ملک اصغر ہاشمی / نئی دہلی

ایران-اسرائیل جنگ کی گونج اتنی تیز ہے کہ اس شور میں انسانیت اور خدمت کی کئی مثالیں دب کر رہ گئی ہیں۔ ایسی ہی ایک متاثر کن مثال ابو ظہبی کے ڈاکٹر شمشیر ویالیل کی ہے جن کا دل احمد آباد ہوائی حادثے میں جاں بحق ہونے والے ڈاکٹروں اور میڈیکل طلباء کے لیے دھڑک اٹھا۔یہ وہی حادثہ ہے جس میں ایئر انڈیا کی ایک پرواز، ٹیک آف کے چند ہی منٹ بعد، احمد آباد کے بی جے میڈیکل کالج کی میس کی عمارت سے ٹکرا گئی تھی۔ اس المیے میں کل 242 مسافر جاں بحق ہوئے تھے۔ ان میں چار ایم بی بی ایس طلباء اور ایک ڈاکٹر بھی شامل تھے۔جہاں ایئر انڈیا نے صرف اپنے مسافروں کے اہل خانہ کو معاوضہ دینے کا اعلان کیا، وہیں ان میڈیکل طلباء اور ڈاکٹر کے لیے کسی قسم کی سرکاری مدد یا اعلان سامنے نہیں آیا۔

ایسے میں متحدہ عرب امارات کے دارالحکومت ابو ظہبی میں مقیم ڈاکٹر شمشیر ویالیل آگے بڑھے۔ انہوں نے حادثے میں جان گنوانے والے ہر میڈیکل طالب علم اور ڈاکٹر کے اہل خانہ کو ایک-ایک کروڑ روپے مالی امداد دینے اور زخمیوں کو 20-20 لاکھ روپے دینے کا اعلان کیا۔دلچسپ بات یہ ہے کہ ڈاکٹر شمشیر یہ مدد کسی اسلامی ادارے یا مذہبی تنظیم کے ذریعے نہیں بلکہ بی جے میڈیکل کالج کے جونیئر ڈاکٹرز ایسوسی ایشن کے توسط سے پہنچائیں گے۔یہی ایسوسی ایشن طے کرے گی کہ کس کو کتنی مدد دی جائے۔ خاص بات یہ بھی ہے کہ ایسوسی ایشن کا کوئی رکن مسلمان نہیں ہے، جس سے یہ صاف ظاہر ہوتا ہے کہ ڈاکٹر شمشیر کی سوچ مذہب سے بالاتر، خالص انسانی اور غیر جانب دار ہے۔

امداد کی تفصیل ڈاکٹر ویالیل نے بتایا کہ وہ ہر جاں بحق طالب علم کے خاندان کو 4 لاکھ 26 ہزار درہم (تقریباً ایک کروڑ بھارتی روپے)، پانچ شدید زخمی طلبہ کو 85 ہزار درہم اور اُن ڈاکٹروں کے خاندانوں کو بھی 85ہزار درہم دیں گے جن کے عزیز اس حادثے میں جان کی بازی ہار گئے۔ یہ امداد بی جے میڈیکل کالج کی جونیئر ڈاکٹروں کی تنظیم کے ذریعے تقسیم کی جانے گی تاکہ یہ فوری طور پر مستحقین تک پہنچ سکے۔

ذاتی درد اور وابستگی

انہوں نے کہا کہ  جب میں نے باسٹل اور میس کی تباہی کی فوٹیج دیکھی تو ایسا لگا . جیسے وہ جگہیں میری اپنی ہوں۔ وہ راہداریاں، وہ بیڈز ، وہ ہنسی، امتحان کا دباؤ اور گھر والوں کے فون کا انتظار - سب کچھ یاد آ گیا۔ کسی کو یہ توقع نہیں ہوتی کہ ایک طیارہ اچانک آ کر اس سب کو مٹی کا ڈھیر بنا دے گا۔

کون ہیں ڈاکٹر شمشیر ویالیل؟

فوربز کے مطابق ڈاکٹر شمشیر کی موجودہ کل مالیت 6,22,25 کروڑ روپے سے زائد ہے۔ وہ برجل ہولڈنگز کے بانی اور چیئرمین ہیں، جو مشرق وسطیٰ میں اسپتالوں، کلینکس اور فارمیسیز کا ایک وسیع نیٹ ورک چلاتا ہے۔کیرالہ کے ایک کاروباری گھرانے میں پیدا ہونے والے ڈاکٹر شمشیر نے اپنی میڈیکل تعلیم مکمل کرنے کے بعد مشرق وسطیٰ کا رخ کیا۔ ابو ظہبی کے شیخ خلیفہ میڈیکل سٹی میں ریڈیالوجسٹ کے طور پر کام کیا۔ 2007 میں انہوں نے اپنے سسر اور خلیج کے مشہور صنعت کار ایم اے یوسف علی کے تعاون سے ابو ظہبی میں ایل ایل ایچ اسپتال کی بنیاد رکھی۔آج برجل گروپ کے پاس 16 اسپتال، 24 میڈیکل سینٹرز، فارما مینوفیکچرنگ یونٹس اور بھارت و خلیج میں پھیلے صحت کے کئی منصوبے ہیں۔ وہ ویالیل فیملی آفس VPS ہیلتھ کیئر کے ذریعہ RPM، لائف فارما، لیک شور اسپتال، ایجوکیئر انسٹی ٹیوٹ جیسے برانڈز چلاتے ہیں۔

ڈاکٹر شمشیر ویالیل کا انسانی پہلو

ڈاکٹر شمشیر صرف ایک ڈاکٹر یا صنعتکار نہیں بلکہ انسانی خدمت سے گہری وابستگی رکھتے ہیں۔ انہوں نے 100 مفت دل کے آپریشن، بریسٹ کینسر اسکریننگ، مزدوروں کے لیے صحت کیمپ جیسی کئی مہمات کے ذریعہ ہزاروں زندگیاں چھوئی ہیں۔قدرتی آفات میں ریلیف، غریبوں کی مدد اور صحت سے متعلق بیداری کے لیے ان کی کوششیں متحدہ عرب امارات، افریقہ اور بھارتی برصغیر تک پھیلی ہوئی ہیں۔ ڈاکٹر شمشیر کو پردیسی بھارتی اعزاز (2014)، شیخ حمدان بن زاید ہیومینیٹریئن سروس ایوارڈ، علی گڑھ مسلم یونیورسٹی کی اعزازی ڈاکٹریٹ، عرب ہیلتھ انٹرنیشنل لیڈرشپ ایوارڈ (2012) اور ارنسٹ اینڈ ینگ ’انٹرپرینیور آف دی ایئر‘ (2011) سمیت کئی قومی و بین الاقوامی اعزازات مل چکے ہیں۔وہ یو اے ای میڈیکل کونسل، شارجہ یونیورسٹی میڈیکل کالج، این آر آئی کمیشن (کیرالہ) اور کنور انٹرنیشنل ایئرپورٹ کے بورڈ میں بھی شامل رہے ہیں۔ڈاکٹر شمشیر کا ماننا ہے کہ “مذہب، ذات یا قومیت کی دیواریں انسانی خدمت میں نہیں ہونی چاہئیں۔ دکھ صرف متاثرہ کا نہیں ہوتا، وہ ہم سب کا ہوتا ہے۔”