سلی گڑی:ہندوستان کے سابق فٹبالر بائیچنگ بھوٹیا نے ڈورینڈ کپ کو ایک باوقار ٹورنامنٹ قرار دیتے ہوئے اس کے دائرہ کار کو مزید وسیع کرنے کے اقدام کا خیرمقدم کیا۔انہوں نے امید ظاہر کی کہ مغربی بنگال حکومت کے تعاون سے تمام بڑے کلب اس ٹورنامنٹ میں حصہ لیں گے۔ انہوں نے منتظمین سے یہ بھی درخواست کی کہ ڈورینڈ کپ کے گروپ مرحلے کا کم از کم ایک میچ سلی گڑی میں بھی منعقد کیا جائے کیونکہ اس شہر کا فٹبال سے گہرا تعلق ہے۔

135واں ڈورینڈ کپ 25 جولائی سے شروع ہوگا۔ ٹورنامنٹ کا افتتاح تاریخی کولکاتا ڈربی سے ہوگا جہاں پہلے میچ میں موہن بگان سپر جائنٹ کا مقابلہ ایسٹ بنگال ایف سی سے ہوگا۔بائیچنگ بھوٹیا نے صحافیوں سے گفتگو کرتے ہوئے کہا۔"میرے خیال میں یہ بہت اچھا اقدام ہے کیونکہ ڈورینڈ کپ دنیا کا دوسرا قدیم ترین ٹورنامنٹ ہے اور ایک نہایت باوقار مقابلہ بھی ہے۔ مجھے امید ہے کہ مغربی بنگال حکومت کی حمایت کے ساتھ تمام بڑے کلب اس میں حصہ لیں گے۔ یہ دنیا کا دوسرا قدیم ترین ٹورنامنٹ ہے۔ یہ انتہائی باوقار مقابلہ ہے۔ ہم بھی اسی کھیل کو کھیلتے ہوئے بڑے ہوئے ہیں۔ میں درخواست کرتا ہوں کہ ڈورینڈ کپ کے گروپ مرحلے کا ایک میچ یہاں سلی گڑی میں بھی منعقد کیا جائے۔"

24 ٹیموں پر مشتمل اس ٹورنامنٹ میں چھ گروپس ہوں گے اور مقابلے پانچ میزبان شہروں میں کھیلے جائیں گے۔ یہ ٹورنامنٹ 25 جولائی سے 23 اگست تک جاری رہے گا۔ اس میں ہندوستان کے سرکردہ کلب سروسز ٹیمیں ابھرتے ہوئے فٹبال ادارے اور بین الاقوامی ٹیمیں حصہ لیں گی۔ یوں ایک ماہ تک فٹبال کا بھرپور جشن منایا جائے گا۔اس سال کے ڈورینڈ کپ کے مقابلے کولکاتا رانچی امپھال شیلانگ اور گوہاٹی میں منعقد ہوں گے۔

اس کے ذریعے ٹورنامنٹ کی قومی سطح پر بڑھتی ہوئی رسائی کی جھلک ایک بار پھر سامنے آئے گی جبکہ اس کی جڑیں مشرقی اور شمال مشرقی ہندوستان کے فٹبال مراکز سے مضبوطی سے جڑی رہیں گی۔2019 سے ڈورینڈ کپ کی میزبانی کرنے والا کولکاتا اس بار بھی مرکزی مقام پر رہے گا۔ یہاں گروپ اے اور گروپ بی کے مقابلے افتتاحی میچ دو کوارٹر فائنل پہلا سیمی فائنل اور فائنل کھیلا جائے گا۔