نئی دہلی: راجستھان رائلز کے نوجوان بلے باز ویبھو سوریہ ونشی نے انڈین پریمیئر لیگ 2026 میں شاندار کارکردگی کا مظاہرہ کرتے ہوئے تاریخ رقم کردی۔ انہوں نے ایک سیزن میں کسی بھی ہندوستانی بلے باز کی جانب سے سب سے زیادہ 43 چھکے لگانے کا ریکارڈ اپنے نام کرلیا۔

اس کارنامے کے ساتھ ویبھو سوریہ ونشی نے سن رائزرس حیدرآباد کے اسٹار بلے باز ابھیشیک شرما کا ریکارڈ توڑ دیا جنہوں نے 2024 میں 42 چھکے لگائے تھے۔

ویبھو سوریہ ونشی اب آئی پی ایل تاریخ کے بڑے ناموں کی فہرست میں شامل ہوگئے ہیں۔ اس فہرست میں وراٹ کوہلی بھی شامل ہیں جنہوں نے 2016 کے تاریخی سیزن میں 38 چھکے لگائے تھے اور پھر 2024 میں بھی یہی کارنامہ دہرایا تھا۔ شریاس ایئر اور سوریہ کمار یادو نے بھی ایک سیزن میں 38 چھکے لگائے تھے۔

ویبھو سوریہ ونشی نے یہ ریکارڈ اتوار کو نئی دہلی کے ارون جیٹلی اسٹیڈیم میں دہلی کیپیٹلس کے خلاف میچ کے دوران قائم کیا۔

انہوں نے صرف 21 گیندوں پر 46 رنز کی دھواں دار اننگز کھیلی جس میں 5 چوکے اور 3 شاندار چھکے شامل تھے۔ ان کا اسٹرائیک ریٹ 219.05 رہا۔

ویبھو سوریہ ونشی اس وقت جاری ٹورنامنٹ میں راجستھان رائلز کے سب سے زیادہ رنز بنانے والے بلے باز بھی ہیں۔ انہوں نے 12 اننگز میں 40.50 کی اوسط سے 486 رنز بنائے ہیں جس میں ایک سنچری اور 2 نصف سنچریاں شامل ہیں۔

میچ کی بات کریں تو دہلی کیپیٹلس کے گیندبازوں نے مچل اسٹارک کی شاندار بولنگ کی بدولت راجستھان رائلز کو 20 اوورز میں 8 وکٹ پر 193 رنز تک محدود کردیا۔

راجستھان ایک وقت 12 اوورز میں 2 وکٹ پر 140 رنز بنا چکی تھی لیکن اس کے بعد دہلی کے گیندبازوں نے زبردست واپسی کی۔ مچل اسٹارک نے 4 وکٹیں حاصل کیں جبکہ لنگی نگیدی اور مادھو تیواری نے 2۔2 کھلاڑیوں کو آؤٹ کیا۔

راجستھان رائلز ٹیم: یشسوی جیسوال۔ ویبھو سوریہ ونشی۔ دھرو جوریل۔ ریان پراگ۔ روی سنگھ۔ ڈونووَن فریرا۔ شبھم دوبے۔ جوفرا آرچر۔ ایڈم ملنے۔ بریجیش شرما۔ یش راج پنجا۔

دہلی کیپیٹلس ٹیم: کے ایل راہل۔ ابھشیک پوریل۔ ساحل پارکھ۔ ٹرسٹن اسٹبس۔ ڈیوڈ ملر۔ اکشر پٹیل۔ مادھو تیواری۔ تریپورانا وجے۔ لنگی نگیدی۔ مچل اسٹارک۔ مکیش کمار۔