ممبئی: سابق بھارتی کرکٹر ظہیر خان نے عالمی سطح پر کرکٹ کے بڑھتے ہوئے دائرہ کار پر خوشی کا اظہار کرتے ہوئے کہا کہ ای یو ٹی ٹوئنٹی بیلجیم لیگ کھلاڑیوں کو اپنی صلاحیتوں کے اظہار کے لیے ایک اہم پلیٹ فارم فراہم کرے گی۔

انہوں نے کہا کہ دنیا بھر میں کرکٹ تیزی سے فروغ پا رہی ہے اور یہ لیگ بھی کھلاڑیوں کو اعلیٰ سطح پر اپنی شناخت بنانے میں مدد دے گی۔ انہوں نے مزید کہا کہ اس لیگ میں شامل ٹیمیں امپائرز اور منتظمین مل کر کرکٹ کے بہتر ڈھانچے اور شفاف نظام کو یقینی بنا رہے ہیں۔

سابق بھارتی کرکٹر عرفان پٹھان نے بھی اس لیگ کو یورپی کرکٹ کے لیے اہم پیش رفت قرار دیا۔ انہوں نے کہا کہ یورپ میں چھوٹی ٹیموں کے پاس صلاحیت تو ہوتی ہے لیکن انہیں مواقع کم ملتے ہیں اور یہ لیگ انہیں اپنی پہچان بنانے کا موقع دے گی۔

انہوں نے اٹلی کی ٹیم کی مثال دیتے ہوئے کہا کہ حالیہ ٹی ٹوئنٹی ورلڈ کپ میں اس کی کارکردگی ظاہر کرتی ہے کہ اگر ایسوسی ایٹ ممالک کو مواقع ملیں تو وہ عالمی سطح پر بہتر کارکردگی دکھا سکتے ہیں۔

یہ ٹورنامنٹ چار سے چودہ جون تک برسلز میں کھیلا جائے گا جس میں دنیا بھر کے معروف کھلاڑی شریک ہوں گے جن میں ڈیوڈ وارنر الیگز ہیلز سام بلنگز صائم ایوب مارٹن گپٹل شکیب الحسن کولن منرو وین پارنل کرس لن سندیپ لامیچھانے شعیب ملک اور دیگر شامل ہیں۔