ڈھاکہ : بنگلہ دیش نے اگلے ماہ شروع ہونے والے ٹی20 ورلڈ کپ کے لیے اپنے میچز انڈیا کے بجائے سری لنکا میں کرانے کی درخواست کی ہے۔ خبر رساں ایجنسی  کے مطابق یہ پیش رفت اس وقت سامنے آئی ہے جب انڈیا نے آئی پی ایل میں ایک بنگلہ دیشی کھلاڑی کو شرکت سے روک دیا تھا۔

سنہ 2024 کے اواخر میں ڈھاکہ میں وزیراعظم شیخ حسینہ واجد کی حکومت کے خاتمے کے بعد بنگلہ دیش اور پڑوسی ملک انڈیا کے درمیان سفارتی کشیدگی پیدا ہو گئی تھی جو تاحال برقرار ہے۔ شیخ حسینہ واجد کو انڈیا کا قریبی اتحادی سمجھا جاتا تھا اور وہ ملک چھوڑ کر انڈیا میں پناہ لے چکی ہیں۔

بنگلہ دیش کرکٹ بورڈ نے اتوار کو کہا کہ اس نے باضابطہ طور پر انٹرنیشنل کرکٹ کونسل سے درخواست کی ہے کہ بنگلہ دیش کے میچز انڈیا سے سری لنکا منتقل کیے جائیں۔ بی سی بی کے بیان میں کہا گیا کہ بورڈ آف ڈائریکٹرز نے فیصلہ کیا ہے کہ موجودہ حالات میں بنگلہ دیش کی قومی ٹیم ٹورنامنٹ کھیلنے کے لیے انڈیا نہیں جائے گی۔

بیان کے مطابق یہ فیصلہ کھلاڑیوں کی سلامتی سے متعلق بڑھتے خدشات کے پیش نظر کیا گیا ہے اور اس میں حکومت کی سفارش بھی شامل تھی۔ بنگلہ دیش کے فاسٹ بولر مستفیض الرحمان کو انڈین پریمیئر لیگ کی ٹیم کولکتہ نائٹ رائڈرز نے فارغ کر دیا تھا جس کی وجہ بورڈ آف کنٹرول فار کرکٹ ان انڈیا کی سفارش بتائی گئی۔

اس سے قبل بنگلہ دیش کی عبوری حکومت میں نوجوانوں اور کھیلوں کے مشیر آصف نذرل نے کہا تھا کہ کسی بھی صورت میں بنگلہ دیش کرکٹ بنگلہ دیشی کرکٹرز یا ملک کی توہین برداشت نہیں کی جائے گی۔ سرکاری خبر رساں ادارے بی ایس ایس کے مطابق انہوں نے کہا کہ غلامی کے دن گزر چکے ہیں اور جہاں ایک بنگلہ دیشی کھلاڑی معاہدے کے باوجود انڈیا میں خود کو محفوظ نہیں سمجھتا وہاں پوری قومی ٹیم بھی ورلڈ کپ کے لیے خود کو محفوظ تصور نہیں کر سکتی۔