نئی دہلی: عالمی انسداد ڈوپنگ ایجنسی واڈا نے اعلان کیا ہے کہ انڈیا مسلسل تیسرے سال عالمی کھیلوں میں ڈوپنگ کے معاملات میں سب سے اوپر رہا ہے۔ خبر رساں ادارے  کے مطابق واڈا کی سالانہ رپورٹ منگل کی رات جاری کی گئی جس میں یہ تفصیل سامنے آئی۔

رپورٹ کے مطابق انڈیا کی نیشنل اینٹی ڈوپنگ ایجنسی ناڈا نے 2024 میں پیشاب اور خون کے 7113 نمونے جمع کیے جن میں سے 260 مثبت ثابت ہوئے۔ گزشتہ برس سب سے زیادہ ڈوپنگ کیسز ایتھلیٹکس میں سامنے آئے جہاں 76 کیسز رپورٹ ہوئے۔ اس کے بعد ویٹ لفٹنگ میں 43 اور ریسلنگ میں 29 کیسز سامنے آئے۔

جولائی کے مہینے میں انڈر 23 ریسلنگ چیمپئن اور پیرس اولمپکس کی کوارٹر فائنلسٹ ریتیکا ہوڈا کا ڈوپ ٹیسٹ مثبت آیا جس کے بعد انہیں عارضی طور پر معطل کر دیا گیا۔ اسی دوران انڈیا کی یونیورسٹی گیمز میں ایسی اطلاعات بھی سامنے آئیں کہ بعض ٹریک اینڈ فیلڈ مقابلوں میں صرف ایک کھلاڑی شریک ہوا کیونکہ دیگر کھلاڑی اینٹی ڈوپنگ حکام کی موجودگی پر مقابلے سے دور ہو گئے۔

دنیا کے سب سے زیادہ آبادی والے ملک انڈیا جس کی آبادی 1.4 ارب ہے کو 2022 اور 2023 میں بھی ڈوپنگ کے حوالے سے سرفہرست قرار دیا گیا تھا۔ 2024 میں فرانس 91 مثبت کیسز کے ساتھ دوسرے نمبر پر رہا جبکہ اٹلی 85 کیسز کے ساتھ تیسرے نمبر پر رہا۔ روس اور امریکہ دونوں میں 76 76 کیسز رپورٹ ہوئے۔ اس کے بعد جرمنی میں 54 اور چین میں 43 کیسز سامنے آئے۔

رپورٹ کے بعد ناڈا نے ڈوپنگ کے خلاف اپنی کوششوں کا دفاع کیا۔ بدھ کو جاری بیان میں کہا گیا کہ حالیہ برسوں میں انڈیا میں انسداد ڈوپنگ نظام کو نمایاں طور پر مضبوط کیا گیا ہے۔ بیان میں مزید کہا گیا کہ کھیلوں میں ڈوپنگ کے خاتمے کے لیے ناڈا نے نہ صرف ٹیسٹوں کی تعداد بڑھائی ہے بلکہ تعلیم اور آگاہی پر بھی بھرپور توجہ دی ہے۔

ناڈا کے مطابق 16 دسمبر تک رواں سال 7068 ٹیسٹ کیے جا چکے ہیں جن میں سے 110 مثبت آئے ہیں۔ یہ رپورٹ ایسے وقت سامنے آئی ہے جب چند ماہ قبل بین الاقوامی اولمپک کمیٹی نے انڈیا میں کارکردگی بڑھانے والی ادویات کے وسیع استعمال پر تشویش ظاہر کرتے ہوئے ملک سے اپنے نظام کو بہتر بنانے کا مطالبہ کیا تھا۔ آئی او سی کی نشاندہی کے بعد انڈین اولمپک ایسوسی ایشن نے اگست میں ایک نیا اینٹی ڈوپنگ پینل تشکیل دیا تھا۔