ملک اصغر ہاشمی

جب بھی ملک کی پارلیمنٹ میں یا کسی عوامی اسٹیج پر وندے ماترم کا ذکر ہوتا ہے تو ایک نئی بحث شروع ہوجاتی ہے۔ ایک طرف مذہبی تنظیمیں اسے اسلامی عقائد کے خلاف بتاتے ہوئے مخالفت کرتی ہیں۔ دوسری طرف حکمران جماعت اسے قومی تشخص اور حب الوطنی کی علامت مانتے ہوئے اس کی حمایت کرتی ہے۔ اس تیز بحث میں ایک آواز ایسی ہے جو مذہبی اور سیاسی دونوں حلقوں سے الگ نظر آتی ہے۔ وہ آواز ہے مشہور نغمہ نگار اور ادیب جاوید اختر کی۔

وزیر اعظم نریندر مودی کی جانب سے لوک سبھا میں وندے ماترم کی حمایت کیے جانے کے بعد یہ موضوع دوبارہ زیر بحث ہے۔ اس بار جاوید اختر کے پرانے بیانات بھی سوشل میڈیا پر گردش کر رہے ہیں۔ وندے ماترم کے بارے میں جاوید اختر کی رائے مولاناؤں اور روایتی اسلامی علما سے بالکل مختلف ہے۔ ان کا صاف کہنا ہے کہ یہ بحث پرانی ہوچکی ہے اور اسے بلاوجہ ہوا دی جا رہی ہے۔

جاوید اختر کی بنیادی دلیل یہ ہے کہ یہ ایک غیر ضروری مسئلہ ہے۔

جاوید اختر اس سارے جھگڑے کو ایک ایسا معاملہ سمجھتے ہیں جس کی کوئی ضرورت نہیں۔ ان کی سیدھی دلیل یہ ہے کہ جسے یہ گیت پسند نہیں وہ نہ گائے۔ اس پر کوئی زور زبردستی نہیں ہے۔ وہ پوچھتے ہیں کہ آپ وندے ماترم نہیں گانا چاہتے تو مت گائیے۔ آپ کو کون مجبور کر رہا ہے۔ میں گاتا ہوں۔ مجھے اس میں کوئی ایسی بات نظر نہیں آتی جس پر اعتراض کیا جائے۔ اگر آپ کو اعتراض ہے تو نہ گائیے۔ آپ کیوں ایسی بے وجہ باتوں کو بڑھا رہے ہیں۔

یہ رخ انہیں مولانا ارشد مدنی جیسے علما سے الگ کر دیتا ہے۔ مولانا مدنی کا اعتراض خالص مذہبی بنیادوں پر ہے۔ ان کا کہنا ہے کہ وندے ماترم کا مطلب لازمی طور پر ماں میں تیری عبادت کرتا ہوں ہے۔ چونکہ اسلام میں عبادت صرف اللہ کے لیے مخصوص ہے اس لیے ایک مسلمان اللہ کے علاوہ کسی کی عبادت نہیں کرسکتا۔ ان کے نزدیک یہ گیت ملک کو ایک دیوی کے طور پر پیش کرتا ہے جو ان کی مذہبی تعلیمات کے خلاف ہے۔

اس کے برخلاف جاوید اختر وندے ماترم کو مذہبی نہیں بلکہ ثقافتی اور قومی اظہار سمجھتے ہیں۔ وہ اسے مذہبی قدامت پسندی سے الگ دیکھتے ہیں جس سے ڈر کر کچھ لوگ اس کا مقابلہ کرتے ہیں۔ ان کے نزدیک اس جملے کا استعمال حب الوطنی کے اظہار کے لیے ہوا ہے نہ کہ کسی مذہبی رسم کے لیے۔ اسی لیے انہوں نے اپنی تحریروں میں بھی اس کا استعمال کرنے میں کبھی جھجک محسوس نہیں کی۔ وہ فیلم سزاۓ کالا پانی اور فیلم پھر بھی دل ہے ہندوستانی کے گیتوں میں وندے ماترم کے الفاظ استعمال کر چکے ہیں۔ اس سے ان کا رویہ واضح ہوتا ہے کہ وہ اسے اپنی ثقافتی شناخت کا ایک حصہ سمجھتے ہیں۔

تاریخی حقیقت اور ثقافتی ورثہ

جاوید اختر نے اس بات کو تسلیم کیا ہے کہ وندے ماترم کا تاریخی پس منظر متنازع ہے کیونکہ یہ بنکم چندر کے ناول آنند مٹھ کا حصہ ہے۔ اس ناول میں تمام مخالف کردار مسلمان ہیں۔ آخر میں مسلمانوں کی شکست ہوتی ہے اور مصنف خوش ہوتا ہے کہ انگریزوں نے انہیں مبینہ طور پر مسلمانوں سے بچایا۔

تاہم جاوید اختر کا کہنا ہے کہ گیت اپنے اصل پس منظر سے آگے نکل چکا ہے۔ وہ یاد دلاتے ہیں کہ جب اسے قومی گیت بنانے کی بات ہوئی تھی تو کانگریس نے سنجیدہ اعتراضات کو دیکھا تھا۔ کانگریس نے دو سخت مذہبی اشعار کو الگ کر دیا تھا جس کے بعد یہ تنازع ختم ہوگیا تھا۔ جاوید اختر کے مطابق موجودہ اعتراض بلاوجہ ہے۔ ان کا کہنا ہے کہ یہ گیت اب ملک کے ورثے کا حصہ ہے اور اسے کسی مذہبی کسوٹی پر نہیں پرکھنا چاہیے۔

مولاناؤں کی دلیل یہ ہے کہ ناول کا مسلم مخالف پس منظر اور گیت میں دیوی کی تصویر چاہے کچھ اشعار ہٹا دیے گئے ہوں گیت کی اصل روح کو مذہبی بنا دیتا ہے۔ لیکن جاوید اختر کے نزدیک وقت کے ساتھ گیت یا نعرے کا مطلب بدل جاتا ہے اور اس کی قومی اہمیت کسی مذہبی سختی سے زیادہ اہم ہوتی ہے۔

زبردستی کے خلاف اور حب الوطنی کو آزمائش نہ بنانا

جاوید اختر اس گیت کے حمایتی ہونے کے باوجود اسے کسی پر تھوپنے کے خلاف ہیں۔ وہ کہتے ہیں کہ حب الوطنی کسی گانے سے ثابت نہیں کی جا سکتی۔ انہوں نے ان بیانات کی حمایت کی ہے جن میں اسے زبردستی گانے کی کوششوں کی مخالفت کی گئی تھی۔ جاوید اختر اسے ایسے لوگوں کا طریقہ بتاتے ہیں جو سماج میں تقسیم پیدا کرنا چاہتے ہیں۔

یعنی ان کا مؤقف دو حصوں میں بٹا ہوا ہے۔

ثقافتی قبولیت۔ میں اسے گاتا ہوں۔ میں اسے اپنی ثقافت کا حصہ سمجھتا ہوں۔

سیاسی مخالفت۔ اسے کسی پر زبردستی مسلط کرنا غلط ہے کیونکہ یہ ملک کی جمہوری اور کثرتیت پسند روح کے خلاف ہے۔یہ دونوں نکات انہیں ان سیاسی دباؤ سے بچاتے ہیں جن کے تحت ہر شہری کو ایک قومی علامت کے ذریعے اپنی حب الوطنی ثابت کرنے پر مجبور کیا جاتا ہے۔ جاوید اختر جو خود کو ناستک کہتے ہیں مذہبی اور قومی علامتوں کے سیاسی استعمال کے مخالف ہیں چاہے وہ خود ثقافتی طور پر انہیں قبول کرتے ہوں۔

جاوید اختر کے نزدیک وندے ماترم کا جھگڑا صرف ایک جذباتی مسئلہ نہیں بلکہ سیاسی طور پر پیدا کیا گیا غیر ضروری تنازع ہے۔ ان کا نقطۂ نظر عقلیت ثقافتی ہم آہنگی اور اظہار کی آزادی پر قائم ہے۔ وہ یہ بھی کہتے ہیں کہ ملک کے کثیر مذہبی اور کثیر تہذیبی ماحول میں ایسے مذہبی جھگڑوں کو ہوا دینے سے گریز کرنا چاہیے۔ آخر میں ان کا پیغام یہی ہے کہ ملک سے محبت ثابت کرنے کے لیے کسی گیت کو گانا لازم نہیں اور نہ ہی اس گیت کو زبردستی لوگوں پر مسلط کیا جانا چاہیے کیونکہ اس سے بلاوجہ مذہبی تنازع پیدا ہوتا ہے۔