نئی دہلی :انٹرنیشنل کرکٹ کونسل کے چیئرمین جے شاہ نے ٹی20 ورلڈ کپ 2026 میں ایسوسی ایٹ ممالک کی شاندار کارکردگی کی تعریف کرتے ہوئے کہا ہے کہ اس ٹورنامنٹ نے ان ٹیموں کی صلاحیت اور مقابلہ کرنے کی طاقت کو نمایاں طور پر اجاگر کیا۔

انہوں نے ایسے سنسنی خیز مقابلوں کا ذکر کیا جن میں امریکہ نے ہندستان کے خلاف سخت مقابلہ کیا۔ نیدرلینڈز پاکستان کو شکست دینے کے قریب پہنچ گیا۔ نیپال نے انگلینڈ کو سخت ٹکر دی اور زمبابوے نے نئی دہلی میں آسٹریلیا کو شکست دے کر سب کو حیران کر دیا۔

صحافیوں سے گفتگو کرتے ہوئے جے شاہ نے کہا کہ ٹی20 ورلڈ کپ 2026 ایسوسی ایٹ ممالک کے لیے بہت اہم تھا۔ ہندستان چیمپئن بنا لیکن سب نے دیکھا کہ امریکہ نے ہندستان کے خلاف کس قدر مضبوط مقابلہ کیا۔ نیدرلینڈز پاکستان کو تقریباً ہرا ہی دیا تھا۔ نیپال نے انگلینڈ کے خلاف زبردست کھیل پیش کیا جبکہ زمبابوے نے آسٹریلیا کو شکست دے دی۔

انہوں نے کہا کہ وہ اس پلیٹ فارم کے ذریعے تمام ایسوسی ایٹ ٹیموں کو مبارکباد دینا چاہتے ہیں کیونکہ ان کی محنت اور جدوجہد نے اس ورلڈ کپ کے معیار اور وقار کو بہت بلند کر دیا ہے۔

جے شاہ نے مزید بتایا کہ اس ورلڈ کپ نے ناظرین کی تعداد کے تمام پچھلے ریکارڈ توڑ دیے ہیں۔ انہوں نے کہا کہ فی الحال وہ درست اعداد و شمار شیئر نہیں کر سکتے لیکن بعد میں میڈیا کے ساتھ تفصیلات ضرور شیئر کریں گے۔ تاہم یہ واضح ہے کہ اس بار ناظرین کی تعداد نے تمام سابقہ ریکارڈ توڑ دیے ہیں۔

حال ہی میں اختتام پذیر ہونے والے ٹی20 ورلڈ کپ میں ہندستان نے شاندار کارکردگی کا مظاہرہ کرتے ہوئے ٹائٹل اپنے نام کیا۔ فائنل میں ہندستان نے اتوار کے روز نیوزی لینڈ کو 96 رنز سے شکست دے کر کامیابی کے ساتھ اپنے خطاب کا دفاع کیا۔

اس جیت کے ساتھ ہندستان پہلی ٹیم بن گئی جس نے اپنے ہی ملک میں ٹی20 ورلڈ کپ جیتا۔ اسی کے ساتھ وہ 2024 کے بعد لگاتار دوسرا خطاب جیتنے والی ٹیم بھی بن گئی اور مجموعی طور پر تیسری بار یہ ٹرافی حاصل کی۔

فائنل میں سنجو سیمسن نے اوپننگ کرتے ہوئے 46 گیندوں پر 89 رنز کی شاندار اننگز کھیلی۔ ان کے علاوہ ابھیشیک شرما ایشان کشن اور شیوم دوبے کی اہم شراکتوں کی بدولت ہندستان نے پہلی اننگز میں 254 رنز کا بڑا اسکور کھڑا کیا۔