تحریر: ثاقب سلیم

1947 میں قیام پاکستان کے بعد سے پاکستان کی ریاستی پالیسی رہی ہے کہ بھارت کو ایک "ہندو ریاست" کے طور پر پیش کرے اور یہ دعویٰ کرے کہ بھارتی مسلمان دوسرے درجے کے شہری ہیں۔ جب بھی پاکستان نے بھارت پر حملہ کیا، وہ یہی دعویٰ کرتا رہا کہ وہ بھارتی مسلمانوں کی مدد کے لیے آیا ہے۔ لیکن ہر بار ان دعوؤں کا جواب خود بھارتی مسلمانوں نے دیا۔

1965 کی جنگ اور بھارتی مسلمانوں کا کردار
1965 میں جب پاکستان نے کشمیر کے بہانے بھارت پر حملہ کیا اور یہ پروپیگنڈہ کیا کہ وہ کشمیری مسلمانوں کی مدد کے لیے آیا ہے، تو بھارتی مسلمانوں نے اس جھوٹے دعوے کا بھرپور جواب دیا۔ اقوام متحدہ میں بھارت کی نمائندگی دو مسلمانوں نے کی اور پاکستان کا جھوٹا بیانیہ بے نقاب کیا۔

سید میر قاسم کی اقوام متحدہ میں تقریر
سید میر قاسم، جو خود کشمیری مسلمان تھے، نے اقوام متحدہ کی جنرل اسمبلی میں بھارت کی نمائندگی کرتے ہوئے کہا کہ میں کشمیر سے تعلق رکھتا ہوں اور مسلمان ہوں۔ لیکن ہمارے ملک میں مذہب کو سیاست سے الگ رکھا جاتا ہے، جو پاکستان میں نہیں ہوتا۔ پاکستان کے وزیر خارجہ نے جو باتیں کیں، میں ان کا جواب دینا اپنا فرض سمجھتا ہوں۔انہوں نے کہا کہ کشمیر میں رائے شماری(Plebiscite) کی کوئی گنجائش نہیں۔ بھارت نے کشمیر کو اس لیے تسلیم کیا کیونکہ وہاں کی مقبول سیاسی جماعت ’نیشنل کانفرنس‘ نے خود بھارت سے الحاق کی درخواست کی تھی، نہ کہ صرف راجہ کے دستخط پر۔ انہوں نے یہ بھی بتایا کہ 1947 میں بھارتی فوج کے آنے سے پہلے کشمیری مسلمانوں نے ہی پاکستان کے حملے کا مقابلہ کیا تھا۔انہوں نے کہا کہ کشمیری عوام نے انتخابات میں بار بار بھارت سے وابستگی کا ثبوت دیا ہے۔ دو مرتبہ انہوں نے خون دے کر پاکستان کو جواب دیا ہے۔ اس لیے اب کسی اور رائے شماری کی ضرورت نہیں۔

پاکستانی نمائندے کی جھنجھلاہٹ
پاکستانی نمائندہ قاسم کی تقریر سے اتنا پریشان ہوا کہ کہنے لگا کہ یہ عجیب بات ہے کہ جو مسلمان بھارت کی نمائندگی کرتا ہے، وہ خود کو ہندوؤں سے زیادہ بھارتی ثابت کرنے کی کوشش کرتا ہے۔سید میر قاسم نے اس کا جواب دیا کہ ہم بھارتی مسلمان ان سستے طعنوں کے عادی ہو چکے ہیں۔ ہم جانتے ہیں کہ یہ نفرت پاکستان کے ان رہنماؤں سے ہے جو یہ برداشت نہیں کر پائے کہ بھارت کے مسلمان ان کے مذہب پر مبنی قومی نظریے کو مسترد کر چکے ہیں۔

محمد علی کریم چھاگلہ کی سیکیورٹی کونسل میں تقریر

محمد علی کریم چھاگلہ نے بھارت کی نمائندگی اقوام متحدہ کی سیکیورٹی کونسل میں کی۔ انہوں نے کہاکہ پاکستان دعویٰ کرتا ہے کہ بھارتی مسلمانوں کے ساتھ ظلم ہو رہا ہے۔ لیکن یہ بتانا ضروری ہے کہ بھارت میں مسلمانوں کی تعداد پانچ کروڑ ہے، جو دنیا کی تیسری سب سے بڑی مسلم آبادی ہے۔ وہ اس ملک کے شہری ہیں، زمین کے بیٹے ہیں، ہر عہدہ ان کے لیے کھلا ہے، اور کئی مسلمان اعلیٰ ترین عہدوں پر فائز ہیں۔انہوں نے مزید کہا کہ ہمارا ملک سیکولر ہے، یہاں کوئی سرکاری مذہب نہیں۔ ہر مذہب کے ماننے والے کو مکمل آزادی حاصل ہے۔ ہمارا آئین ہر شہری کو برابر کے حقوق دیتا ہے۔چھاگلہ نے یہ بھی کہا کہ بھارت کو پورا حق ہے کہ وہ پاکستان کی جارحیت کا جواب دے اور لائن آف کنٹرول کو دوبارہ ترتیب دے تاکہ دراندازی روکی جا سکے۔آج کا سبق۔2025 میں جب ایک بار پھر پاکستان بھارت پر حملے اور پروپیگنڈے میں مصروف ہے کہ بھارتی مسلمان ملک سے وفادار نہیں، تو تاریخ کو یاد رکھنے کی ضرورت ہے۔1965 میں بھی بھارتی مسلمانوں نے پاکستان کے جھوٹے دعووں کو دنیا کے سامنے بے نقاب کیا تھا ۔ اور آج بھی وہ اپنے وطن کے وفادار ہیں۔