سینٹ جانز : کرکٹ ویسٹ انڈیز (سی ڈبلیو آئی) نے منگل کو اعلان کیا کہ ویسٹ انڈیز اور افغانستان کے درمیان تین میچوں پر مشتمل ٹی ٹوئنٹی سیریز جنوری 2026 میں متحدہ عرب امارات (یو اے ای) میں کھیلی جائے گی۔

یہ سیریز 19 جنوری کو شارجہ کرکٹ اسٹیڈیم میں شروع ہوگی، جبکہ دوسرا اور تیسرا ٹی ٹوئنٹی میچ بالترتیب 21 اور 22 جنوری کو اسی مقام پر کھیلا جائے گا۔

سی ڈبلیو آئی کے ڈائریکٹر آف کرکٹ مائلز باسکومب نے کہا، "یہ سیریز ہماری تیاری کے لیے ایک بہترین موقع فراہم کرے گی۔ ذیلی براعظمی حالات میں مضبوط حریف کا سامنا ہمیں اپنی حکمتِ عملی اور کمبی نیشنز بہتر بنانے میں مدد دے گا، اور ساتھ ہی کھلاڑیوں کو بھارت اور سری لنکا جیسی وکٹوں پر اعتماد حاصل کرنے کا موقع بھی ملے گا۔"

افغانستان کرکٹ بورڈ کے سی ای او نصیب خان نے کہا، "ویسٹ انڈیز کے خلاف ایک بڑی عالمی ایونٹ سے قبل مقابلہ کرنا ہماری ٹیم کے لیے بہترین موقع ہے تاکہ وہ اپنی فائنل ٹیم اور حکمتِ عملی طے کر سکے۔ ہم تیاریوں پر گہری نظر رکھے ہوئے ہیں، اور ایک مضبوط حریف کے خلاف کھیلنا ورلڈ کپ سے پہلے بہترین مشق ہے۔"

گزشتہ ٹی ٹوئنٹی ورلڈ کپ میں میزبان ویسٹ انڈیز سپر ایٹ مرحلے تک پہنچا لیکن سیمی فائنل میں جگہ نہ بنا سکا، جبکہ افغانستان نے تاریخ رقم کرتے ہوئے پہلی بار سیمی فائنل میں رسائی حاصل کی۔ دونوں ٹیموں کے درمیان اب تک کھیلے گئے آٹھ ٹی ٹوئنٹی میچوں میں ویسٹ انڈیز کو 3-5 کی برتری حاصل ہے۔

ویسٹ انڈیز کی ٹیم اس وقت نیوزی لینڈ کے دورے پر ہے، جہاں وہ پانچ ٹی ٹوئنٹی میچوں کے بعد تین ٹیسٹ اور تین ون ڈے میچ کھیلے گی۔ یہ سیریز 5 نومبر سے شروع ہو کر 22 دسمبر کو اختتام پذیر ہوگی۔