بیجنگ

چین نے منگل کو ایران کے اردگرد بڑھتی ہوئی کشیدگی میں شامل تمام فریقوں سے فوری طور پر دشمنی ختم کرنے اور مذاکرات کی راہ اختیار کرنے کی اپیل کی ہے، خبردار کرتے ہوئے کہا کہ طویل تنازع کسی کے مفاد میں نہیں ہوگا۔ چائنا ڈیلی کے مطابق یہ بیان سامنے آیا ہے۔امریکہ کی جانب سے ایران کے پاور پلانٹس پر مجوزہ حملوں کو مؤخر کرنے کی خبروں کے بعد چینی وزارتِ خارجہ کے ترجمان لن جیان نے کہا کہ بیجنگ مغربی ایشیا میں اس بحران کے ممکنہ "پھیلاؤ کے اثرات" پر گہری تشویش رکھتا ہے۔

چینی وزارت خارجہ نے منگل کو کہا کہ ایران میں طویل تنازع کسی کے مفاد میں نہیں ہے، اور جنگ بندی اور مذاکرات ہی واحد حل ہیں۔لن جیان نے مزید کہا کہ چین نے تمام فریقوں سے تحمل کا مظاہرہ کرنے اور خطے میں مزید کشیدگی کو روکنے کی اپیل کی ہے۔انہوں نے کہا کہ بیجنگ اس بحران کے پھیلاؤ کے اثرات پر شدید تشویش کا اظہار کرتا ہے اور تمام فریقوں سے مطالبہ کرتا ہے کہ وہ فوری طور پر لڑائی بند کریں اور پرامن مذاکرات کی طرف واپس آئیں۔

اس سے قبل 20 مارچ کو چین نے عالمی اثرات کو اجاگر کرتے ہوئے خبردار کیا تھا کہ "مشرق وسطیٰ میں جاری تنازع مسلسل شدت اختیار کر رہا ہے اور پھیل رہا ہے"، جس سے اہم بین الاقوامی شعبے متاثر ہو رہے ہیں اور تمام ممالک کے مشترکہ مفادات کو نقصان پہنچ رہا ہے۔

علاقائی بحران سے متعلق ایک سوال کے جواب میں ترجمان لن جیان نے کہا کہ اس کے اثرات صرف میدانِ جنگ تک محدود نہیں بلکہ اس سے عالمی توانائی، مالیات، تجارت اور شپنگ کے شعبے بھی براہِ راست متاثر ہو رہے ہیں۔

انہوں نے طاقت کے استعمال کی مخالفت کرتے ہوئے کہا کہ تاریخ اور حقیقت بار بار یہ ثابت کر چکی ہیں کہ فوجی طاقت مسائل کا حل نہیں ہوتی اور مسلح تصادم مزید نفرت کو جنم دیتا ہے۔کشیدگی کم کرنے کی براہِ راست اپیل کرتے ہوئے انہوں نے کہا کہ "متعلقہ فریقوں کو فوری طور پر فوجی کارروائیوں پر روک لگانی چاہیے تاکہ صورتحال مزید خراب نہ ہو۔چین کے بطور سفارتی ثالث کردار کو دہراتے ہوئے لن جیان نے کہا کہ بیجنگ غیر فوجی حل تلاش کرنے کے لیے اپنی کوششیں جاری رکھے گا۔

انہوں نے مزید کہا کہ چین جنگ بندی اور دشمنی کے خاتمے کے لیے ثالثی کی کوششیں جاری رکھے گا تاکہ جلد از جلد مشرق وسطیٰ میں امن اور استحکام بحال ہو سکے۔