ملک اصغر ہاشمی

بڑھتی ہوئی آبادی اور روزگار کے کم ہوتے مواقع کے درمیان آج کے نوجوانوں کے لیے سب سے بڑا چیلنج ایک محفوظ مستقبل کی تلاش ہے۔ ہر سال لاکھوں نوجوان ڈگریاں حاصل کرکے میدانِ عمل میں قدم رکھتے ہیں، لیکن محدود روزگار کے مواقع انہیں مایوسی کا شکار کر دیتے ہیں۔ ایسے حالات میں سب سے بہتر راستہ یہی ہے کہ انسان اپنا کوئی ایسا کاروبار شروع کرے جس سے نہ صرف اس کی اپنی زندگی سنورے بلکہ دوسروں کے لیے بھی روزگار کے مواقع پیدا ہوں۔ اسی سوچ رکھنے والے اور اپنے آبائی ہنر سے وابستہ نوجوانوں کے لیے مرکزی حکومت کی ’’اُستاد‘‘ اسکیم ایک سنہری موقع بن کر سامنے آئی ہے۔

اگر آپ کے خاندان میں کوئی روایتی فن، دستکاری یا ہنر موجود ہے تو یہ سرکاری اسکیم آپ کے لیے کسی نعمت سے کم نہیں۔ اس اسکیم سے فائدہ اٹھا کر آپ اپنے آبائی پیشے کو نئی بلندیوں تک پہنچا سکتے ہیں اور اپنے ہنر کو جدید بازار کی ضروریات کے مطابق ترقی بھی دے سکتے ہیں۔ یہ اسکیم ان نوجوانوں کے لیے ایک بہترین موقع ہے جو دستکاری، ہینڈی کرافٹ یا بُنائی جیسے روایتی کاموں کو ایک کامیاب اسٹارٹ اپ میں تبدیل کرنا چاہتے ہیں۔

حکومت ہند کی وزارتِ اقلیتی امور نے ملک کی روایتی فنون اور دستکاریوں کے بیش بہا ورثے کو محفوظ رکھنے کے لیے اس خصوصی پروگرام کا آغاز کیا ہے۔ اس اسکیم کا مکمل نام "اپ گریڈنگ دی اسکلز اینڈ ٹریننگ اِن ٹریڈیشنل آرٹس/کرافٹس فار ڈیولپمنٹ" (USTTAD) ہے۔ اس کا بنیادی مقصد اقلیتی برادری کے ہنرمندوں اور نوجوانوں کی صلاحیتوں کو فروغ دینا ہے۔

بدلتے وقت اور عالمگیریت کے اس دور میں کئی آبائی فنون آہستہ آہستہ معدوم ہوتے جا رہے ہیں۔ نئی نسل ان پیشوں سے دور ہو رہی ہے کیونکہ انہیں اس میں روشن مستقبل نظر نہیں آتا۔ حکومت اسی خلا کو پُر کرنا چاہتی ہے۔ اس اسکیم کے ذریعے نوجوانوں کو نہ صرف تربیت دی جاتی ہے بلکہ ان کے ہنر کو بین الاقوامی منڈیوں سے جوڑنے کی راہ بھی ہموار کی جاتی ہے۔

اُستاد اسکیم کے تحت کئی اہم اہداف مقرر کیے گئے ہیں جو نوجوان کاروباری افراد کے لیے انتہائی مفید ثابت ہو سکتے ہیں۔ اس کا پہلا مقصد تربیت کے ذریعے ہنرمندوں اور دستکاروں کی صلاحیتوں کو بہتر بنانا ہے۔ اس کے ساتھ ساتھ روایتی دستکاریوں کی شناخت اور ان کی دستاویز بندی کے لیے معیاری نظام بھی تیار کیا جا رہا ہے۔

اس اسکیم کی سب سے اہم بات یہ ہے کہ روایتی ہنر کو عالمی منڈی سے جوڑا جا رہا ہے۔ اس سے اسکول چھوڑنے والے نوجوانوں اور غیر منظم شعبے کے کارکنوں کے لیے روزگار کے مواقع میں نمایاں اضافہ ہوتا ہے۔ یہ اسکیم اقلیتی برادریوں کو عالمی سطح پر اپنی مصنوعات فروخت کرنے کا موقع فراہم کرتی ہے، جس سے کمزور طبقات کے لیے باعزت روزگار کے دروازے کھلتے ہیں۔

اس اسکیم کا ایک اور خوبصورت پہلو یہ ہے کہ یہ محنت اور ہنر کے وقار کو فروغ دیتی ہے۔ روایتی فنون اور دستکاریوں میں نئے ڈیزائن اور تحقیق کی حوصلہ افزائی کے لیے حکومت مسلسل کام کر رہی ہے۔ ملک اور بیرونِ ملک منعقد ہونے والی نمائشوں کے ذریعے روایتی فنون اور دستکاریوں کو وسیع پلیٹ فارم فراہم کیا جاتا ہے۔

اس میں صرف ہاتھ کی کاریگری ہی شامل نہیں بلکہ روایتی کھانا پکانے کے فن (کولینری اسکلز) کو بھی شامل کیا گیا ہے۔ معدوم ہوتی ہوئی روایات کو محفوظ بنانا اور ملک کے باصلاحیت ماسٹر کرافٹس مین کو نئی شناخت دلانا اس اسکیم کا اہم مقصد ہے۔

اُستاد اسکیم کے تحت بنیادی طور پر دو بڑے پروگرام چلائے جاتے ہیں۔ پہلا پروگرام مختلف اداروں کے ذریعے روایتی فنون اور دستکاریوں کی تربیت اور مہارت میں اضافہ کرنا ہے۔ اس مقصد کے لیے ایک منظم ادارہ جاتی ڈھانچہ تیار کیا گیا ہے۔ وزارت اس کام کی ذمہ داری پروجیکٹ امپلیمنٹنگ ایجنسی (PIA) کو سونپتی ہے۔ یہ ادارے روایتی فنون اور دستکاریوں سے متعلق سرٹیفکیٹ اور ڈپلومہ کورسز چلاتے ہیں، جنہیں وزارتِ ہنر مندی و کاروباری ترقی، ڈائریکٹوریٹ آف ہینڈی کرافٹس یا متعلقہ ایکسپورٹ پروموشن کونسلز کی منظوری حاصل ہوتی ہے۔

اس اسکیم کے تحت تربیت حاصل کرنے کے لیے چند شرائط بھی مقرر کی گئی ہیں۔ درخواست دہندہ بنیادی طور پر اقلیتی برادری سے تعلق رکھتا ہو۔ تاہم اسکیم کو جامع بنانے کے لیے 25 فیصد نشستیں غیر اقلیتی بی پی ایل (خطِ غربت سے نیچے) خاندانوں کے لیے بھی مختص کی گئی ہیں۔ مزید برآں، 3 فیصد نشستیں اقلیتی برادری کے معذور افراد کے لیے مخصوص ہیں۔

درخواست گزار کی عمر 14 سے 45 سال کے درمیان ہونی چاہیے، البتہ معذور افراد کے لیے بالائی عمر کی حد میں رعایت دی گئی ہے۔ کم از کم تعلیمی قابلیت پانچویں جماعت پاس رکھی گئی ہے جبکہ معذور افراد کے لیے اس میں بھی نرمی موجود ہے۔ اگر ایک ہی خاندان کے متعدد افراد ان شرائط پر پورا اترتے ہوں تو وہ بھی اس اسکیم سے فائدہ اٹھا سکتے ہیں۔

اسکیم کے تحت کورسز کی مدت کم از کم دو ماہ اور زیادہ سے زیادہ ایک سال ہوتی ہے۔ نصاب اور دورانیہ سرکاری ماڈیول کے مطابق طے کیا جاتا ہے۔ اس کی خاص بات یہ ہے کہ صرف روایتی ہنر ہی نہیں سکھائے جاتے بلکہ آئی ٹی، سافٹ اسکلز اور اسپوکن انگلش کی تربیت بھی دی جاتی ہے تاکہ نوجوان جدید دور کے تقاضوں سے ہم آہنگ ہو سکیں۔

تربیت حاصل کرنے والوں کو روزانہ کم از کم پانچ گھنٹے کی ٹریننگ دی جاتی ہے۔ یہ مکمل طور پر مرکزی حکومت کی مالی معاونت سے چلنے والی اسکیم ہے اور اس کا تمام خرچ حکومت برداشت کرتی ہے۔

اسکیم کا دوسرا اہم حصہ اُستاد اپرنٹس شپ وظیفہ ہے جو تحقیق و ترقی کے لیے فراہم کیا جاتا ہے۔ اس کے تحت روایتی فنون اور دستکاریوں کے میدان میں تحقیق، نئے ڈیزائن اور مصنوعات کی تیاری، اور نئی ٹیکنالوجی کی ترقی کے لیے سالانہ وظیفہ دیا جاتا ہے۔ اس سے ماسٹر کرافٹس مین اور نوجوان محققین کو براہِ راست فائدہ پہنچتا ہے تاکہ وہ مارکیٹ کی ضروریات کے مطابق نئے تجربات کر سکیں۔

اس پورے منصوبے کو عملی شکل دینے میں ہنر ہاٹ اور شِلپ اُتسو اہم کردار ادا کرتے ہیں۔ اقلیتی دستکاروں اور ہنرمندوں کی مصنوعات کی مارکیٹنگ کے لیے ملک کے مختلف شہروں میں ہنر ہاٹ کا انعقاد کیا جاتا ہے۔ اس کی ذمہ داری نیشنل مائنارٹیز ڈیولپمنٹ اینڈ فنانس کارپوریشن (NMDFC)، ریاستی ایجنسیوں، ریاستی ہینڈی کرافٹس کارپوریشنز اور مرکزی دستکاری کونسلوں کو دی گئی ہے۔

وزارتِ اقلیتی امور اس مقصد کے لیے مکمل مالی معاونت فراہم کرتی ہے۔ ان نمائشوں میں 50 سے 100 اسٹال لگائے جاتے ہیں اور یہ پروگرام ایک سے تین ہفتوں تک جاری رہتا ہے۔ ہنر ہاٹ اب ملک کا ایک معروف برانڈ بن چکا ہے جس نے لاکھوں ہنرمندوں کو براہِ راست روزگار اور نئے خریدار فراہم کیے ہیں۔

ڈیجیٹل انڈیا مہم کے تحت ہنر ہاٹ کو آن لائن پلیٹ فارم سے بھی جوڑ دیا گیا ہے تاکہ دستکار اپنی مصنوعات براہِ راست ویب سائٹ کے ذریعے فروخت کر سکیں۔

بہترین کارکردگی دکھانے والے ہنرمندوں کی حوصلہ افزائی کے لیے حکومت نے 2017 میں ’’اُستاد سمان‘‘ ایوارڈ کا آغاز کیا۔ یہ اعزاز ان دستکاروں کو دیا جاتا ہے جو اپنے فن میں غیر معمولی مہارت اور نمایاں خدمات کا مظاہرہ کرتے ہیں۔

ہر سال ملک کے دس بہترین دستکار اس اعزاز کے لیے منتخب کیے جاتے ہیں۔ ایوارڈ کے تحت ایک لاکھ روپے نقد انعام، تانبے کی یادگاری تختی اور انگ وستر پیش کیا جاتا ہے۔ اس کے لیے امیدوار کی عمر 30 سال سے زیادہ اور دستکاری کے میدان میں کم از کم دس سال کا تجربہ ہونا ضروری ہے۔

مرکزی سطح کی انتخابی کمیٹی درخواست گزاروں کے نمونوں اور ان کے کام کا جائزہ لے کر فاتحین کا انتخاب کرتی ہے۔ معدوم ہوتی ہوئی دستکاریوں کو اس انتخاب میں خصوصی ترجیح دی جاتی ہے۔

اگر آپ بھی اس اسکیم سے فائدہ اٹھانا چاہتے ہیں تو اس کی درخواست کا طریقہ کار نہایت آسان ہے۔ وزارتِ اقلیتی امور وقتاً فوقتاً قومی اخبارات اور اپنے سرکاری ڈیجیٹل پورٹل کے ذریعے اشتہارات جاری کرتی ہے اور درخواستیں طلب کرتی ہے۔ مقررہ معیار کے مطابق درخواستوں کی جانچ کی جاتی ہے اور اہل امیدواروں یا اداروں کو منظوری دی جاتی ہے۔

خود روزگار کو فروغ دینے کے لیے تربیت مکمل ہونے کے بعد نوجوانوں کو مختلف بینکوں اور مالیاتی اداروں کے ذریعے مائیکرو فنانس اور آسان قرضوں کی سہولت بھی فراہم کی جاتی ہے تاکہ وہ مالی مشکلات کے بغیر اپنا کاروبار یا اسٹارٹ اپ شروع کر سکیں۔

آبائی ہنر کو جدید بازار سے جوڑ کر خود کفیل بننے کا یہ ایک بہترین اور سنہری موقع ہے۔