمپ بند کر دیے ہیں جو چار دہائیوں سے فعال تھے۔ ان میں تین کیمپ ہری پور، ایک چترال اور ایک اپر دیر میں واقع تھے۔ صرف ہری پور کا پانیاں کیمپ ہی ایک لاکھ سے زائد مہاجرین کا میزبان رہا ہے۔اقوام متحدہ کے ہائی کمشنر برائے مہاجرین(UNHCR) نے کہا ہے کہ اب تک 2025 میں ایران اور پاکستان سے 28 لاکھ سے زائد افغان شہری واپس آ چکے ہیں۔ ایجنسی نے اپنی تازہ رپورٹ میں بتایا: "2025 میں اب تک ایران اور پاکستان سے 28 لاکھ سے زیادہ افغان واپس آئے ہیں، جبکہ افغانستان میں حالیہ زلزلوں نے پہلے سے موجود کمزوریوں کو مزید بڑھا دیا ہے۔ اگرچہ افغانستان میں کیش انکیشمنٹ مراکز خواتین عملے پر پابندی کی وجہ سے بند ہیں، لیکن یو این ایچ سی آر سرحدی علاقوں میں کام جاری رکھے ہوئے ہے اور نقد امداد سمیت دیگر سہولیات فراہم کر رہا ہے۔"

طلوع نیوز نے مزید بتایا کہ مہاجرین کے حقوق کے کارکن نظر نظاری نے خبردار کیا ہے کہ کیمپس بند ہونے کے بعد صورتحال مزید خراب ہو جائے گی۔ ان کے مطابق: "خیبر پختونخوا میں کئی افغان مہاجر کیمپوں کے بند ہونے سے مہاجرین کی مشکلات میں نمایاں اضافہ ہوگا۔ یہ کیمپ ہزاروں خاندانوں، خاص طور پر خواتین، بچوں اور بزرگوں کے لیے محفوظ جگہ تھے جہاں وہ بنیادی امداد حاصل کرتے تھے۔اس سے قبل کمیشن برائے امور مہاجرین نے رپورٹ دی تھی کہ صرف گزشتہ ایک ہفتے میں ہی 48,024 افغان ایران اور پاکستان سے واپس آئے ہیں۔