.webp "خواتین کی کرکٹ سنہری دور میں داخل ہو چکی ہے۔ جے شاہ")
آسٹریلیا نے پہلے گیند بازی کرتے ہوئے انگلینڈ کو 150 رنز پر محدود کر دیا اور پھر 17.1 اوور میں ہدف حاصل کر لیا۔ بیتھ مونی نے 64 رنز کی شاندار اننگز کھیل کر ٹیم کی کامیابی میں کلیدی کردار ادا کیا۔
فتح کے بعد جے شاہ نے کہا کہ خواتین کی کرکٹ اپنے سنہری دور میں داخل ہو چکی ہے اور اس ٹورنامنٹ نے ایک بار پھر ثابت کر دیا کہ یہ کھیل اپنی طاقت، جذبے اور اعلیٰ معیار کی بدولت شائقین کے لیے بے حد دلکش ہے۔
انہوں نے ایکس پر اپنے پیغام میں کہا کہ کرکٹ آسٹریلیا کو ساتواں آئی سی سی ویمنز ٹی20 ورلڈ کپ جیتنے پر مبارکباد۔ انگلینڈ کی ٹیم بھی داد کی مستحق ہے جس نے بہترین کھیل پیش کیا۔ یہ ٹورنامنٹ خواتین کی کرکٹ کے روشن مستقبل کا ثبوت ہے اور اس کھیل کا سنہری دور جاری ہے۔
ہدف کے تعاقب میں آسٹریلیا نے دوسرے اوور میں جارجیا وول کی وکٹ گنوا دی لیکن بیتھ مونی اور فوبی لچفیلڈ نے شاندار شراکت قائم کرتے ہوئے ٹیم کو مضبوط پوزیشن میں پہنچا دیا۔ پاور پلے کے اختتام پر آسٹریلیا کا اسکور 62 رنز تھا جبکہ 11ویں اوور میں ٹیم نے 100 رنز کا ہندسہ بھی عبور کر لیا۔
فوبی لچفیلڈ نے 48 رنز کی عمدہ اننگز کھیلی جبکہ بیتھ مونی نے ویمنز ٹی20 ورلڈ کپ میں اپنی نویں نصف سنچری مکمل کی۔ بعد ازاں ایلیس پیری اور ایشلے گارڈنر نے کامیابی تک ٹیم کو پہنچا دیا۔
اس سے قبل آسٹریلیا کے منظم بولنگ اٹیک نے انگلینڈ کو 150 رنز تک محدود رکھا۔ انگلینڈ کی کپتان نیٹ سیور برنٹ نے ناقابل شکست 58 رنز بنائے جبکہ فریا کیمپ نے 44 رنز کی اننگز کھیلی۔
آسٹریلیا کی جانب سے اینابیل سدرلینڈ، سوفی مولینوکس، لوسی ہیملٹن اور کم گارتھ نے ایک ایک وکٹ حاصل کی اور ٹیم کی ایک اور یادگار عالمی فتح کی بنیاد رکھی۔
